Wutuluce 15

Lwimbo lwa Musa

1Nayo Musa hamonga ne Waisilayeli, baho wakamwimbila Muwaha Mulungu lwimbo aluno:

“Nomwimbila Muwaha Mulungu,

hambi nha yasuma ko lukumyo,

zifwalasi hamonga ne wajendela mu zifwalasi wayo,

kawongomezeza wose mwi'lenga.

2Muwaha Mulungu vyo vilungo vyangu,

kanyhi lo lwimbo lwangu,

nayo mweneco yo mhonelo yangu.

Nayo yo Mulungu wangu,

nane nomulumba,

yo Mulungu wo sogo yangu, nane nomukumya.

3Muwaha Mulungu yo we vilungo mu milewo,

Muwaha Mulungu, lye 'tagwa lyakwe.

4“Mituka yo wulugu, hamonga ne

lipuga lyose lya Falawo,

Muwaha Mulungu kavyongomezeza vyose mwi'lenga.

Ne wetumami wakwe watambule,

wafwila wose mwi'lenga lya Shamu.

5Visolo vye malenga viwagubiza,

wavulumucila mwi'lenga kotya yibwe.

6“Muwoko wako wo kulume 'gwe Muwaha Mulungu,

wo we nhojo mu vilungo.

No muwoko wako wo kulume 'gwe go Muwaha Mulungu,

wukuwa kuwatijinha walugu.

7Nagwe ko wuwaha wako wo wizine,

kuwongomezaga wose wono wakukupingapinga,

kuwaputilaga wukali wako,

wuwa kuwaticimiza kotya mabeleje makavu.

8Na ku soko yo wehele wa mu mhula yako,

malenga gakelundika hamonga.

Nago mawingo gakema wima kotya yijinji,

ne visolo navyo vikajima mwi'lenga mugati.

9Nayo mulugu yakeyitya, ‘Nowalonda nghawebate,

nane nozigawa zisawo zawo,

kanyhi nosola mu nghango yono nghuyisaka nene.

Nane nowukwega mumaje wangu,

na ko muwoko wangu, nowongomeza wose.’

10Ninga 'gwe, wukaputa ne mbeho yako

nalyo lilenga likawagubiza wose.

Nawo wakadodomela mu malenga kotya lisasi.

11“Gwe go Muwaha Mulungu,

Alo nani 'mbi mono yehwanile gwegwe

mu milungu yose?

Hamba nani mono yehwanile

gwegwe go Muwaha Mulungu mono Welile,

mono wukogofya so mapoto gako,

ne milimo yako ye vilungo no wizine?

12Nagwe wagolola muwoko wako wo kulume,

nayo yisi yikawamela walugu.

13“Kanyhi na ko wihuwilwa wako wuwaha,

wukawatonga wanhu wono wawakomboza,

na kwe vilungo vyako,

wukawatonga ku wikalo wako wono welile.

14I wanhu wakahulika,

wakacicima ko woga wuwaha,

nawo Wafilisiti wakwibatwa no woga wuwaha.

15Ne wawaha wa ku Edomu,

nawo wakwinjilwa no woga wuwaha.

Nawo walongola wa ku Mowabu

wakwibatwa no woga wuwaha,

hamonga no wucicime, ne wekala ku Kanani

wose vilungo vyawo vyamalika.

16Wogofye no woga, vyawagana,

ku soko yo wuwaha we vilungo vyako,

nawo wanyamala twii kotya yibwe,

sunga wanhu wako kolo wapuluta

wakondya, 'gwe go Muwaha Mulungu,

heya, sunga wanhu wako wono wawakomboza,

wakondya kupuluta.

17Agwe kowaleta wanhu wako,

wuwahadice mwi'tunda lyako,

i hanhu hono wehagulila,

go mweneco go Muwaha Mulungu,

ho hawe wo wikalo wako.

Bahalya hono helile hono wezenjela

kwe miwoko yako 'gwe go Muwaha Mulungu.

18Gwegwe, agwe go Muwaha Mulungu

kotema cibitilila ne cibitilila.”

Lwimbo lwa Milyamu

19Waisilayeli wakalowoka lilenga hakavu, ninga mituka yo wulugu ye Wamisili ne zifwalasi zawo, hamonga ne wajendela mu zifwalasi, wali weza kwinjila mwi'lenga, u Muwaha Mulungu yakagagomoleza malenga hamonga, nago malenga gakawagubiza wose. 20Nayo Milyamu u muwizi we cicekulu, u lumbulye wa Haluni, yakawa kusola ng'oma. Ne wacekulu wanji wose, nawo wakawa kumutyatya wena ne zing'oma zawo akuno wakuvina. 21Nayo Milyamu yakawatonga no lwimbo alu yakutya,

“Ale mwimbilenyi Muwaha Mulungu,

hambi nha kasuma ko lukumyo luwaha,

fwalasi hamonga no mujendela mu fwalasi wayo,

yakawagwiliza mwi'lenga.”

Malenga makali

22Hanyuma Musa yakawatonga Waisilayeli ku wulawa kwi 'lenga lya Shamu, wakabita sunga ko ku nyika ya Shuli. Nawo wajenda vilo vidatu mu nyika hamba kuwona malenga yaye. 23Wali weza kufika hanhu hono hakucemwa Mala, hamba si wasuma kugang'wa malenga ga baho ha Mala, hambi nha gali makali. Na ku soko yiyo i hanhu baho hakacemwa Mala. 24Ne wanhu wose wakamung'ung'ulicila Musa wakutya, “Alu Musa, cong'wa cici?” 25Nayo Musa yakamulomba ko winenenyhezi Muwaha Mulungu, nayo Muwaha Mulungu yakamulajila Musa cibici. Musa yakacigwiliza mu malenga, nago malenga gakawa maswanu ku wung'we.

Nayo Muwaha Mulungu kuko yakawapela Waisilayeli lilajilizo hamonga no wulajilize, yakawajela ho yamanye wusikame wawo. 26Yakawalonjela yakatya, “Hono mbeka mulihulice lizi lyangu ane no Muwaha Mulungu, no Mulungu wenyu, mwitume zono zili ling'ani hali'ne, na kanyhi hono muwukamise no wulajilize wangu, hamonga ne malajilizo gangu, ale, nane si nomugumililenyi matamwa gagalya gono nawagumilila Wamisili yaye. Hambi ane nha yo nene Muwaha Mulungu mono nghumuponyenyi.” 27Hanyuma Waisilayeli wakafika ku Elimu, hanhu hono hali ho yili mivwilo yikumi na myejete ye malenga, hamonga ne mitende makumi mupunghati. Nawo wakasita nghambi yawo baho behi ne malenga.

Currently Selected:

Wutuluce 15: LLKWW

Highlight

Compare

Copy