Tɛ̀ɛnnɛ 8
8
Fɛ̀ɛ kɔrɔsiin wów kéele
1A Bàpili ga fɛ̀ɛ kɔrɔsiin wów múgu, a fúlomi myɛ ceri nyɛ̀ʔɛni na n lɛ́ɛri tíla kwɔ́ɔ. 2Nyɛ̀ʔɛni tundunbéle kɔrɔsiin be yèré lè Kolocɔlɔɔ yɛ́ʔɛ ma, a mii bele bee nyaa a be búrubéle kɔrɔsiin kaan be ma.
3 #
Am 9:1; Yir 30:1,3 A nyɛ̀ʔɛni tundunwaa nikwɔɔ pan n baa yére sáriga-wòlo-yafaangi zìnmɛ na. Nùndaanna míige yasorigolo maa pye wi ma, tɛɛ̀ wólo. A be nùndaanna míige saʔa kaan wi ma jàngó wi gi pínɛ wòlo sáriga ní Kolocɔlɔɔ syɛɛncanbèle myɛ nyɛ́ɛriyɛ ní sáriga-wòlo-yafaangi na ki lè tɛ́ɛw wóʔo, fàngoli yɛ́ʔɛ ma. 4A nùndaanni míige wírige fala ni yirigi nyɛ̀ʔɛni tunduɔn kɔ́lɔ ni n pínɛ ni lúru ní Kolocɔlɔɔ syɛɛncanbèle nyɛ́ɛriyɛ ní Kolocɔlɔɔ yɛ́ʔɛ ma. 5#Lev 16:12; Ezek 10:2; Yir 19:16; Tɛ̀ɛn 11:19; 16:18 A nyɛ̀ʔɛni tunduɔn fala n sáà naà wòlo sáriga-wòlo-yafaangi na n tɛ́ʔɛ n nùndaanni míige yasorigolo nyìn n cáan tári na. A nyɛ̀ʔɛni fala ni folo ni kabagi, ní i tìngí, ní i nyɛ́ʔɛnɛ, a tári cúngo.
Búrubèle kéele
6Nyɛ̀ʔɛni tundunbéle kɔrɔsiin kɔ́yɔ ni búrubèle kɔrɔsiin da pye lè, a be peyɛɛ zámaga bi búrubèle wìi.
7 #
Yir 9:23-25; Ezek 38:22 A nyɛ̀ʔɛni tundunzelio wi búruw wìi. A be zěsolomɔ, ní naà, ní sìsyaan nyáʔami n cáan tári na. A tári tílaya taanri wóʔo sógi, a tíiri tílaya taanri wóʔo sógi, a nyàápungi myɛ sógi.
8A nyɛ̀ʔɛni tundun-ziin wóo wi búruw wìi. A mii nyanbe-nyungbɔɔgaa félege nyaa ní naakpɔʔɔ ní, ki i sóori, a be gi wáa sólomi lòkpɔʔɔ ni. A sólomi lɔ̀ʔɔ tílaya taanri wóʔo fala n kàri sìsyaan, 9sólomi lɔ̀ʔɔ yárira myɛ di nyɛ lè sìi na, a di tílayi taanri wóʔo fala n kùu, a bàtobèle tílaya taanri wóʔo kálagi.
10 #
Eza 14:12
A nyɛ̀ʔɛni tundun-daanri wóo wi búruw wìi. A ŋɔripilaa yìri nyɛ̀ʔɛni na n baa too lókoloyi, ní pùnweegèle tílaya taanri wóʔo na. Li si maa kpɔ́ʔɔ ní i nyín àmɛɛ nìmubwɔɔlɔ náa nyɛ lè. 11#Zyer 9:14 Ŋɔripili bee mɛ́ʔɛ si gi nyɛ Yasorogo. A lǒgi tílaya taanri wóʔo fala n kàri lòsorogo, a syɛ̀ɛnnɛ saʔa kùu lǒgi bee kéele na àmɛɛ gi soro lè.
12 #
Eza 13:10; Ezek 32:7; Zyow 2:10; 3:4; 4:15 A nyɛ̀ʔɛni tundun-sicɛrɛ wóo wi búruw wìi. A Kolocɔlɔɔ fala n cángi tílaya taanri wóʔo kpúmɔn n fàra yégi tílaya taanri wóʔo, ní ŋɔripiigèle tílaya taanri wóʔo na, koro ga pye yi tílayi taanri-daanri wóyo í kàri yébilimɛ, gbɛ̀ɛnmɛ ga pye syɛ́ɛnbèle ma cángi tílaya taanri wóʔo na í, a yégi ní ŋɔripiigèle gbɛ̀ɛnmɛ tílaya taanri wóʔo wɔ́ɔ baa pye ànbée yébiligi làla ni.
13A mii wéle n nyɔɔ̀ nibin nyaa wi i sɔ̀lɔ́ tári ní nyɛ̀ʔɛni nínge ni, ní i gi nyuu ní yákpogbɔɔlɔ ní níì jo: «Wɔʔɔli, wɔʔɔli, wɔʔɔli a tɔ̀nɔ́ ba pye dulunyanw syɛ̀ɛnnɛ na búruw wìizangèlē kéele na, gele nyɛ̀ʔɛni tundunbéle taanri a kɔ́ ba wìi lè.»
Currently Selected:
Tɛ̀ɛnnɛ 8: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
