Wutuluce 19
19
Waisilayeli he 'tunda lya Sinayi
1Na mwizuwa lilongozi lya mu mwezi we kadatu, ku wulawa lono wawucila ku Misili, Waisilayeli wakafika mu nyika ya Sinayi. 2Nawo wali weza kuwuka ku Lefidimu no kufika mu nyika ya Sinayi, wakasita nghambi yawo mu nyika vidomile ne litunda lya Sinayi. 3Musa yakabita kwi'tunda kucanyha ho vilongane no Mulungu.
Muwaha Mulungu yakalongana na Musa ku wulawilila mumo mwi'tunda, yakamulonjela yawalonjele wawo Waisilayeli wana wa Yakobo yatye nhavi, 4“Nyenye nyo weneco mwewonelela vyono nawanoza Wamisili, kanyhi na vyono nghamudinghulenyi nha vyono 'ndi yidinghulaga vyanagwe mu mabawa gayo, nghamuletenyi sunga hono hangu. 5Holeka aluno, hono mulihulice lizi lyangu, kanyhi mwibate ne cilagane cangu, mowa muli wanhu wangu wahagulwa muli makungugo gose, hambi yinze yose nha yangu nene. 6Nanye kuli'ne mowa wutemi we wakohani, kanyhi nghungugo yono yelile.” Nazo zizi zo nghani zono kowalonjela Waisilayeli.
7Musa yakawa kuwuya kuli wanhu, yakawakonghola hamonga i wanyamhala we Waisilayeli, yakawa kuwalonjela zinghani zizo zose zono Muwaha Mulungu yamulajiliza. 8Nawo wanhu wakazivumila wose hamonga wakatya, “Zizo zose zono Muwaha Mulungu, yazilonjile, ase cozituma.” Nayo Musa yakamumanyiza Muwaha Mulungu lipitulo lilyo lye wanhu. 9Muwaha Mulungu yakamulonjela kanyhi Musa yakatya, “Ale, ane lu nokuziza mwi'vunde lizito, Waisilayeli ho wasume kuhulika 'ne lono cikulongana nagwe, nawo ho wasume kukwihuwila agwe cibitilila.” Nayo Musa yakamulonjela Muwaha Mulungu zono wanhu walonjile.
10Muwaha Mulungu yakamulonjela kanyhi Musa, yakatya, “Alu, wubite wukaweze wanhu izuwali ne mitondo. Nawo wose wanojeye wakanze vivwalo vyawo, 11ne cilawu, wose mweze mwikondelezeze lukulu. Na mwi'zuwa lilyo lye kadatu, nane no Muwaha Mulungu, notima mucanyha ye litunda lya Sinayi ha meso ge wanhu wose. 12Ninga wuwawicile wanhu mupaka, wupilimye litunda lyose. Kanyhi wuwasugule vyono, walecele lukulu kubita kwi'tunda kucanyha, hamba kupamiza mupaka wayo. No munhu wo wose mono kokwijelela du yalipamize litunda, ale munhu yuyo kowulagwa. 13Kanyhi wulanjilile, munhu yunji muli nyenye yalece kumupamiza munhu yuyo lono yakuwulagwa, langa munhu yuyo yawulagwe mu nzila yo kutowangwa ne mabwe, hamba kugumwa na songa, hono yawe munhu hamba yiwe mutugo. Kolo ndulele yalila cidaha, ale wanhu wose wekongholelaje hamonga behi ne litunda.”
14Nayo Musa yakawa kutima ku wulawa mwi'tunda mucanyha, yakawa kuwabitila wanhu, yakaweza, nawo wose wakavikanza vivwalo vyawo. 15Hanyuma yakawalonjela yakatya, “Alu, icilawu, wose mweze mwekondelezeza lukulu, munhu wo wose yalece kumwejelela mucekulu.”
16Ale, wali weza kwela mwizuwa lye kadatu hakali mitondo, likaza livunde yizito hacanyha ye litunda, hamonga ne mabalalusi ne mamuli. Kanyhi likahulikwa lizi yiwaha lya ndulele, lyono lizozize muno muno, no wuzoze wayo, wukawogofya wanhu wose wa mu nghambi, sunga wose wakacicima muno. 17Baho Musa yakawa kuwatonga wanhu wose mu wulawa mu nghambi, wakawa kubita ho waketang'anile no Mulungu. Nawo wose wakabita wakekongholela hasi ye litunda.
18Nalyo litunda lya Sinayi likawa yigubikwe ne malyosi, hambi Muwaha Mulungu nha yatima mucanyha yalyo ko moto. Ne lyosi lyo moto wuwo likabita kucanyha muno nha lyosi lye 'kozo yiwaha muno. Sunga ne litunda lyose likacicima muno muno. 19Nalyo lizi lye ndulele likacila kuzoza muno, nayo Musa yakawa kuduwana no Mulungu. Nayo Mulungu yakamupitulila Musa mumo mwi'balalusi.
20Muwaha Mulungu yakatima mucanyha ye litunda lya Sinayi, yakamucema Musa ku wulawa kuko kucanyha, nayo Musa yakawa kubita kuko kwi'tunda kucanyha. 21Hanyuma Muwaha Mulungu yakamulonjela Musa yakatya, “Alu, wutime hasi ye litunda, wukawasugule wanhu wose vyono walecele lukulu kunanga, na hono wananje du wenji wofwa. 22Nawo wakohani wono wasejelelaga behi nane, nawo yiwanojeye weyeze, hono si nhavivyo, ane nowalipiciza.” 23Nayo Musa yakamupitula Muwaha Mulungu yakatya, “Wanhu awa, hamba si wosuma kubita kwi'tunda lya Sinayi kucanyha, hambi nha gwegwe go mweneco mono wacilajiliza wukatya, ‘Muwicile mupaka wono wolipilima litunda lyose kanyhi mulyeze.’ ” 24Nayo Muwaha Mulungu yakamutya Musa, “Ale, wutime hasi ye litunda, wubite wukamulete Haluni, ninga langa wulanjilile, wulece kuwakombola wakohani, hamba wanhu wanji, walece kwijelela kuza kono kwangu, hono si nhavivyo, ane nowalipiciza.” 25Nayo Musa yakawa kutima mwi'tunda, yakawa kuwaloloseza wanhu zinghani zose zono Mulungu yali yamulajilize.
Currently Selected:
Wutuluce 19: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
