Wutuluce 10

Ligazo lyo munana

Nzije

1Muwaha Mulungu, yakamulonjela Musa kanyhi yakatya, “Ale, wubite mukewone na Falawo. Hambi nha namunoza mwene hamonga ne wetumami wakwe wawe wasina cihuliko, nane ho sume kuganoza mapoto gaga gose hali wene. 2Nagwe ho wuwe na co kuwalonjela wanago hamonga ne wezukuluwo vyono nawanoza Wamisili lono nanozeza mapoto gangu muli wene. Nanye wose ho momanya vyono ane yo nene nili Muwaha Mulungu.”

3Nawo Musa na Haluni wakamubitila mutemi Falawo wakamulonjela wakatya, “U Muwaha Mulungu, u Mulungu we Wahebelaniya, yakutya nhavi, ‘Alu kojendelela kuwa wusina cihuliko kuli'ne sunga nili? Wuwakombole wanhu wangu wabite, ho wakahembe nene. 4Na hono wujendelele kuwalemeza, ale, nane nokuletela nzije mitondo mu yisi yako. 5Nazo nzije zizo zowa nyinji muno muno, zotandala mu yisi yose, zolya vinhu vyose vyono vyasigala vyono si vyahodangwa ne mvula ye mabwe, hamonga ne mibici yose yono yisigaye. 6Nazo nzije zizo, zomema mu zikaya zako, hamonga na mu zikaya zose ze wetumami wako, na mu zikaya zose ze wanhu wako, mu yisi yose ya Misili. Nazo nzije zizo, zowa cinhu cibi muno cono ne walezi wako, hamba wakukuzo, wali wakali naciwona ku wulawa katali sunga nalu.’ ” Hodu Musa yakawa kuwuka hali Falawo.

7Nawo wetumami wa Falawo wakamulonjela Falawo wakutya, “Alu mwene u munhu yuyu kojendelela kucipela magazo sunga nili ta? Ale wuwakombole Waisilayeli wabite le, ho wamuhembe Muwaha Mulungu, u Mulungu wawo. Alo mwene si wukuwona lu vyono yisi ya Misili yeza kongomela?” 8Holeka Musa na Haluni wakaletwa kanyhi kuli mutemi Falawo. Nayo Falawo yakawalonjela yakatya, “Ale mosuma kubita mukamuhembe Muwaha Mulungu, u Mulungu wenyu. Ninga lu wa nani 'mbi wono wosuma kubita?” 9Nayo Musa yakapitula yakatya, “Wanhu wose cobita hamonga ne wana wetu, hamonga ne wakombi. Nase cosoleleza hamonga ne wana wetu we cilume na we cicekulu, hamonga ne zingholo ne zimhene, ne zing'ombe zetu. Hambi nha yicinojeye cimunozeze Muwaha Mulungu lizuwa yiwaha lyo kumukumya.”

10Nayo mutemi Falawo yakapitula mu nzila yo kuwabedula yakatya, “Nane nghwilahiza hali Muwaha Mulungu, vyono si nosuma kumukombolenyi mubite hamonga ne wacekulu ne wana! Hambi nha yili calinze vyono, anye mwina wuhile wubi mu zinhumbula zenyu. 11Holeka si yosumika yaye! Langa wabite walume du wo wakamuhembe Muwaha Mulungu, hono wuwo wo wuhile wenyu.” Na ku soko yiyo, Musa na Haluni wakawingwa wawuce hali Falawo.

12Hanyuma kanyhi Muwaha Mulungu yakamulonjela Musa yakatya, “Wugolole muwoko wako mu yisi ya Misili, wulete nzije. Nazo zokuza zilye vilimwa vyose vyono vikuwiluka, vilimwa vyose vyono vyasigala, vyono mvula ye mabwe si yavihodanga yaye.” 13Nayo Musa yakanyasula nghome yakwe, nayo Muwaha Mulungu yakaleta mbeho mbaha muno muno ku wulawilila ku cilima, yikajendelela kuputa mu yisi yose, mwi'zuwa lililya lyose sunga na mu cilo cose. Nawo wali weza kwela hakali mitondo, yikawa yaleta nzije nyinji. 14Nzije zikaza mawumbi na mawumbi, nazo zikawa kwiyagala no kumata mu yisi yose ya Misili. Nalyo lyali lye 'wumbi liwaha muno muno lya nzije lyono lyali likali nejela hamba hadodo ku wulawa katali na katali. Hamba si lyolokwijela kanyhi na mu vilo vyono vikuza. 15Nazo zikayigubika yisi yose, sunga ne yisi yose yikatukuwikwa ku soko yo winji we zinzije. Zikalya vinhu vyose vyono vyasigala, vyono si vyahodangwa ne mvula ye mabwe, hamonga ne mikalo yose yono yili mu mibici. Hamba si zasigaza cinji co cose cono cili dedede ca mu mibici mucanyha, hamba vihadikwa vyovyose vya mu migunda vya mu yisi yose ya Misili.

16Ale baho, mutemi Falawo yakawa kuwacema mbela mbela Musa na Haluni, yakawa kuwalonjela yakutya, “Ane nimusutizya Muwaha Mulungu, u Mulungu wenyu, sunga na kuli nyenye nhavivyo. 17Holeka nghunena, alu munenele wubi wangu wuwu, kanyhi mumulombe Muwaha Mulungu, u Mulungu wenyu, yambusize wulipicizwe wu wuno wuwaha muno.” 18Nayo Musa yakawuka hali Falawo, yakamulomba Muwaha Mulungu. 19Nayo Muwaha Mulungu yakayipitula mbeho ya kucilima, yakaleta mbeho mbaha muno muno yono yikulawa kumwezi. Mbeho yiyo yikazipemhelusiza zinzije zose mwi'lenga lya Shamu. Siyasigala nzije hamba monga mu yisi yose ya Misili. 20Ninga hamba nhavivyo, Muwaha Mulungu yakamunoza Falawo yawe yisina cihuliko. Holeka hamba si yawakombola Waisilayeli wabite ng'o.

Ligazo lye licenda

Citi

21Muwaha Mulungu yakamulonjela Musa kanyhi yakatya, “Alu, wugolole muwoko wako kucanyha, naco citi cokuza, coyigubika yisi yose ya Misili.” 22Musa yakawugolola muwoko wakwe kucanyha. Cikawa kuza citi ciwaha muno muno mu yisi yose ya Misili, cikawa citi kwa vilo vidatu. 23Sunga ne Wamisili hamba si wasumaga kwiwona munhu na muyagwe. Na mwipango lilyo lye citi, hasina munhu hamba monga mono yasuma kuwuka mu nyumba yakwe. Ninga kono wekalaga Waisilayeli, ako kwali kowuli du wuzelu.

24Mutemi Falawo yakamucema Musa yakamulonjela yakatya, “Alu langa, mosuma kubita hamonga ne wacekulu ne wana wenyu, mukamuhembe Muwaha Mulungu. Ninga langa mulece kusoleleza hamonga ne zingholo, na zimhene, sunga ne zing'ombe zenyu, azo zosigala bahano du.”

25Nayo Musa yakamupitula yakatya, “Ninga hamba nhavivyo, yikunojeye wucipele mitugo so makumbiko hamonga ne vilavywa vinyanywe, cikamulavizye Muwaha Mulungu, u Mulungu wetu. 26Holeka ase cosoleleza hamonga ne mitugo zetu, si yosigala hamba monga kono nyuma. Kanyhi ase yo sese mono cinojeye ciyisiwanulile co weneco, mitugo yono yinojeye ciyitumamile, mu wuhemba Muwaha Mulungu, u Mulungu wetu. Kanyhi alu, hamba si cosuma kumanya mutugo wa hayi wono comulavizya Muwaha Mulungu langa sunga kolo cafika kuko.”

27Ninga Muwaha Mulungu yakamunoza Falawo, yakawa yasina cihuliko. Nayo yakalemela lukulu kuwakombola Waisilayeli wabite. 28Falawo yakamulonjela Musa yakatya, “Gwe Musa, wuce lulu baha ha mwande yangu! Si nghusacila lukulu kukuwona kanyhi ha meso gangu! Na hono nize nghuwone kanyhi ha meso gangu, hodu kofwa!” 29Nayo Musa yakamupitula yakatya, “Ale viswanu, nane hamba si nolokuwonela lukulu kanyhi wusu wako.”

Currently Selected:

Wutuluce 10: LLKWW

Highlight

Compare

Copy