Wutuluce 12
12
Pasaka
1Muwaha Mulungu yakawalonjela Musa na Haluni lono wali wakali kuko ku Misili yakatya, 2“Ale, u mwezi wu wuno, wo wowa wo mwezi wenyu mulongozi mu mwaka. 3Holeka muwalonjele we mhuga yose ye Waisilayeli, vyono mwi'zuwa lye likumi lyo mwezi wuwu, yinojeye munhu wo wose muli'nye, yasole nyana ye ngholo hamba nyana ye mhene so we mhuga yakwe. 4Na hono mhuga yiyo yiwe yina wanhu wacefu, mu nghango yo kufutigwa kulya no kuwumala mutugo wuwo wose, ale wehanzaje mhuga nyejete hamonga, wagawane mutugo monga na wose walye mu nghango ye liwalo lyawo. 5Wudahile kusola ngholo hamba mhene, ninga yiweze nume yono yificile mwaka monga du, kanyhi yiweze yono yisina cilema co cose. 6Nanye, kolo lyeza kufika lizuwa lye likumi na yine lyo mwezi wuwu, ale, zimhuga zose ze Waisilayeli waziwulagaje mitugo zizo zose, mwipango lye cinyamihe mwi'zuwa lilyo. 7Hanyuma wanhu wasole sakami ye mitugo yiyi wayibace mu fulemu ze milango, mu zimbawo zinyejete zo wima, ne mbawo ye cipinga ya hacanyha, mu milango ye zinyumba mono wolila mitugo yiyo. 8Na mu cilo cico, woyikasika nyama yiyo mu moto, wayilye hamonga ne mikate yono yisina cisase, hamonga ne mboga ye mahanze yono yili cisungu. 9Mulece kuyilya nduma hamba nhelece, langa yose yeze nghasice, hamonga no mutwe wayo ne migulu yayo yose, sunga no wutumbu wayo wose. 10Kanyhi mulece kusigaza nyama yinji yo yose yigone sunga hakali mitondo. Na hono lunji yinji yisigale sunga hakali mitondo, muyikongogaje mu moto. 11Kanyhi lono mukuyilya, muyilizaje ko musunho, akuno muvwalile ne myenda yenyu hamonga ne malatu genyu mu migulu, akuno mwina ne zinghome zenyu, mu miwoko yenyu. Yiyo yo sikukuu ye Pasaka yono yikulajila cogopo cenyu kuli'ne no Muwaha Mulungu.”
12“Nane mu cilo cico nokola mu yisi yose ya Misili, niwawulaje wana walume wose, walongozi kulelwa. I wana we wanhu, hamonga ne zinyana ze mitugo. Kanyhi noyilipiciza milungu yose yo wulambi ya mu yisi ya Misili. Ane yo nene Muwaha Mulungu. 13Nayo sakami yono yili mu fulemu ze milango, cowa co citanjilo cono cikulajila vyono zo kaya zenyu zono mwikaye. Nane kolo nghuyiwona yiyo sakami, hodu nopuluta, hamba si nomutamisenyi yaye, lono neza kuwalipiciza Wamisili. 14Nanye molisiwanula lizuwa lilino, liwe sikukuu yo wuhembi, yono yojendelela kumukumbucizenyi zono nizitumile ane no Muwaha Mulungu. Holeka mojendelela kuyibata sikukuu yiyi mu vilo vyose vyono vikuza.”
Sikukuu ye mikate yono yisina cisase
15Muwaha Mulungu yakatya “Mu vilo mupunghati, molecela lukulu kulya mikate yono yina cisase. Na mwizuwa lilongozi, wose muwuse cisase cose cono cili mu zikaya zenyu. Na hono yejele yunji muli nyenye mu vilo vivyo vyo mupunghati, yakulya mukate wono wina cisase, munhu yuyo si kosuma kanyhi kuwalilizwa hamonga ne wanhu wangu. 16Holeka mwi'zuwa lilongozi na mwi'zuwa lyo mupunghati, munojeye muwe kwihanguliza mu wuhembi. Mulece kwituma mulimo wowose mu vilo vivyo, langa munojeye muwikanize ndigwa. 17Mweze kuyikumbucila sikukuu yiyi, ye mikate yono yisina cisase. Hambi nha lyo lizuwa lyono namuwusenyi nyenye mu yisi ya Misili. Holeka mu vilo vyose vyono vikuza, munojeye mulinozeze sikukuu lizuwa lili. 18Kanyhi ku wulawilila cinyamihe, ce lizuwa lye likumi na yine lyo mwezi mulongozi, sunga cinyamihe, ce lizuwa lye makumi mejete na monga, mulecele lukulu kulya mikate yono yina cisase. 19Hambi mu vilo mupunghati, nha yinojeye cisase cilecele lukulu kwijela mu zikaya zenyu. 20Vyono munhu wo wose, hamba yawe munyawusi muyenyu, hamba yawe mujenzi, hono yalye du mukate wono wina cisase, hodu munhu yuyo, si kosuma kanyhi kuwalilizwa hamonga ne wanhu wangu.”
Pasaka nongozi
21Hobaho Musa yakawacema walongola wose we Waisilayeli, yakawalonjela yakatya, “Alu, nyenye wose munhu na mhuga yakwe, muhagule ngholo hamba mhene yono yikali ndodo, muyiwulaje, muyitumamile mu sikukuu ye Pasaka. 22Nanye musole linhambi lya ezobu, mukalinimice mu sakami yono yili mu bakuli. Muyibace mu fulemu ze milango mu zimbawo zo wima, ne mbawo ya hacanyha ye cipinga, mu zinyumba zenyu. Kanyhi yunji wa muli nyenye, yalece kuwuka mu nyumba yakwe sunga kolo wukwela mitondo yaco. 23Nayo Muwaha Mulungu kolo yeza kukola mu yisi ya Misili, ho yawawulaje Wamisili, koyiwona yiyo sakami ya mu fulemu ze milango yenyu, nayo si komuleka malayika we lifwa, yenjile mu zi nyumba zenyu yamuwulajenyi. 24Nanye hamonga ne wana wenyu, munojeye muwukamise wulajilize wuwuno sunga cibitilila. 25Na kolo mukwinjila mu yisi yono Muwaha Mulungu yamwihuwizenyi vyono komupelenyi, munojeye muwukamise wityatye wu wuno wo wuhembi. 26Na kolo wana wenyu wakumuwuzenyi wakutya, ‘Alu wityatye wuwu wo wuhembi wina nhunizoci?’ 27Nanye mowapitula muwe kutya, ‘Alino lyo likumbiko lye Pasaka, so kumupela cogopo Muwaha Mulungu mono yaziwagula zikaya ze Waisilayeli ku Misili. Yakawa kuwawulaga Wamisili, ninga ase yakacileka.’ ”
Nawo Waisilayeli wakafugama hasi, wakahemba. 28Wakawa kubita kwituma nha vyono Muwaha Mulungu yawalajiliza Musa na Haluni.
Wuwulagwe wo mwana mulelwa mulongozi we Wamisili
29Yali yeza kufika mu cilo mugati, Muwaha Mulungu yakawa kuwawulaga i wana wose walelwa walongozi wa mu yisi ya Misili, ku wulawilila u mwana we cilume wa Falawo mono yali yo muhazi we ligoda lyo wutemi, sunga ko kuli mwana wa mono yali mufungwa mu jela, sunga kuli ne zinyana zinongozi kulelwa ze mitugo, zose zikawulagwa. 30Na mu cilo cico, u mutemi Falawo hamonga ne wetumami wakwe wose, sunga ne Wamisili wose, wakasinhuswa mu nhongo. Kukawa na cililo ciwaha muno muno mu yisi yose ya Misili, hambi nha hali hasina kaya hamba monga, yono yali yisina mwana mono yafwiye. 31Na mu cilo cico, mutemi Falawo yakawacema Musa na Haluni yakawalonjela yakatya, “Ale muwuce wose lulu baha, hamonga ne Waisilayeli wenyu! Muwuce mono yisi yangu, mubite mukamuhembe Muwaha Mulungu wenyu nha vyono mwasakaga. 32Musole hamonga ne zingholo zenyu, ne zimhene, hamonga sunga ne zing'ombe zenyu, muwuce mubite. Ninga nane munombele wulugutizwe.”
33Wamisili wakawasunhaniza muno muno Waisilayeli wawuce mbela mbela mu yisi yawo, akuno wakutya, “Hambi ase wose nha cofwa cimalice, hono anye mulece kuwuka.” 34Hodu Waisilayeli wakawa kuwusola wusaje wawo wono wali wakondya kuwutiwa, ninga wali wukali nasasa yaye, wakasola ne viya vyawo vyo kuwutiwila wusaje, wakaviwopa mu myenda yawo, wakawegala mu mawega gawo, wakatuluka. 35Waisilayeli wakanoza nha vyono Musa yawalonjela. Kanyhi wakawasaka Wamisili wawapele no wihambo wa fweza, no wihambo we zahabu, hamonga ne myenda. 36Nayo Muwaha Mulungu yakawanoza Waisilayeli wawe wendece ha meso ge Wamisili. Nawo Wamisili wakawakombolela Waisilayeli vinhu vivyo vyono wavisakaga. Na mu nzila yiyo, Waisilayeli wakasola sawo ye Wamisili nyinji muno muno.
Wuwuce we Waisilayeli mu yisi ya Misili
37Waisilayeli wakatuluka wakujenda ne magulu ku wulawa ku Lamesesi wakabita ku Sukoti, nawo wali waficile wanhu we cilume elufu magana mutandatu liwalo lyawo, ninga i wacekulu hamonga ne wana, awo si wawalilize mwi'walo lili. 38Ne wanhu wanji wenji muno, vikabitana nawo hamonga ne matewa mawaha ge zingholo, zimhene ne zing'ombe. 39Wakasola wusaje wuwulya wutiwe wono waza nawo ku wulawa ku Misili, wakateleka mikate yono yisina cisase. Hambi nha wawuka musunho musunho kuko ku Misili, hamba si watuga cilejeho co kuwikaniza ndigwa zawo, langa hono si wusaje wuwo du, wono wali wusina cisase wono wawuka nawo ku Misili. Wakawusola wuwo wakateleka mikate yono yisina cisase.
40Wawa Waisilayeli wekala ku Misili myaka magana mane na makumi madatu. 41Na mwi'zuwa lilyo lye ndumilizo lya mu myaka yiyo ye magana mane na makumi madatu, lyo lizuwa lyono mhuga yose ye wanhu wo Muwaha Mulungu wawucila kuko ku Misili. 42Cali cilo, lono Muwaha Mulungu yawawusa mu yisi ya Misili. Ne cilo ce lizuwa lilyo, cikasiwanulwa ciwe kuli Muwaha Mulungu. Na mu myaka yose yono yikuza, ciwe cilo cono cinojeye ciwe kukumbucilwa ne Waisilayeli wose.
Wulajilize we Pasaka
43Muwaha Mulungu yakawalonjela Musa na Haluni yakatya, “Awu wo wulajilize we Pasaka, hasina munhu mujenzi wo wose mono kosuma kuyilya ndigwa ye Pasaka. 44Langa mwitumami wo wose mono wumugulile na fweza, ayo yadahile kuyilya, ninga nayo, yeze wakondya kumutegula ku calamo. 45Ninga hasina mwikazi hamba mwitumami wo kulipwa musahala, mono kosuma kuyilya. 46Ne nyama yose, yinojeye yiligwe, no kumalicila mu nyumba mono yiwikanizizwe, yilece kutegulwa kunze hamba hadodo. Kanyhi wulanjilile, wulecele lukulu kugabenanga mafupa go mutugo wuwo. 47Nazo zimhuga zose ze Waisilayeli, wanojeye wawe kuyinoza sikukuu yiyi. 48Ninga munhu mono si yalame, yuyo si yanojeye kuyilya. Na hono hawe ho yuli munhu mujenzi, mono yakondya kulowela mu yisi yenyu, hamba si muhami kanyhi, na hono yasace nayo kuyinoza sikukuu yiyi ya Pasaka so Muwaha Mulungu, kosuma kuyinoza, ninga yamule yalame, mwene hamonga na we cilume wa mu nyumba yakwe wose. Ale baho langa, ho kolangwa nha Mwiisilayeli mulelelwa mu'si, nayo ho kosuma no kuyilya yiyo Pasaka. 49Ninga wumanye vyono, wulajilize we Pasaka, wuwanojeye Waisilayeli wose i walelelwa mu'si, sunga na kuli wajenzi walowezi wa mu yisi yenyu.” 50Nawo Waisilayeli wose, wakawa wali cihuliko, wakanoza nha vyono Muwaha Mulungu yawalajiliza Musa na Haluni. 51Na mwi'zuwa lilyo u Muwaha Mulungu yakawawusa we nghungugo yose ye Waisilayeli ku wulawa mu yisi ya Misili.
Currently Selected:
Wutuluce 12: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
