VAROMA 16

Ngezya jakwe mwenye

1Nimugurija rumburya wetu Foibe, e mndima wa kanisa leho Kenkrea; 2mumghuhie he Mfumwa, sa vuntu chevatara vezerire; mumghenje he vintu vyose eneenda henyu; ambu naye eokie mraghenja vantu vajinki, erenighenja hata mi.

3Nikezijani Priska ne Akila, veronga ndima hamwe nami he Kristo Yesu, 4vekuinkije hata kuchwiwa singo vuntu vwa moo wangu, evo nevaanjela, neri simi du, mira hata makanisa ose a Vakiisanga; 5nikezijani na kanisa leho he nyumba yavo. Nikezijani Epaineto, mkunde wangu, e wa kuvoka he Kristo uko Asia. 6Nikezijani Maria, ekubinushe mno he vuntu vwenyu. 7Nikezijani Androniko ne Yunia, e vandughu vangu, vechungiwe hamwe nami, vena nguma yedi he ntume; evo verongeoka vakwe Kristo hemi. 8Nikezijani Ampliato, mkunde wangu he Mfumwa. 9Nikezijani Urbano, mndima hamwe nami he Kristo, ne Stakisi, mkunde wangu. 10Nikezijani Apele, ula ezumirwe he Kristo. Nikezijani vantu va kaa hakwe Aristobulo. 11Nikezijani Herodiani, mndughu wangu. Nikezijani vantu va kaa hakwe Narkiso veho he Mfumwa. 12Nikezijani Turfaina neTrifosa, verekudindija mno he Mfumwa. Nikezijani Persusi, mkunde ekudindija mno he Mfumwa. 13Nikezijani Rufo, esaghurwe he Mfumwa, na mlala wavo ere mlala wetu. 14Nikezijani Asinkrito, Flegoni, Herme, Patroba, Herma, na vandughu veho hamwe naye. 15Nikezijani Filologo ne Yulia ne Nerea na rumburye, ne Olimpa na vezerire vose veho hamwe navo. 16Kezyanyani na kubwitana kwezerire. Makanisa ose akwe Kristo amukezya.

17Vandughu, nimusemba, rerehani vala veketa marenge na mburi jekwangwaja, jeomanya ila michejire mwekuchejije; mutane navo. 18Ambu vala veikee huvo tevemrongia Mfumwa wetu Kristo ndima, esire ndeni javo venye, na he viteto vyenyutume vya kukugerekanya veisha ngoro ja vantu vanana. 19Ambu kusikia kwenyu kwavafikia vantu vose; heicho niizihirwa vuntu vwenyu, mira nienda iti unywi muoke vakiugho he chedi, na varundu he kivivi. 20Na Mrungu wa mporere enemangamnyanyarisha Shetani kijusi he mavato enyu.

Mbonea ya Mfumwa wetu Yesu Kristo na iikae hamwe na unywi.

21Timoteo eronga ndima hamwe nami, emukezya, ne Lukio, ne Yasoni ne Sosipatro vandughu vangu. 22Mi Tertio, neandike barua ii, nimukezya he Mfumwa. 23Gayo, mkaa wangu na wa kanisa lose, hata ye emukezya. Erasto, mnjama wa muzi, emukezya, ne Kwarto mndughu wetu.

[ 24Mbonea ya Mfumwa wetu Yesu Kristo na iikae hamwe na unywi vose. Amen.]

Kumkaza Mrungu

25Iki nakazwe ye eveiwa kumudindija, sa vuntu Mburi Yedi yangu yevwo, na he kubirikira kwakwe Yesu Kristo, cheteghane na ula mfunukuro wa ila mpiso yekivisike too kae na kae, 26ikafunyirijwa he igheri iki kwa maandiko a varoti, ikamanyika he vaisanga vose sa vuntu Mrungu wa kae na kae eazere, nesa vagurishe mwitikijo. 27Niye Mrungu mwenye du ena viugho. Ngazo ni yakwe Yesu Kristo, kae na kae. Amen.

Currently Selected:

VAROMA 16: CHSUNT67

Highlight

Copy