Wutuluce 21

Vyono yiwanojeye wawanda watendelwe

(Kum 15:12-18)

1“Aga go malajilizo gono kowapela Waisilayeli. 2Hono wumugule muwanda we Cihebelaniya, yuyo kokwitumamila myaka mutandatu du. Ninga mu mwaka wo mupunghati, hodu, wumukombole yabite, hamba wulece kumusaka yakulipe cinji cocose. 3Na hono wuwe wamugula lono yakali si natola, kowuka du yali wene. Ninga hono yawe yaza yena no mugolece wakwe, kowuka yabite hamonga no mugolece wakwe. 4Ninga langa hono mono yamugula yawe yamutoza mucekulu, nayo yakamulelela wana we cilume na we cicekulu, yuyo mucekulu hamonga ne wana, wowa sawo yakwe yuyo mono yamugula, ninga mwene mwitumami kowuka yali wene du. 5Ninga mwitumami yuyo, hono yalonje calinze vyono yakali yamwendile yuyo mono yamugula, hamonga ne wanagwe, no mugolece wakwe, holeka si kokwenda kuwuka, 6hodu, yuyo mono yamugula komuleta hali Mulungu. Na hanyuma kanyhi yamutegule ha cipimbila-mulango, yamutobole likutu no muhonelo. No mwitumami yuyo, komwitumamila mono yamugula mu mikalile yakwe yose.

7“Ninga hono munhu yamuguze mwanagwe we cicekulu, ayo si kosuma kuwuka nha vyono wakuwuka wetumami we cilume yaye. 8Na hono yuyo mwitumami we cicekulu yawe yagulwa no munhu mono yehwesaga vyono komutola, alu kanyhi yeza si yakumusaka, hodu, kosuma kumuleka yakombozwe no mulezi wakwe. No mulume yuyo kowa yasina ling'ani yo kumuguza yuyo muhinza kuli wanhu we makungugo ganji, hambi nha kamukonga bwete hamba kumutola yaye.” 9Na hono yunji yamugulile mwanagwe we cilume mwitumami we cicekulu, yimunojeye yamudime viswanu nha vyono kamudimaga mwanagwe wakwe we cicekulu. 10Na hono munhu yatole mucekulu we kejete, ale yimunojeye yajendelele kumudima mugolece wakwe mulongozi viswanu, yawe kumupela ndigwa, hamonga ne vivwalo vyono vikwiliye, kanyhi yamutendele viswanu muli zo wutole nha vyono kamutendelaga nhondo zose. 11Na hono yawone vyono si kosuma kumutendela zizi zose vyono yidatu, hodu, yimunojeye yamukombole yabite kono yakusaka mweneco, kanyhi yalece kumulifya hamba cinhu co cose.

Wulajilize wa kuli zo wukali

12“Mono komutowa munhu sunga yamuwulaje, yuyo nayo kowulagwa. 13Ninga hono yawe yali si yamupinjiye na katali, langa Mulungu yo yamukomboye mu miwoko yakwe, ale, ane nomusiwanulilenyi hanhu hono yuyo muwulaji kosuma kutiziza. 14Ninga hono munhu yakolwe likuwo, yamumanyhilile muyagwe ne nyono, no kumuwulaga mbula soko, u munhu yuyo hamba yatizize ku cikumbicilo, anye momuwusa kuko ku cikumbicilo cangu, nayo mumuwulaje.

15“Munhu mono komutowa sogwe hamba nyina, yuyo yawulagwe.

16“Munhu mono komuhiza munhu yamuguze, hamba kumunoza yawe mwitumami wakwe, munhu yuyo yawulagwe.

17“Munhu mono komulijita sogwe hamba nyina, yuyo yawulagwe.

18“Nawo wanhu wejete hono wawe kugombana, hanyuma yumonga muli wene, yamutowe muyagwe ne libwe lunji na funzi, ninga si yamuwulaje, langa kamutamisa mu nghango yo kumunoza yawe mutamwa, sunga yagone mu citanda, munhu yuyo si kolipicizwa yaye. 19Nayo mono yatowigwe kolo yatuga ciba, no kusuma kujenda yakwisimatiza ne nghome, hodu, ayulya mono yamutamise konenelwa. Ninga langa komulipa madaha gono yu yulya mutamwa yagajilize, kanyhi komutamya sunga yanojele lukulu.

20“Na hono munhu yamutowe mwitumami wakwe we cilume, hamba we cicekulu, ne nghome, no kumuwulaga, munhu yuyo yanojeye yalipicizwe. 21Ninga mwitumami yuyo hono yekale lizuwa limonga hamba vilo vyejete yawe yanoga, hodu, si kolipicizwa yaye, vyono yuyo mwitumami nayo nha sawo yakwe mweneco.

22“Nawo walume wanji hono wawe wakwitowa, hanyuma wamutamise mucekulu mono yali wimo wunji, ne 'nda yakwe yilawe, ninga yawe yasina mawine ganji, ale yuyo mulume mono yamutamise, kolipa malipo nha vyono kotemya u munya mugolece yuyo, hamonga ne walamuzi. 23Ninga langa hono yejele yeza yena wunyoga-nyoga wunji, ale, yomuwela mulume yuyo mono yamutamise, yalipe wumi kwa wumi, 24liso kwa liso, lino kwa lino, muwoko kwa muwoko, mugulu kwa mugulu, 25wunyanywe kwa wunyanywe, nghomele kwa nghomele, ne lidali kwe 'dali.

26“Na hono munhu yamutowe liso mwitumami wakwe we cilume hamba we cicekulu, sunga yalivize liso lyakwe, hodu, komukombola yuyo mwitumami yabite, nayo gowa go malipo gakwe ku soko ye liso lyakwe. 27Na kanyhi yo nhavivyo na hono yamutowe mu lino mwitumami wakwe we cilume hamba we cicekulu, sunga lino lyakwe libenece, hodu, komukombola yabite ku soko ye lino lyakwe.”

Vyono yiwanojeye wanya zisawo

28“Hono ng'ombe yimutowe munhu ne lihembe sunga yimuwulaje, ng'ombe yiyo nayo yiwulagwe mu nzila yo kutowa ne mabwe, ne nyama yayo yilece kuligwa yaye. Ninga munya ng'ombe yiyo, yalece kulipicizwa yaye. 29Langa hono ng'ombe yiyo yiwe yali yizowelile kutowa wanhu ne mahembe, na munya ng'ombe nayo yawe yalonjeywe zizo, nayo hamba kuyiwopa yaye, holeka hono yiwulaje munhu, ng'ombe yiyo yotowangwa ne mabwe sunga yifwe, na munya ng'ombe nayo yawulagwe nhavivilya. 30Ninga hamba nhavivyo, yuyu munya ng'ombe, hono yavumilwe yalipe malipo no kuponywa wumi wakwe, ale yalipe yiyo nghango yono womusaka yalipe. 31Nayo ng'ombe hono yimutowe mwana wa munhu yunji, ale nghani yiyi nayo yolamulilwa mu nzila yiyo du. 32Ne ng'ombe hono yimutowe ne mahembe mwitumami we cilume hamba we cicekulu, munya ng'ombe yiyo, komulipa munya mwitumami yuyo fweza makumi madatu. Ne ng'ombe yiyo nayo moyitowanga ne mabwe sunga yifwe.

33“Na munhu hono yawuse ligubicizo lye likombo, no kulileka lili mwazi, hamba lunji hono yahimbe likombo yalilece mwazi hamba kuligubiciza, na hanyuma ng'ombe lunji ndogowe yigwile mwi'kombo lilyo, 34yuyo munya likombo lilyo, kowulipa mutugo wuwo. Yimunojeye yamulipe mapesa munya mutugo, kanyhi yasole no mutugo wuwo wono wufwiye wuwe wakwe. 35Na hono ng'ombe ya yunji yiwulaje ng'ombe ya yunji, wanhu wawo, wayisole ng'ombe yiyo yono yili nyumi wayiguze, wagawane cico cifo cayo. Kanyhi wagawane sunga ne zinyama ze ng'ombe yono yifwiye. 36Ninga langa hono yiwe ng'ombe yiyo yali yizowelile kuzitowa zinyagwe ne mahembe, nayo munya ng'ombe hamba kuyiwopa ng'o, kolipa ng'ombe kwa ng'ombe, na ayilya yono yifwiye yowa yakwe.”

Currently Selected:

Wutuluce 21: LLKWW

Highlight

Compare

Copy