1 Watemi 17
17
Eliya ne lizala liwaha
1Kwali no muwizi litagwa lyakwe Eliya, mulawa ku Tishibi mu yisi ya Gileyadi. Muwizi Eliya yakamulonjela mutemi Ahabu yakamutya, “Ane nghukulonjela mwi'tagwa lyo Muwaha Mulungu, u Mulungu mumi, u Mulungu wa Isilayeli, mono ane nghumwitumamila, nha vyono, kowa kusina buhe, hamba mvula yono yotonya, sunga yipulute myaka myejete, hamba midatu, sunga nene kanyhi kono nolotela.”
2Muwaha Mulungu yakamulonjela Eliya yakatya, 3“Ale, wuwuce bahano, wubite ku lubavu lwa kucilima, wukehundice behi ne cikolongo ca Celiti, kucilima ye likolongo lya Yoludani. 4Nagwe kowa kung'wa malenga ga mu cikolongo cico. Nane nakondya kuzituma zihowe ziwe kukuletela ndigwa kuko.”
5Nayo Eliya yakawa ne cihuliko nha vyono Muwaha Mulungu yamulajiliza. Yakatuluka, yakabita yakekala behi ne cikolongo ca Celiti. 6Yakawa yakung'wa malenga ga mu cikolongo cico, nazo zihowe, zikawa zikumuletela mukate ne nyama, hakali mitondo ne cinyamihe, nhondo zose. 7Ninga hanyuma hadodo, i cikolongo naco cikanyala ku soko vyono mvula yali si yikutonya.
Eliya no mucekulu mufwile wa ku Zalefati
8Hanyuma Muwaha Mulungu yakamulonjela Eliya yakatya, 9“Alu, wubite ku cikaya ca Zalefati behi na Sidoni wukekale kuko. Nakondya kumulonjela mucekulu yunji mufwile mwikala baho vyono yakulise.” 10Ale, Eliya yakawa kubita kuko ku Zalefati. Nayo yali yeza kufika ha mulango we cikaya, yakagana baho mucekulu yunji mufwile yakutenya ngwagu. Eliya yakamutya, “Nghukunena wumhele malenga go kung'wa.” 11Nayo mucekulu yali yeza kutuluka yakubita, Eliya kanyhi yakamucemeleza yakutya, “Gwe yaya, nhondo ndetelezezaje no mukate nilye.”
12Nayo mucekulu mufwile yakamupitula yakatya, “Nghukwilahiza mwi'tagwa lyo Muwaha Mulungu mumi, u Mulungu wako, nha vyono, 'ne sina hamba cibegulwa ca mukate yaye. Ane nina wusaje wudodo vivi du mu bakuli, hamonga ne mafuta yibanhi limonga du mu ciya. Nalu niza nhondole vigwagu, mbite navyo nghatelecele, hambe cidodo vyono cowa cinha, ho nilye ane no mwanangu, ndigwa yetu ye ndumilizo, hanyuma hodu cilindile cifwe ne nzala.”
13Eliya yakamupitula yakatya, “Gwe yaya, wulece kwihwelela yaye, ninga agwe nghani nongozi, wubite wukanozeze mukate mudodo, wundetele, na hanyuma ho wubite wukenozeze nagwe hamonga na yuyo mwanago mu wusaje wono wosigala. 14Hambi u Muwaha Mulungu, u Mulungu wa Isilayeli, nha yakutya nhavi, ‘Wusaje wuwo wono wuli mu bakuli, hamba si womalika yaye, ne mafuta gono gali mu ciya, nago hamba si gomalika yaye, sunga kolo nilatonyezeza mvula, nene Muwaha Mulungu.’ ”
15Ale mucekulu mufwile, yakabita yakanoza nha vyono Eliya yamulonjela. Nawo wose wakawa wena ndigwa yono yawakwila vilo vinji. 16No wusaje wa mu bakuli hamba si wamalika, ne mafuta gono gali gali mu ciya, nago hamba si gamalika yaye.
17Hanyuma yayo u mwana wo mucekulu yuyo mufwile, yakawa kutamwa, no wutamwa wakwe wukacila muno yakawa mutamwa muno muno, na hanyuma yakawa kufwa. 18Mucekulu mufwile yakamulonjela Eliya yakutya, “Gwe go munhu wo Mulungu, alo nhawule kunhendela nhavivi lo? Kunyiziza lo, u wubi wangu ho wukumbucilwe no Mulungu, wumbulajile mwanangu?”
19Nayo Eliya yakamutya, “Ale, ta muletaje mwanago akuno.” Eliya yakamubocela mwana mu mawoko go mucekulu, yakamutegula ku cinyumba ca ku golofa kono mwene yekalaga, yakamuwika mwana yagone mu citanda cono mwene yagonelaga. 20Yakamulomba Mulungu kwe 'zi yiwaha yakutya, “Gwe go Muwaha Mulungu, go Mulungu wangu, alo nhawule kumutendela mucekulu yuyu mufwile nghani yono yinha yiyi? Mwene kanhendela viswanu, yakundima. Ninga alu 'gwe kanyhi wamuwulajila mwanagwe!” 21Hanyuma Eliya yakalambalala mu canyha yo mwana nghanghulo yidatu, akuno yakulomba yakutya, “Gwe go Muwaha Mulungu, go Mulungu wangu, nghukunena wumugomolele mwana yuyu wumi wakwe!” 22Nayo Muwaha Mulungu, yakawuvumila wulombe wa Eliya, wumi wo mwana wukamuwuyila, yakawa mumi kanyhi.
23Eliya yakamusola mwana, yakatima nayo ku wulawa ku golofa sunga kuli nyina. Eliya yakamulonjela nyina yakamutya, “Lanje ta, alu mwanago mumi!”
24Nayo mucekulu mufwile yakamupitula yakatya, “Alu nhondo ho namanya he, vyono agwe mbeka wuli munhu wo Mulungu, kanyhi na vyono Muwaha Mulungu yakulonjela muli gwegwe!”
Currently Selected:
1 Watemi 17: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
