1 VAKORINTO 1

Ngezya na kwanjela

1Paulo, eitangwe kuoka ntume wakwe Yesu Kristo, he kikundire cha Mrungu, ne Sostene mndughu wetu, 2Ha kanisa la Mrungu leho Korinto, vala vezerijwe he Kristo Yesu, veitangwe vaoke vezerire, hamwe na vose vala velanga izina la Mfumwa wetu Yesu Kristo hantu hose, Mfumwa wavo na wetu: 3Mbonea na iikae na unywi na mporere kufuma he Mrungu Vava wetu na he Mfumwa Yesu Kristo.

4Nimkaza Mrungu misi yose vuntu vwenyu, kila mweinkiwe mbonea ya Mrungu he Kristo Yesu; 5ambu he mburi jose mweokie vazuri heye, he viteto vyose, na he viugho vyose; 6sa vuntu vuonwa vwakwe Kristo vwedindie henyu; 7neri temduikiwe ni viinkwa vya kimpeho, sa vuntu mweinda kufunukurwa kwa Mfumwa wetu Yesu Kristo; 8eye enemudindija mhaka msio, nesa musireshaghwa he ula msi wa Mfumwa wetu Yesu Kristo. 9Mrungu ni mkitengo, eye emuitange kuingia he vumwe vwa Mwana wakwe, Yesu Kristo Mfumwa wetu.

Msopano ndeni he Kanisa

10Heicho vandughu, nimusembisha he izina la Mfumwa wetu Yesu Kristo, iti vose mugwie hamwe he mitetire; he unywi hasikete misopano, mira mukoloke he maririkano mamwe na mburi mwe. 11Ambu, vandughu vangu, neukulilwe mburi jenyu ni vala va nyumba yakwe Kiloe, iti he unywi hena misopano. 12Ambu cheshigha neteta huvo, ni hala kila mmwe wenyu eti, “Mi ni wakwe Apolo,” ungi eti, “Mi ni wakwe Kefa,” ungi eti, “Mi ni wakwe Kristo.” 13Hamao, Kristo eghavanyike? Kana Paulo niye evambiwe he msalaba vuntu vwenyu? Kana mwebatizwe he izina lakwe Paulo? 14Nimmuanjela Mrungu kila nesibatize mntu henyu, esire Krispo ne Gayo, 15nesa hasireketa mntu eti mwebatizwe he izina langu. 16Kangi wa nebatize vantu va nyumba yakwe Stefano, esire avo simanyije ungi nem’batize. 17Ambu Kristo tenitumie kubatiza, esire kubirikira Mburi Yedi, neri si he mitetire ya kiugho, msalaba wakwe Kristo usirehayama.

Nzinya ya Msalaba

18Ambu kiteto cha msalaba he vala veteka, ni vurundu, mira he uswi twekijwa, ni nzinya ya Mrungu. 19Ambu heandikwe:

“Ninekonda kiugho cha vakiugho,

Kangi ninesua icha la vala vechee.” 20Mkiugho eohi? Mwandiki eohi? Mteti wa igheri ili eohi? Hama kucha kwa si ii Mrungu tekughoshije vurundu? 21Ambu he kiugho cha Mrungu, ii si yekisammanya Mrungu he kiugho chayo; kikamzihija Mrungu kuvakija vala veitikija kwa vurundu vwa kila kiteto chebirikirwe. 22Ambu Vayuda veenda maluvengo, na Vagriki veenda viugho. 23Mira uswi tum’birikira Kristo evambiwe he msalaba; he Vayuda na kikuvajo, he Vagriki ni vurundu; 24mira he vala veitangwe, Vayuda kana Vagriki, ni Kristo nzinya ya Mrungu na kiugho cha Mrungu. 25Ambu vurundu vwa Mrungu vuna kiugho kukela cha vantu, na vusoka vwa Mrungu vuna nzinya kukela ja vantu.

26Ambu, vandughu vangu, rerehani mwitango wenyu iti si vajinki vena kiugho cha kimwiri, si vajinki vena nzinya, si vajinki veshimiwa veitangwe; 27mira Mrungu esaghure vintu vyyerundie vya si ii, nesa asonishe vala vena viugho; kangi Mrungu esaghure vintu visoka vya ii si, nesa asonishe vila vyena nzinya; 28kangi Mrungu esaghure vintu visoka vya si ii na vyeberirwe; yee, vintu vila vyesiho, nesa akonde vila vyeho; 29nesa mntu wose wa kimwiri asikukaze mozya he Mrungu. 30Mira heye unywi mweidime kuikaa he Kristo Yesu, he uswi eghoshijwe kiugho chefuma he Mrungu, na kitea, na kuzera, na vukomboli; 31kioke sa vuntu cheandikwe: “Ula ekukaze nakukaze he Mfumwa.”

Currently Selected:

1 VAKORINTO 1: CHSUNT67

Highlight

Copy