Tɛ̀ɛnnɛ 9
9
1A nyɛ̀ʔɛni tundun-kagunɔ wóo wi búruw wìi. A mii ŋɔripilaa nyaa a li yìri nyɛ̀ʔɛni na n baa too tári na. A be weecurugi làkile kaan li ma. 2#Sél 19:28 A li fala n weecurugi múgu, a wírige i yirigi gi ni àmɛɛ naakpɔʔɔ wírige nyɛ lè. A weecurugi wírige fala n cángi ní nyɛ̀ʔɛni kàriga yébilimɛ. 3#Yir 10:12-15 A kúdo i yirigi wírigi bee ni ni caragi tári ni, a fànʔa kaan wi ma fǎngee félege gi nyɛ lè náabèle ma tári na. 4#Ezek 9:4 A gi joo wi ma níì wi pye wi a kɔ́ tári nyàā kálagi í, wi a wɔ́ɔ kɔ́ waraa faala, wàlá tiigaa faala kálagi í, kapye syɛ́ɛnbèle yagana ban í, bele be lè Kolocɔlɔɔ fɛ̀ɛ́w o nyɛ pe gbáagèle na lè í. 5A fànʔa kaan wi ma waa be wɔʔɔ bi taa sa nan yeye kagunɔ na, wi si a kɔ́ ra be kúu í, wɔʔɔli wi da ni cáan syɛ́ɛnbèle na lè, li maa pye àmɛɛ náaɔ gáà syɔɔn súu lè. 6#Zyɔb 3:21; Zyer 8:3 Syɛ́ɛnbèle a ba ra kùúw caa cányi bee ni, pe si a wi taa í. Pe a tɔ̀nɔ́ da caa poro í kùu, kàjáa kùúw a ra fé be na.
7 #
Zyow 2:4
Kúdow bee maa syɔɔnyɔ wíri, yee be sámaga n yaʔa lè kapɛɛnkpumɔnri kánma na. Wi myɛ nibin nibin maa fǎngi nyùndɔngéle tɔ́n wi nyúnyi ni, gele ge tɛɛ̀ wòʔolo wíri lè, wi yɛ́ɛyi maa pye àmɛɛ syɛ̀ɛnnɛ yɛ́ɛyɛ nyɛ lè. 8#Zyow 1:6 Wi ǹjoori maa pye àmɛɛ càbala wóro nyɛ lè, á wi gǎngèle càarabēle woʔolo wíri. 9#Zyow 2:5 Kapɛɛnkpumɔn-búroyo maa pye wi na àmɛɛ tunmɔrɔ wóyo nyɛ lè, wi fókaanyi kàfulogo si i nyɛ àmɛɛ wòtoronɛʔɛbéle kafulogo nyɛ lè, bele syɔɔnyɔ kíle ni fé ni syée lè kapɛɛnnɛ ma. 10Nanya maa pye wi na ní syèegēle ní, àmɛɛ náabéle woʔolo nyɛ lè, wi nányi ni fǎngi da pye bàā syɛ́ɛnbèle wɔʔɔ yéyi kagunɔ nínge ni. 11Fànʔafɔlɔ si i nyɛ wi nyúngi na, woro wi nyɛ weecurugi màdeo, wee be yiri lè Heburu-syɛ́ɛnri ni Abadɔn, ní i wi yiri Girɛkiiri ni Apoliyɔn.#9:11 Apoliyɔn: Mɔ ga lóʔo Abadɔn wàlá Apoliyɔn, ki kɔ́rɔw wii syɛɛnkalagiw. Sutanaw si na be nyɛ.
12Wɔʔɔzelili n sɔ̀lɔ n kwɔ́ɔ. Wéle, wɔʔɔgèle kèle siin si i maa lee bee kàdoʔo ma.
13 #
Yir 30:1-3
A nyɛ̀ʔɛni tundun-kɔrɔni wóo wi búruw wìi. A mii yákpolo lóʔo sáriga-wòlo-yafaangi nyɛ́ngéle sicɛrɛ nínge ni, ki nyɛ lè tɛɛ̀ wóʔo, ní i nyɛ Kolocɔlɔɔ yɛ́ʔɛ ma. 14A yákpoli joo ní nyɛ̀ʔɛni tundun-kɔrɔni wóo ní, wee má búruw nyɛ lè, níì jo: «Nyɛ̀ʔɛni tundunbéle sicɛrɛ be nyɛ lè wobwɔɔbéle ní cábikpɔɔgi taana ki lè Ufurati, pe sánʔana.» 15A wi fala n be sánʔana, poro bele be nyɛ lè wozamaga-yaʔabéle ní, lǎli, ní cángi, ní yégi, ní yɛ́ɛli bee kéele na, jàngó pe dulunyanw syɛ̀ɛnnɛ tílaya taanri wóʔo kpóo. 16Sùlasiibèle be tɛ̀ɛ́n syɔ́ɔnyi na lè, a be bele bee nyɔ́ɔ joo n tɛ̀ɛn, a mii gi lóʔo. Pe maa pye sirakamayɛ selebingéle kagunɔ. 17Wéle, gee mii da nyaa lè, ncan mii maa syɔ́ɔnyi nyaa ní yi fànvɔbèle ní. Pe kapɛɛnkpumɔn-búroyi maa nyɛ́nɛgɛ àmɛɛ naà nyɛ lè, ní i wórogi àmɛɛ búula nyɛ lè, ní wɔ́ɔ̀ nyɛ́nɛgɛ àmɛɛ námiige nyɛ lè. Syɔ́ɔnyi nyúnyo si maa càarabēle wóyo wíri. Naà, ní wírige, ní dìrigí si i yirigi yi nyɔ́ɔyi ni. 18A syɛ́ɛnbèle tílaya taanri wóʔo kùu yapeeyi bee taanri báriga ni, gee bee n jo, náagi, ní wírigi, ní dìrigíw wi da ni yirigi lè syɔ́ɔnyi nyɔ́ɔyɔ ni. 19Níì cán syɔ́ɔnyi nyɔ́ɔyɔ ní yi nányi ni yi fǎngi nyɛ. Yi nányi i nyɛ àmɛɛ wàbiya nyɛ lè ní nyùnyo ní, yee ní yi syɛ́ɛnbèle wɔʔɔ lè.
20 #
Ŋún 115:4-7; 135:15-17; Dan 5:23 Syɛ́ɛnbèle bele si be kòro lè, yapeeyi bee ga be taa n kpóo í, pe ga fɔ̀lɔ n kàdoʔo wáa be kɔ́yi yakpéʔelere ma í. Gee bee n jo pe ga fɔ̀lɔ bi láʔa màdebèle, ní yasunyi kpɔ̀ʔɔrɔlɔ na í, yee yi nyɛ lè tɛ́ɛw, wàlá wálifiiw, wàlá kanyɛɛnri, wàlá kàdɛnɛyi, wàlá tíiri, yáriree di nyɛ lè ti o nyaagi í, ti o lúro í, ti si wɔ́ɔ o táanri í. 21Pe ga wɔ́ɔ̀ láʔa be syɛɛnkpoori na í, wàlá be dɛ̀ɛ́gi, wàlá be kanɔnʔɔri, wàlá be kàyuugi na í.
Currently Selected:
Tɛ̀ɛnnɛ 9: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
