Wutuluce 14
14
Wulowoce we lilenga lya Shamu
1Muwaha Mulungu yakamulonjela kanyhi Musa yakatya, 2“Walonjele Waisilayeli wawuye ne nyuma, mukasite nghambi yenyu, muwe mwidomile na Pi-hahiloti, hagati ya Migidodi ne lilenga lya Shamu, behi na Baali-zefoni. 3Nayo mutemi Falawo kokwihwesa vyono Waisilayeli wajililwa nzila, alu weza wakuyumbayumba du mu'si, nyika yawadindila. 4Nane nomunoza Falawo yawe yasina cihuliko, nayo komulondenyi, na kolo yakumutyatyenyi, nane nomongomeza hamonga ne lipuga lyakwe lyose. Nayo Falawo ne wanhu wakwe ho womanya vyono ane nili vilungo. Ne Wamisili ho womanya vyono, ‘Ane yo nene Muwaha Mulungu.’ ” Nawo Waisilayeli wakanoza nha vyono walonjelwa.
5Nayo Falawo mutemi wa Misili yali yeza kulonjelwa nha vyono wanhu wakondya kutiza, mwene hamonga ne wetumami wakwe, mahweso gawo kanyhi gakapituka wakawa kutya, “Alu mwene 'nye, nghanici yiyi yono citumile? Cawaleceleza Waisilayeli watiza, nase cakondya kuwajiliza lu wawanda wetu!” 6Hodu mutemi Falawo yakawa kuwikaniza mutuka wakwe wo wulugu, hamonga ne lipuga lyakwe. 7Yakawa kutuluka hamonga ne mituka yakwe yose yo wulugu, hamonga ne mituka yinji yo wulugu magana mutandatu i miswanu, yali yo ye wetumami wakwe. 8Nayo Muwaha Mulungu yakamunoza mutemi Falawo yawe yasina cihuliko, yakawalonda Waisilayeli, hambi nha wawuka kwa cisumisumi mu yisi ya Misili. 9Nalyo lipuga lye Wamisili, hamonga ne zifwalasi, ne mituka yo wulugu ne wadeleva wose, wakawa kuwalonda mu nyuma Waisilayeli. Wakawagana hanhu hono wali wasitile nghambi yawo ha mwande ye lilenga lya Shamu behi na Pi-hahiloti na Baali-zefoni.
10Nawo Waisilayeli wali weza kumuwona mutemi Falawo hamonga ne lipuga lyakwe wakuwaziza, wakenjilwa na woga wuwaha muno muno, wakawa kumulilila Muwaha Mulungu yawataze. 11Wakamulonjela Musa wakatya, “Mwene 'gwe Musa, kuko ku Misili kwali kusina vitenjelo? Hamba kucisola wucilete ahano ho cifwile mono nyika? Alu wulanje ta, yo ya hayi lu yono witumile, yo kuciwusiza ku Misili! 12Wule, ase si cakulonjela lono cikali hamba sinatuluka ku Misili, vyono zizi si zoleka kwijela? Kanyhi ase cakulonjela vyono, wucilekaje cijendelele kuwetumamila Wamisili. Yali yiwe yili ciba cijendelele kuwetumamila Wamisili, si nho kufwila mono nyika.”
13Nayo Musa yakawapitula yakawatya, “Nye, wayangu, mulece kogopa ye! Mwime mukamile, nanye mowona vyono Muwaha Mulungu komuponyenyi izuwali. Nanye hamba si mowawonela lukulu kanyhi Wamisili wawa wono mukuwawona izuwali. 14Muwaha Mulungu mweneco yo komulewelenyi, nanye mowa munyamaye twii, hamba kunoza cinji yaye.”
15Muwaha Mulungu yakamulonjela Musa yakatya, “Alo nhawule wukundilila 'ne, wukulondola wutazi? Walonjele wanhu wajendelele ku mwande. 16Ale, winule nghome yako mucanyha ye lilenga, nago malenga gokwitemanula hejete, nawo Waisilayeli wosuma kukola hakavu, ha ciligati ye lilenga. 17Nane nowanoza Wamisili wawe wasina cihuliko. Nawo wowatyatya Waisilayeli mu nyuma yawo mwi'lenga, nane nogagomoleza malenga, niwagubize Wamisili. Baho ho nokwitujila lilumbo yiwaha muno, kolo nakondya kuwongomeza Falawo, ne lipuga lyakwe, ne matuka gakwe go wulugu, hamonga ne wajendela mu zifwalasi wakwe. 18Nane kolo nawasuma Wamisili, nawo ho womanya vyono, ‘Ane yo nene Muwaha Mulungu.’ ”
19Nayo malayika wo Mulungu mono yawatongaga lipuga lye Waisilayeli, yakawuka ku mwande yawo, yakabita mu nyuma yawo. Nalyo livunde lyono lipalinjile kotya yisumbili, likawuka ku mwande yawo, likabita ku nyuma, 20likawa hagati ye Wamisili ne Waisilayeli. Nalyo livunde likawapela citi Wamisili, ninga Waisilayeli, likawamulicila ne cilo. Holeka mapuga gago mejete lipuga lya Falawo ne lipuga lye Waisilayeli, si gasuma kwisejelela cilo cose sunga wusiku wukela.
21Musa yakawugolola muwoko wakwe mucanyha ye lilenga, nayo Muwaha Mulungu yakalikunya lilenga cilo cose ne mbeho mbaha ya kucilima. Mbeho yiyo yakukunza cilo cose sunga wukela, yikalitemanula lilenga hejete, ne yisi nghavu yikawa kwijela. 22Nawo Waisilayeli wakakola hakavu hagati ye lilenga, ne majinji ge malenga gakawa gemile ku lubavu lwawo lo kulume no lubavu lo kucekulu. 23Nawo Wamisili wakawatyatya Waisilayeli mu nyuma yawo, wakenjila nhavivilya mwi'lenga hamonga ne zifwalasi zawo, ne mituka yawo yo wulugu, hamonga ne wajendela mu zifwalasi wawo wose. 24Wusiku wali weza kuwa wuli behi no kwelelecela, Muwaha Mulungu yakalilanga lipuga lye Wamisili ku wulawilila mwi'vunde lyo moto lyono lipalinjile kotya nhe lisumbili, yakawatajila Wamisili woga wuwaha muno muno. 25Muwaha Mulungu yakagadodomeza mu nhope matuka gawo go wulugu, na ku soko yiyo wakajenda ko wugaye wuwaha. Sunga nhondo wakawa kutya, “Nye, alenyi citize ha mwande ye wanhu wawa Waisilayeli, hambi Muwaha Mulungu nha yali ku lubavu lwawo yakuwalewela.”
26Kanyhi Muwaha Mulungu yakamulonjela Musa yakatya, “Wugolole muwoko wako mwi'lenga, nago malenga gowuya hamonga gawagubize Wamisili, hamonga ne matuka gawo go wulugu, hamonga ne wajendela mu zifwalasi wawo.” 27Musa yakagolola muwoko wakwe mucanyha ye lilenga, na lono wali weza kwelelecela, malenga gakawa kuwuya hamonga. Nawo Wamisili wakajela muno muno wagatize malenga, ninga Muwaha Mulungu yakawongomezeza wose mwi'lenga mugati. 28Nago malenga gakawuya hamonga, gakayigubiza mituka yo wulugu, ne wajendela mu zifwalasi, hamonga ne lipuga lyose lya Falawo lyono lyawatyatyaga Waisilayeli, na wose wakafwila mugati mwi'lenga. Si yapona hamba monga bwete. 29Ninga Waisilayeli wapuluta hakavu hagati ye lilenga, lono malenga gali gemile kotya majinji ku lubavu lwawo lo kulume no lubavu lo kucekulu.
30Nhavivi vyo Muwaha Mulungu yawaponya Waisilayeli mwizuwa lilyo, mu miwoko ye Wamisili. Waisilayeli wakawawona Wamisili walambalaye mu nhumbi ye lilenga wafwiye. 31Nawo Waisilayeli wali weza kuliwona litumo lilyo lyo wizine, lyono yetumile Muwaha Mulungu kuli Wamisili, nhondo nawo wakawa na cogopo kuli Muwaha Mulungu. Wakamwihuwila Muwaha Mulungu, hamonga na Musa mwitumami wakwe.
Currently Selected:
Wutuluce 14: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
