1 Watemi 18
18
Eliya ne wakohani wa Baali
1Hanyuma yaza kuwa mu mwaka we kadatu we lizala, Muwaha Mulungu yakamulonjela Eliya yakamutya, “Alu, wubite wukelajile kuli mutemi Ahabu, nane notonyeza mvula.” 2Nayo Eliya yakawa kuwanza muhinzo wo kubita.
3Ahabu yakamucema Obadiya mono yali yo mulanjilizi we likulu. Nayo Obadiya yali yo munhu mono yali yena cogopo muno kuli Muwaha Mulungu, 4na lono Yezebeli yawawulagaga i wawizi wo Muwaha Mulungu, mwene Obadiya yakawahundika wawizi wanji mu zimhango, waficile wawizi yigana limonga. Yakawatemanula wakawa mu mapuga mejete ga wanhu makumi mahano mahano, yakawa yakuwalisa ne zindigwa mumo mu zimhango zizo, hamonga ne malenga go kung'wa. 5Hobaho, Ahabu yakamutya Obadiya, “Alu, alenyi cibite mu mivwilo yose ye malenga na mu vikolongo vyose vya mu yisi yose, lunji cotuga mahanze so zifwalasi, hamonga ne zinyumbu, ho zilece kufwa, cilece kufwilwa ne mitugo zetu.” 6Wakawa kwilumbaniza no lubavu lono wobita munhu na lwakwe wakelondolele mahanze. Hobaho wakawa kwiyagala mu yisi yose ako na ako munhu na lwakwe.
7Nayo Obadiya lono yali yali mu nzila yakubita, waketang'anila mu nzila nhinicizo na Eliya. Nayo Obadiya yali yeza kumumanya vyono yo Eliya, hodu yakenama hamwande ya Eliya, yakawuza yakutya, “Alu muwaha, yo gwegwe mbeka wuli Eliya?”
8Nayo Eliya yakatya, “Heya yo nene. Alu wubite wukamumanyize muwaha wako u mutemi Ahabu nha vyono ane nili bahano.”
9Nayo Obadiya yakamupitula yakatya, “Alu ane sutya nghanici, yono yoleka agwe wunhajile mu mbali nhavivi, mbite nghawulagwe no mutemi Ahabu? 10Nane nghukwilahila mwi'tagwa lyo Muwaha Mulungu mumi, u Mulungu wako, nha vyono, mutemi yakuwa kukulondola muno mu ma'si gose ge yinze yose. Na hono mutemi we yisi yiyo yatye, vyono agwe wuli musina mu yisi yakwe, hodu Ahabu komusaka mutemi yuyo yelahize hono mbeka wuli musina. 11Alu agwe ho wukusaka 'ne mbite nghamulonjele nha vyono wuli bahano hongo? 12Alu nha baha kolo neza kuwuka, nagwe kono nyuma hono muhe wo Muwaha Mulungu wukusole, wukutegule kunji kono si kumanyice, nane kumbe nowa nakondya kumulonjela Ahabu nha vyono wuli bahano, nayo lu kumbe ho yekale si yakuwene, langa baho nhondo kombulaga. Agwe Eliya, wukumbucile nha vyono ane nili mogopa Muwaha Mulungu ku wulawilila wudodo wangu. 13Hamba agwe wukali si nahulika vyono, lono Yezebeli yawawulagaga wawizi wo Muwaha Mulungu, ane nghawahundika mu mapango wawizi wanji yigana limonga, nghawatemanula wakalawa mapuga mejete, nghawa kuwahundika wanhu makumi mahano mahano, nghawa kuwalisa ne zindigwa hamonga ne malenga go kung'wa mumo mu zimhango? 14Alu ho konhuma wule mbite nghamulonjele mutemi nha vyono agwe wuli bahano? Na mbeka kombulaga!”
15Eliya yakamupitula yakamutya, “Ane nghwilahiza muli Muwaha Mulungu mumi, mono nimwitumamilaga, nha vyono nene no mweneco du, nobita nghelajile kuli mutemi izuwali.”
16Hodu, Obadiya yakabita kuli mutemi Ahabu, yakawa kumulonjela nha vyono Eliya yali bahano. Nayo Ahabu yakawa kubita kumuhinjiliza Eliya. 17Nayo Ahabu yali yeza kumuwona Eliya, yakamutya, “Hee! Kumbe waza go munhu mubi mono wukucipela magazo mu yisi ya Isilayeli!”
18Eliya yakamupitula yakatya, “Gwe mutemi, ane yo si nene mono nghumuletelenyi magazo, langa yo gwegwe hamonga no sogo Omuli, mono mukugaleta magayo gaga. Yo nyenye no sogo mono si mwasaka kugebata malajilizo go Muwaha Mulungu, kanyhi mukahemba vihwani vya Baali. 19Alu nghukunena, wuwakonghole wanhu wose wa Isilayeli, nitang'anile nawo he'tunda lya Kalimeli. Kanyhi wuwalete ne wawizi wa Baali waficile magana mane na makumi mahano, hamonga ne wawizi magana mane wo mulungu we cicekulu Ashela, wono wakumutaza Yezebeli.”
20Hodu Ahabu yakawakonghola wa Isilayeli wose hamonga ne wawizi wose wa Baali, wetang'anile he tunda lya Kalimeli. 21Nayo Eliya yakawabitila wanhu yakawatya, “Alu mwene, mojendelela kukangamyanga mu mahweso mejete sunga nili? Hono Muwaha Mulungu yo Mulungu, ale muhembenyi yuyo du, na hono mukuwona vyono Baali nayo Mulungu, ale muhembenyi yuyo!” Ninga wanhu wose wakanyamala twii. 22Hanyuma Eliya yakatya, “Ane yo nene du muwizi wo Muwaha Mulungu mono sigaye, ninga howali wawizi magana mane na makumi mahano wa Baali. 23Holeka alu mulete ng'ombe nyejete, wawizi wa Baali wasole monga wayiwulaje, wayitemashe, wayijelece nyama yiyo mucanyha ye zingwagu, ninga walece kupembela moto yaye. Ane nane noyisola ng'ombe ye kejete niyinoze nhavivyo nha vyono wanozize wene. 24Hanyuma wawizi wa Baali wamulombe mulungu wawo Baali, ane nane nomulomba u Muwaha Mulungu, hanyuma ciwone mulungu mono kopitula yalete moto, ale yuyo yo Mulungu.”
Nawo wanhu wose wakapitula wazozize wakutya, “Nghani yiyo langa swanu cayilumba.”
25Hodu nayo Eliya yakawalonjela i wawizi wa Baali yakawatya, “Alu anye vyono muli wenji, yo nyenye mwanze kuyisola ng'ombe muyiwulaje. Hanyuma mumulombe mulungu wenyu, ninga langa mulece kwasa moto mu zingwagu.”
26Ale, nawo wawizi wa Baali wakayisola ng'ombe yono wali waletelwa, wakayiwulaga. Wakalomba kuli Baali, sunga mu misi mugati. Wazozaga wakutya, “Gwe Baali wucipitulaje!” Nawo walombaga nhavivyo, akuno wakuzumhazumha wakupilima cikumbicilo cono wazenga. Ninga hakawa hasina hamba yipitulo lyolyose lyono watuga.
27Na lulo yali misi mugati. Nayo Eliya yakaseka yakutya, “Ale, mumuceme muno muno! Mwene nha yo mulungu! Na lunji yali mu ndoto za misi, hamba lunji yacehile, lunji kabita muhinzo, lunji yagonile, holeka mumusinhusaje!” 28Ale, du, wawo wawizi wakacila kulomba wazozize, akuno wakwisalanga ne mamaje ne zisunja, nha vyono winha moto wawo wo wuhembi, sunga ne sakami yikawa kulawila mu miwili yawo. 29Nawo wakajendelela du kuzoza no kwinoza kotya wamangha lukwale, sunga mu mapango ge makumbiko ge cinyamihe. Ninga hamba nhavivyo, hasina hamba lipitulo lyolyose lyono walituga, hamba lizi bwete kuhulikwa.
30Hodu, Eliya yakawatya wanhu “Ale, musejelele akuno,” na wose wakasejelela wakamupilima. Nayo yakalinoza likumbicilo lyo Muwaha Mulungu lyono lyali lyamwaguka. 31Yakasola mabwe yikumi na mejete, kwi walo lye milango ye wana yikumi na wejete wa Yakobo, mono Muwaha Mulungu yamupela litagwa lya Isilayeli. 32Yakawa kuzenga ne mabwe gago, cikumbicilo co kumuhembela Muwaha Mulungu. Yakahimba musinji mu zimbavu zose ze cikumbicilo, wono zokwinjila lita yikumi na yine za malenga. 33Yakasola zingwagu, yakazipanga mucanyha ye cikumbicilo, yakayitemasha ng'ombe, yakayijeleka nyama yose mucanyha ye zingwagu. Hanyuma yakawatya, “Ale, mumemye njilo yine malenga mugamwaje mucanyha ye likumbiko hamonga ne zingwagu zayo. Nawo wakanoza nhavivyo.” 34Nayo yakawatya, “Ale, monjeleze malenga ganji kanyhi lwe kejete.” Nawo wakatajila kanyhi lwe kejete. Yakawatya, “Monjeleze ganji kanyhi lwe kadatu.” Nawo wakatajila lwe kadatu. 35Nhondo malenga gakamema mu cikumbicilo gakapilima sunga musinji wose.
36Na yikawa mu wulavya likumbiko lye cinyamihe, u muwizi Eliya, yakasejelela ha cikumbicilo yakalomba yakutya, “Gwe go Muwaha Mulungu, go Mulungu wa Abulahamu na Isaka na Yakobo, nghukulomba zuwali, yimanyice nha vyono agwe yo gwegwe go Mulungu wa Isilayeli, na vyono nane nili mwitumami wako. Nane nizinoza zizi zose ku soko ye nghani yako. 37Holeka nghukunena wuhulice Gwe go Muwaha Mulungu, wuhulice ho wanhu wawa nawo womanya nha vyono u Muwaha Mulungu, yo Mulungu mbeka, na vyono agwe wukuwapitula zinhumbula zawo wakuwuyile gwegwe.”
38Nayo Muwaha Mulungu yakacikoleza moto cikumbicilo, nawo moto wukavitakamiza vyose, likumbiko ne zingwagu hamonga ne mabwe gayo. Wukanyanya muhangha no kuganyaza malenga gose mu musinji. 39Nawo wanhu wali weza kuziwona zizi, wakebamiliza hasi, wakazoza wakutya, “Muwaha Mulungu yo Mulungu, u Muwaha Mulungu yo Mulungu yali wene du!”
40Hobaho Eliya yakawatya, “Ale, muwebate wawizi wose wa Baali, mulece kumuleceleza hamba yumonga yatije!” Nawo wanhu wakawebata wose, nayo Eliya yakawategula sunga ko kwi'kolongo lya Kishoni, yakawawulajila kuko wose.
Ndumilizo ye lizala
41Hanyuma Eliya yakamulonjela mutemi Ahabu yakatya, “Alu, wubite wukalye zindigwa. Hambi ane nha nghuhulika mvula yikudidima, yasejelela.” 42Na lono Ahabu yali yabita ku wulya zindigwa, mwene Eliya yakabita kucanyha ye cizuli ce litunda lya Kalimeli, yakenama ho hasi, no mutwe wakwe yakawujeleka mu mafugamilo gakwe. 43Hanyuma yakamulonjela mwitumami wakwe yakatya, “Ale ta wubite wukalanje ku lubavu lwa kwi'lenga.”
Mwitumami yakabita yakawuya, yakaleta lipitulo yakatya, “Ako hamba si mbwene cinji yaye.” Nayo Eliya yakamulonjela yabite kanyhi na kanyhi sunga zikafika nghanghulo mupunghati. 44Langa mu nghanghulo yo mupunghati, u mwitumami yakatya, “Mbona yivunde yidodo linha muwoko wa munhu likulawa mwi'lenga.”
Hobaho, Eliya yakamulonjela mwitumami wakwe yakatya, “Alu wubite kuli mutemi Ahabu wukamutye yenjile mbela mwi'tuka lyakwe lyo wulugu, yamanyhile ku kaya, lono mvula yikali namudindila.”
45Na hanyuma hadodo du, wulanga wukanza kudinda ne mavunde matitu, ne mbeho yikanza kuputa, hobaho ne mvula mbaha muno yikanza kutonya. Ahabu yakenjila mwituka lyakwe lyo wulugu, yakawa kutuluka yakubita ku Yezeleli. 46I vilungo vyo Muwaha Mulungu vikamuziza Eliya, yaketunga myenda yakwe mu ciwino, yakebata lumangho ku mwande ya Ahabu, yakamangha nzila yose, sunga yakafika ku Yezeleli.
Currently Selected:
1 Watemi 18: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
