1 Watemi 19
19
Eliya mwi'tunda lya Sinayi
1Nayo mutemi Ahabu yakamulonjela Yezebeli mugolece wakwe, zose zono Eliya yetumile, na vyono yawawulaje wawizi wose wa Baali. 2Hobaho nayo Yezebeli yakatuma munhu yabite kuli Eliya yakamulonjele yatye, “Hono yifice mitondo kwinha vivi, niwe nghali hamba si nakuwulaga nha vyono agwe wawawulaga wawizi, hodu ciba nane milungu yimbulaje.” 3Nayo Eliya, ku so nghani yiyo, hodu yakawa kutiza ho yeponye wumi wakwe. Yakamusola no mwitumami wakwe, wakawa kutiziza ku Belisheba ya ku yisi ya Yuda.
Eliya yakamuleka mwitumami wakwe, 4mwene yakawa kujendelela no muhinzo misi yose mu nyika. Nayo yali yeza kufika ha mubici wunji, yakekala mu mubeho hasi yo mubici, yakasulumila ciba yafwe. Ale baho yakalomba yakutya, “Gwe go Muwaha Mulungu, alu nghani yiyi nha yeza nzito muno kuli'ne, holeka wumbulagaje, ciba nifwe, si nho kwikala mumi!”
5Hodu, yakawa kutambalala baho hasi yo mubici, zinhongo zikawa kumwibata. Malayika yakaza yakamupamiza nhinicizo, yakamutya, “Gwe Eliya, ale winukaje wulye.” 6Nayo yali yeza kwinuka mu zinhongo, yalanje nhavi, yakawona mukate hamonga ne malenga gali mu cibuzi, behi ha mutwe wakwe. Hodu yakawa kulya, yakang'wa ne malenga, hanyuma kanyhi yakawa kugona nhongo. 7Nayo malayika wo Muwaha Mulungu, yakaza kanyhi lwe kejete yakamusinhusa, yakamutya, “Gwe Eliya, winukaje wulye, hambi muhinzo nha wowa muwaha muno kuli'gwe.” 8Nayo Eliya yakenuka, yakalya, yakang'wa. Ndigwa yiyo yikamupela vilungo vyo kujenda vilo makumi mane ku wufika sunga ko kwi'tunda lya Sinayi, litunda lyono lyelile. 9Yali yeza kufika he 'tunda, yakenjila mu mhango, yakagona mumo cilo cico.
Ninga Muwaha Mulungu yakalongana nayo nhinicizo, yakamutya, “Alu Eliya, wukwitumaci baha?”
10Nayo Eliya yakapitula yakatya, “Gwe go Muwaha Mulungu, go Mulungu we mihanga, ane nhondo zose, nali kukwitumamila gwegwe du wuli wene. Ninga i wanhu wa Isilayeli, wakondya kucibena cilagane cako na wene. Wavibenanga vikumbicilo vyako, wawawulaga ne wawizi wako, nane nasigala nili wene du. Nawo lu, wakunondola nane wambulaje!”
11Muwaha Mulungu yakamulonjela yakatya, “Alu Eliya wubite wukeme hali'ne mucanyha ye litunda.” Na langa ta, Muwaha Mulungu yakapuluta, mbeho mbaha ye vilungo yikatenjelemula matunda, yikapandula ne matalawe, ninga Muwaha Mulungu si yali yali mumo mu mbeho. Nayo mbeho yali yeza likaza litulo, ninga Muwaha Mulungu si yali yali mumo mwi'tulo. 12Na wukaza moto, ninga Muwaha Mulungu si yali yali mumo mu moto. Na hanyuma yo moto, likaza lizi lyo wupwepwe wo wutule.
13Nayo Eliya yali yeza kuhulika, yakefunika wusu wakwe mu vivwalo vyakwe, yakalawila, yakema ha mulango we mhango. Hanyuma lizi likamutya, “Alu Eliya wukunoza cici baha?”
14Nayo Eliya yakapitula yakatya, “Gwe go Muwaha Mulungu, go Mulungu we mihanga, ane nhondo zose nali kukwitumamila gwegwe du wuli wene. Ninga i wanhu wa Isilayeli, wakondya kucibena cilagane cako na wene. Wavibenanga vikumbicilo vyako, wawawulaga ne wawizi wako, nane nasigala nili wene du. Nawo lu, wakunondola nane wambulaje.”
15Muwaha Mulungu nayo yakamutya, “Alu, wubite ku nyika behi na Damesiki, winjile mwi'kaya, wumwitile mafuta Hazayeli yawe mutemi we yisi ya Siliya. 16Kanyhi wumwitile mafuta Yehu u mwana we cilume wa Nimushi, yawe mutemi wa Isilayeli. Hanyuma kanyhi wumwitile mafuta Elisha u mwana wa Shafati, munya Abeli Mehola, yahalile u mulimo wako wo wuwizi. 17Ho yiwe mono kopona yekale si yawulagwe na Hazayeli, ale kowulagwa na Yehu. Na mono kopona yekale si yawulagwe na Yehu, ale, kowulagwa na Elisha. 18Hamba nhavivyo, nane nosigaza wanhu elufu mupunghati mu Isilayeli, wono wanyogopile nene, kanyhi wono si wamuhembaga Baali, hamba kucinonela ne cihwani cayo.”
U lucemo lwa Elisha
19Holeka Eliya yakawa kutuluka, yakamwagana Elisha yena ne zing'ombe zakwe zitunjile nyejete nyejete zikulima. Nazo zali zitunjize nyejete nyejete kali kumi na nyejete, na zose zilongoleye ku mwande yakwe, mwene yakulima na azilya zono zali zityatizye mu nyuma ye zinzawo zose. Hobaho Eliya yakavula civwalo cakwe yakamuvwika Elisha. 20Nayo Elisha yakazileka zing'ombe zakwe, yakamumanyhilila Eliya, yakamulonjela yakatya, “Alu Eliya, ane nghukunena wundece namule mbite nghawanonele baba na yaya, niwelaje, hanyuma ho nize cibitane.”
Nayo Eliya yakamutya, “Ale heya wubite, ane si nghukulemeza yaye!”
21Elisha yakazibitila zi zilya zing'ombe zakwe, yakaziwulaga zose, yaketumamila mibano yazo zikawa zo ngwagu, yakayiteleka nyama yazo. Yakawa kuwagawila wanhu nyama yiyo wakayilya yose. Hanyuma nhondo ho yakawa kubita kumutyatya Eliya, yakawa mutazi wa Eliya.
Currently Selected:
1 Watemi 19: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
