VAROMA 15

1Mira uswi twena nzinya, kitutara kutika vusoka vwa vala vesina nzinya, neri tekitutara kukuizihija venye. 2Kila mmwe wetu namzihije mghenji wakwe, nesa avone chedi, ajengwe. 3Ambu Kristo naye tekuizihije ye mwenye; mira sa vuntu cheandikwe: “Viraro vya vala vekurarie vyanigura.” 4Ambu vila vyose vyerongeandikwa vyeandikwe kutucheja uswi, nesa he kuinda na ituja la maandiko, tukete ikuji. 5Na Mrungu mreinda na ituja aimunke kugwia hamwe unywi venye cheteghane he Kristo Yesu; 6nesa he ngoro mwe na he momo mmwe muinde kumkaza Mrungu Vava wa Mfumwa wetu Yesu Kristo.

Mburi Yedi he Vakiisanga

7Heicho mughuhiane unywi venye na venye, sa vuntu Kristo naye etughuhiie, nesa Mrungu akazwe. 8Ambu nimutio, Kristo eokie mndima wa varatavanwa, nesa avonyeshe idi la Mrungu, na kukonesha vila viravo vaku veinkiwe; 9kangi nesa Vakiisanga vamkaze Mrungu vuntu vwa mbonea yakwe; sa vuntu cheandikwe:

“Heicho ninekuanjela ghati he Vakiisanga,

Nami nineimbia izina lako.” 10Kangi eti:

“Izihirwani Vakiisanga hamwe na vantu vakwe.” 11Kangi wa:

“Unywi Vakiisanga vose, m’bumijeni Mfumwa;

Unywi vantu vose, mtogoleni.” 12Na kangi Yesaya eti:

“Heneketa kikolo chakwe Yese,

Na ula enevuka kutetia Vakiisanga;

Niye Vakiisanga venemwarira.”

13Iki Mrungu wa ikuji amuizuje kuizihirwa kwose na mporere he kuitikija, nesa muzike haiwa kuketa ikuji he nzinya ya Mpeho Wedi.

Paulo evasemba kwa kuvaandikia boo

14Vandughu vangu, nakoneshwa mi mwenye he mburi jenyu iti na unywi mweizue vwedi, mweizujwe kucha kwose, kangi muidima kuchundana. 15Mira nimuandikia kwa nereko kukela he mafungu kumwe a ii barua, sa kutumukumbusha, he ila mbonea neinkiwe ni Mrungu, 16nesa nioke mndima wakwe Kristo Yesu he Vakiisanga, nirongie Mburi Yedi ya Mrungu ndima ya vutasi, nesa Vakiisanga vaoke itasi lekundike, lekikenja kuzerijwa ni Mpeho Wedi. 17Huvo, nina cha kukukazia he Kristo Yesu mozya he Mrungu. 18Ambu siidima kulanga kintu Kristo esikiketie he ndima yangu, nesa Vakiisanga vaveiwe kusikia, kiteto kana he mirongire, 19he nzinya ja maluvengo na vimako, kwa nzinya ja Mpeho Wedi, kuravokia uko Yerusalemu na mondo na mondo hewo mhaka Iliriko, nakenja kubirikira Mburi Yedi yakwe Kristo kwa kukolosha; 20huvo nikakudoka kubirikira Mburi Yedi, nisirebirikira aho hantu izina lakwe Kristo lekenjije kulangwa, nesa nisirejenga he msingi wa mntu ungi; 21mira sa vuntu cheandikwe:

“Vala vesinabirikirwa mburi jakwe venevona,

Na vala vesekinasikia venekisikia venetwarija.”

Kurekera kwakwe Paulo mwenye

22Icho nicho cheshigha nekikindwa kantu kajinki kuza henyu. 23Mira iki kwa kuti sina kapengere kangi he myondo ii, kangi too miaka mijinki yevecha, nina nkwina kuza henyu; 24igheri lose nenezoka uko Spania, nineza henyu. Ambu niarira kuvonana na unywi aho nekizoka na kuerekejwa ni unywi, ngoro yangu itundanywe ni unywi. 25Mira iki nitonga Yerusalemu kurarongia vezerire ndima; 26ambu chevaizihire vantu va Makedonia na Akaya kusanga vuntu vwa vala vezerire veho uko Yerusalemu e vakiva. 27Yee, chevaizihire, kangi veokie varando vavo. Ambu kakicha Vakiisanga veketie sanga he vintu vyavo vya kimpeho, chevatarire kuvarongia ndima he vintu vyavo vya kimwiri. 28Heicho nekikenja iyo ndima yavo na kuvavikia isimbiko la iyo ntunda ninevechija henyu nekitonga Spania. 29Nami nemanyije iti nekiza henyu nineza na lutelwedi lwakwe Kristo lwekoloke.

30Vandughu, nimusemba he Mfumwa wetu Yesu Kristo na he lukundo lwa Mpeho, kudindijeni hamwe nami he maombi enyu he vuntu vwangu mozya he Mrungu; 31nesa nikaniwe he vala vesiitikije veho uko Yudea, na kangi ndima yangu nena nayo uko Yerusalemu ikunduke he vezerire; 32nesa nifike henyu neizihirwe, sa vuntu Mrungu ekunda, niidime kuhema hamwe na unywi. 33Mrungu wa mporere naikae na unywi vose. Amen.

Currently Selected:

VAROMA 15: CHSUNT67

Highlight

Copy