Loma 14

1Umutenda palufuvo mumukogosage vunofu; neke ulwa kumukogosa lutane ukuva lwa kukaniṅana nave, dze mwiganisa. 15, 1; 1. Kol. 8, 9.

2Ujungi lwikwima palufuvo lwakwe pakufilya fyonda neke ujungi umutenda ilya ji mboga jene.

3Je ilya, atane ukumutofola j’asilya, neke j’asilya atane ukumuhiga j’ilya, ndivwene Nguluvi amwanukye nave. Kol. 2, 16.

4Vwi nani uveve, je ukumuhiga umuvanda va muńumba va vene? Nd’avedzage imile nd’avedzage agwe, ivedza va mutwa vakwe jujo. Neke alima, ndivwene umutwa asilemwa pakumwimya. Mat. 7; 1; Jak. 4, 11. 12.

5Ujungi itigila: ikigono kisitegine nikigono, ujungi itigila: fyonda ifigono fitegine hela; neke vonda vańwilililage mulwijivuko lwanavo. Gal. 4, 10.

6Umuńa-kufimika ifigono fimwi nave akumwimi-kila ju mutwa, na je iku-filya fyonda nave ikumu-lila ju mutwa, ndivwene ihongedza kwa Nguluvi; na je akufidzila ifilyo nave akumudzilila ju mutwa nave ihongedza kwa Nguluvi.

7Ndivwene pehela umunu, je ivelye mûmi ulwakwe, pehela na je akwifwila ulwakwe,

8ndivwene nde tuvedzage tuli vûmi, tumuvelye vûmi ju mutwa, nde tuvedzage twifwa, twifwila ju mutwa. Apo lino nde tuvedzage twi vûmi, nde tuvedzage twifwa, tuli va ju mutwa ndesi. Gal. 2, 20; 1. Tes. 5, 10.

9Pakuva dze dzene dze afwilye u-Kilisiti, dze dzene dze adzukye mûmi kangi, pakuta avedzage mutwa va vonda na vafwe na vûmi.

10Neke lino uveve ukumuhiga va kiki umujago? najuve ve jungi ukumutofola kiki umujago? Ndivwene twivonda tulavonekela pakitêngo kya luhigilo lwa Nguluvi. Apos. 17, 31; Mat. 25, 31. 32; 2. Kol. 5, 10.

11Ndivwene lwandikwe nulwa kuta: „vu vûmi vwangu unene, gonda amafugamilo galagomelelwa apangu na dzi ndimi dzonda dzilandumba june nde Nguluvi, ilonga evo umutwa.“ Fil. 2, 10. 11.

12Neke lino nditigila: twivonda, ndeve tuvelye vuli, tulijolekela kwa Nguluvi najula idzakwe najula idzakwe. Gal. 6, 5.

13Apo lino tukulekage ukwihiga, kiba muluhigage ulwa kuta: kwa mujangu nditane nidza lukuvadzo nidza lwambudzo.

14Ndidzelye unene, ndifivonye mwa Jesu umutwa, ukuta sipofili ponu ifili mudzilo fi fyene hela. Fili mudzilo fifyo, fye ukufihulila uvudzile juve. Mat. 15, 11; Apos. 10, 16; Tit. 1, 15.

15Ndivwene umujago ngana fikumuhulila uvuhuguvafu ifilyo (fye vwilya), apo imigendele gyako ve gihegile palutono lwa vwênde. Utane ukumwananga umujago nifilyo fyako, je amufwilye u-Kilisti. 1. Kol. 8, 11-13.

16Vutane ukudzovwa fivi uvutambule vwesu. Tit. 2, 5.

17Ndivwene uvutwa vwa Nguluvi vusimye mu fya kulya na mu fya kuńwa, nda hamu, vwimye muvugolofu na mulutengamano na muluheko lwa mwa Mubepo umwîmike. Luk. 17, 20.

18Ndivwene je ikumulimila mu idzi dzonda u-Kilisiti, je mwene je anogile na kwa Nguluvi, je mwene je valamwidika na va vanu.

19Apo lino tudzifwimage ińula-lutengamano nińula-kwidzenga vavo ṅani. 12, 18; 15, 2.

20Utane ukugamamula amalimo ga Nguluvi nifilyo fyako, fye vwilya uveve. Ukuva figaja-mudzilo ena figaja-mudzilo fyonda, neke kuvîfu umunu, ngana ikuvalila pa fya kulya, v. 14.

21neke kunofu, ngana usilya nambi ińama, ngana usińwa nambi uvugimbi, ngana vwileka nifingi ifihula-lukuvadzo kwa mujago. 1. Kol. 8, 13.

22Ulufuvo, lwe vwi nalo, vwivelage nalo juve kumîho ga Nguluvi. Ali kitendileme umunu, je asikwihiga lwe aluvwene.

23Neke lino je ilya, kuno pe iganisa munumbula, ujo adadye, pakuva ulu lusihuma kulufuvo, neke fyonda, ifisihuma kulufuvo, dze ndzanangifu hela. Tit 1, 15.

Currently Selected:

Loma 14: II

Highlight

Copy