Wutuluce 16

Ndigwa yono yikucemwa Mana hamonga na Nghwale

1Imhuga yose ye Waisilayeli, wakatuluka wakafika mu nyika ya Sini, hagati ya Elimu na Sinayi. Ali lyali lizuwa lye likumi ne hano lya mu mwezi we kejete, wulawa lono wali wawuka mu yisi ya Misili. 2Baho mhuga yose ye Waisilayeli wakamung'ung'ulicila Musa na Haluni. 3Wakatya, “Si ciba le Muwaha Mulungu yali yaciwulajile ku yisi ya Misili, kono cali cikaye ne masefuliya gamemile nyama ne mikate, nase calizaga nha vyono casakaga sunga ciguta. Alu mulanje ta, anye mwacileta amuno mono nyika, ho muciwulaje ne nzala.”

4Muwaha Mulungu yakamulonjela Musa yakatya, “Alu, ane nomulagazizenyi mikate kulawa ku wulanga. Nawo wanhu wolawila no kutondola nhondo zose ndigwa yono yikwiliye lizuwa lilyo limonga du. Na mu nzila yiyi, nane ho nosuma kuwona hono wowutyatya wulajilize wangu. 5Langa mwi'zuwa lyo mutandatu, wotondola ndigwa nyinji kali kejete ya mu zindigwa ze nhondo yose.”

6Nawo Musa na Haluni wakawalonjela Waisilayeli wakatya, “Zuwalili cinyamihe ho momanyila vyono, Muwaha Mulungu yo mwene mono yamuwusenyi mu yisi ya Misili. 7Kanyhi mitondo hakali mitondo moluwona lukumyo lo Muwaha Mulungu, hambi nha kakondya kuwuhulika wung'ung'ulice wenyu wono mukumung'ung'ulicila. Ase 'mbi cili wanani ho mucing'ung'ulicile? Ase cikutyatya zono mwene yakucilajiliza du.” 8Musa yakatya kanyhi, “Muwaha Mulungu, i cinyamihe, komupelenyi nyama, na hakali mitondo komupelenyi mikate ho mulye mwigute, hambi mwene Muwaha Mulungu nha kakondya kuwuhulika wung'ung'ulice wenyu, wono mukumung'ung'ulicila. Ase 'mbi cili wanani ho mucing'ung'ulicile? Hono mukucing'ung'ulicila ase, mumanye vyono mukumung'ung'ulicila Muwaha Mulungu.”

9Musa yakawa kumulonjela Haluni yakamutya, “Gwe Haluni, wuwatezaje mhuga yose ye Waisilayeli, wekongholele hali Muwaha Mulungu, hambi nha kawuhulika wung'ung'ulice wenyu wono mukumung'ung'ulicila.” 10Nayo Haluni lono yalongaga ne mhuga ye Waisilayeli, wakalanga wose ku lubavu lwa ku nyika, hobaho lukumyo lo Muwaha Mulungu, lukejela mu mavunde. 11Nayo Muwaha Mulungu yakamulonjela Musa yakamutya, 12“Nghondya kuwuhulika wung'ung'ulice we Waisilayeli. Alu wulongane nawo wuwatye vyono, mu madaha ge cinyamihe, wolya nyama, na hakali mitondo wolya mukate. Nawo ho womanya vyono, Ane yo nene Muwaha Mulungu, u Mulungu wenyu.”

13Nayo yikawa mu madaha ge cinyamihe, zikaza nghwale nyinji, zikamema mu nghambi yose ye Waisilayeli. Na hakali mitondo, buhe yikagwa yikatandala mu behi behi ye nghambi yawo. 14Ne buhe yiyo, lono yawukaga kuko ku nyika, hasi cikasigala cinhu cono cali cinha mukate mupelupelu. 15Nawo Waisilayeli wali weza kuwona wakezina muno muno hambi nha si wamanya vyono cali cinhuci, holeka wakawa kwiwuza wakutya, “Alu nye, cicici cene ci?”

Nayo Musa yakawalonjela yakatya, “Ayino yo ndigwa yono mupejigwe no Muwaha Mulungu ho mulye. 16No Muwaha Mulungu kalajiliza mutondole ndigwa ayi, ha nghango du yono munhu kosuma kulya. Mutondole mu nghango ye cipimo ca munhu likopo limonga limonga kuli wanhu wose wono wekaye mwi'hema lyenyu.”

17Nawo Waisilayeli wakanoza nhavivyo. Na yikawa lono watondolaga, wanji wakatondola nyinji, na wanji nyhefu. 18Ninga wali weza kuyipima wose mwi'kopo, wakagana vyono mono yatondola nyinji si yasigaza yaye, nayo mono yatondola nyhefu hamba si yanjiza ng'o. Nawo wose wakatondola munhu ha nghango yo wulye wakwe. 19Musa yakawalonjela kanyhi Waisilayeli yakatya, “Munhu wo wose yalece kusigaza ndigwa yigone sunga hakali mitondo.”

20Ninga wanhu hamba si wamuhulika Musa. Wanji wa muli wene wasigaza ndigwa sunga hakali mitondo. Na hakali mitondo, i ndigwa yiyo yikawa yakondya kuwola no kuwicila mang'onyo. Nayo Musa yakawakolelwa likuwo muno muno wanhu. 21Nhondo ku wulawa baho, yikawa nhondo zose hakali mitondo, watondolaga du ndigwa yono munhu yasuma kuyilya no kuyimala. Ne lizuwa lyali lyeza kuwalika, no kukalipa, hodu ndigwa yiyilya yikenjeduka.

22Na mwizuwa lyo mutandatu, Waisilayeli watondola ndigwa yiyo nyinji ya nghanghulo nyejete, watondola ndigwa ya munhu monga makopo mane. Ne wanyamhala wose wa mu mhuga ye Waisilayeli, wamubitila Musa, wakamulonjela nghani yiyi. 23Nayo Musa yakawalonjela yakatya, “Awu wo wulajilize wo Muwaha Mulungu. Imitondo lyo lizuwa lyono lyelile lyo kuceha. Ne mitondo lyo lizuwa lye Sabato yo Muwaha Mulungu. Holeka mubite mukatelece, hamba muhemuse ndigwa yiyo mu nghango yono mukuyisaka izuwali, ne ndigwa yono yosigala, muyiwice sunga mitondo.” 24Nawo wakanoza nha vyono Musa yawalonjela, wakasigaza ndigwa yinji so mitondo yaco. Nawo wali weza kwela hakali mitondo, wakayiwona ndigwa yiyilya vyo swanu du, si yawola hamba kwinjilwa na mang'onyo yaye. 25Nayo Musa yakawalonjela yakatya, “Ale mulize ndigwa yiyo yono yisigaye, hambi izuwali nha yo Sabato yo Muwaha Mulungu. Hambi izuwali nha si moyiwona ndigwa mu nyika. 26Hamby nha munojeye mutondole ndigwa mu vilo mutandatu du, ninga mwizuwa lyo mupunghati, mwizuwa lyo wucehe, ndigwa yowa hasina.”

27Na mwi'zuwa lilyo lyo mupunghati, wanhu wanji wakabita ku wulondola ndigwa, ninga hamba si wayituga yaye. 28Nayo Muwaha Mulungu yakamulonjela Musa yakatya, “Alo sunga nili, mojendelela kulema kugebata malajilizo no wulajilize wangu? 29Ninga mumanye vyono, yo nene Muwaha Mulungu mono nimupelenyi lizuwa lilyo lye Sabato, na yo soko yono yikuleka nomupelenyi ndigwa ye vilo vyejete mwi'zuwa lyo mutandatu. No munhu wo wose, yimunojeye yekale baho du hono ho yuli, mwi'zuwa lilyo lye Sabato, yalece kuwuka mu kaya yakwe.” 30Holeka mwizuwa lyo mupunghati, wanhu si wetuma mulimo wunji, langa waceha du.

31Nawo Waisilayeli wakayicema ndigwa yiyo “Mana.” Nayo yali yihwanile kotya mbeyu yo wuhemba wo lugugu, no muzinzi wayo wali winha nha wo mukate mupelupelu mubace wuci. 32Nayo Musa yakawalonjela Waisilayeli yakatya, “Muwaha Mulungu kalajiliza katya, cisigaze Mana yinji, cipimo ce kopo limonga, ciyiwice, waze wayiwone we zindelo zetu zose. Nazo zindelo zetu waze wawone ndigwa yono Mulungu yacilisa mu nyika, lono yaciwusiza mu yisi ya Misili.”

33Musa yakamulonjela Haluni yakatya, “Ale, sole ciya wutajile Mana yikopo limonga, wuyiwice hali Muwaha Mulungu, ho yiwe so zindelo zetu zono zikuza.” 34Nayo Haluni yakayiwika yiyo Mana, Hanhu hono helile, mugati ye Lisanduku lye Cilagane, yikale mumo. 35Waisilayeli wayilya yiyo mana mu myaka makumi mane, sunga wakafika mu yisi ya Kanani. 36(Likopo limonga likwinjila lita makumi mejete.)

Currently Selected:

Wutuluce 16: LLKWW

Highlight

Compare

Copy