Wutuluce 11

Musa yakulonga zo wufwe wo Mwana we cilume mulongozi kulelwa

1Muwaha Mulungu yakamulonjela Musa yakatya, “Alu lisigaye lipoto limonga du, lyono nomuletela mutemi Falawo wa Misili hamonga ne wanhu wakwe. Na mwi'poto lilyo, Falawo komukombolenyi mubite. Na mbeka komuwinjilenyi lukulu wose muwuce mu yisi yakwe. 2Alu, wuwalonjelaje wana wa Isilayeli, wawalonjele we cikalani wayawo, walete wihambo wa fweza no wihambo we zahabu.” 3Nayo Muwaha Mulungu yakawapela Waisilayeli wendezwe kuli Wamisili. Nayo yili mbeka, vyono wetumami wo mutemi, hamonga ne wanhu wose wa Misili, wamuwonaga Musa nha vyono munhu muwaha mu yisi ya Misili.

4Musa yakamulonjela mutemi Falawo yakatya, “Muwaha Mulungu yakutya nhavi, ‘Mu cilo mugati, ane nokola mu yisi yose ya Misili. 5Ne wana we cilume walongozi kulelwa, wose wofwa. Ku wulawilila mwana we cilume wa Falawo, u mwana mono kowa yo muhazi wakwe wo wutemi, sunga ko mwana we cilume mulongozi kulelwa wo mwitumami we cicekulu mono yakusaga wuhemba. Sunga ne zinyana zose zinongozi kulelwa ze mitugo, nazo nhavivilya zofwa. 6Na mowa na cililo ciwaha muno muno mu yisi yose ya Misili, cililo cono cikali si nejela hamba nhavi ku wulawa katali, hamba si cilejela kanyhi yaye. 7Ninga hasina hamba libwa lyono lyowafwemela Waisilayeli, hamba mitugo zawo. Nagwe baho ho komanyila vyono, Ane no Muwaha Mulungu, yo nene mono nozize wisimajile hagati ye Wamisili ne Waisilayeli.’ ” 8Nayo Musa yakamalila wulonje wakwe yakatya, “Gwe Falawo, wetumami wako wose wonyiziza wafugamile, akuno wakunena niwasole wanhu wangu mbite nawo. Hanyuma ya zizo, nane ho notuluka.” Hodu Musa yakawa kuwuka hali Falawo akuno yakoligwe ne likuwo yiwaha.

9Ninga Muwaha Mulungu, yali yakondya kumulonjela Musa, vyono, Falawo kojendelela kuwa yasina cihuliko, nane ho sume kunoza mapoto gangu mu yisi ya Misili. 10Nawo Musa na Haluni wakaganoza mapoto gago gose hali Falawo. Ninga Muwaha Mulungu, yakamunoza Falawo yawe yasina cihuliko. Holeka Falawo hamba si yawakombola Waisilayeli wawuce mu yisi yakwe.

Currently Selected:

Wutuluce 11: LLKWW

Highlight

Compare

Copy