Tɛ̀ɛnnɛ 7
7
Isirayɛli syɛ́ɛnbèle sirakamayɛ kɔrɔsiin ní selebingèle siin kéele
1 #
Zyer 49:36; Dan 7:2; Zak 6:5 Koro kàdoʔo ma a mii nyɛ̀ʔɛni tundunbèle pèle sicɛrɛ nyaa woyérebéle ní tári kàbanya sicɛrɛ na, a be tári káfalaya sicɛrɛ cò n yérige, koro ga pye káfalaga a kɔ́ ra funu tári na í, wàlá sólomi lɔ̀ʔɔ na í, wàlá tiigaa faala na í. 2A mii nyɛ̀ʔɛni tundunwaa nikwɔɔ nyaa, a wi yìri canʔafolomɔ ma ni maa ní Kolocɔlɔɔ woweew fɛ̀ɛ ní. A wi yákpogbɔɔlɔ wáa nyɛ̀ʔɛni tundunbéle sicɛrɛ ma, poro bele má pe da fànʔa kaan lè n jo be tári ní sólomi lɔ̀ʔɔ kálagi. 3#Ezek 9:4,6 A wi be pye: «Ki ga yɛlɛ yele í tári, wàlá sólomi lɔ̀ʔɔ, wàlá tíiri kálagi í, bi taa wolo í fɛ̀ɛ kpúmɔn wolo Kolocɔlɔw púlobéle gbáagéle na.» 4Bele na be fɛ̀ɛ́w kpúmɔn lè, a be bele bee nyɔ́ɔ joo n tɛ̀ɛn, a mii gi lóʔo, pe maa pye syɛ̀ɛnnɛ sirakamayɛ kɔrɔsiin ní selebingéle siin, bele na be fɛ̀ɛ́w kpúmɔn lè, bele bee n yiri Isirayɛli syɛɛnfeleyi myɛ ni. 5Zyuda yòdaʔayi syɛ̀ɛnnɛ na pe da fɛ̀ɛ́w kpúmɔn lè, pe maa pye syɛ̀ɛnnɛ selebingéle kɔrɔni.
A Wurubɛn wóbèle pye selebingéle kɔrɔni.
A Gadi wóbèle pye selebingéle kɔrɔni.
6A Azɛɛri wóbèle pye selebingéle kɔrɔni.
A Nɛfitalii wóbèle pye selebingéle kɔrɔni.
A Manase wóbèle pye selebingéle kɔrɔni.
7A Simeyɔn wóbèle pye selebingéle kɔrɔni.
A Levii* wóbèle pye selebingéle kɔrɔni.
A Isakari wóbèle pye selebingéle kɔrɔni.
8A Zabulɔn wóbèle pye selebingéle kɔrɔni.
A Zyozɛfu wóbèle pye selebingéle kɔrɔni.
A Bɛnzyamɛ wóbèle pye selebingéle kɔrɔni,
bele na be fɛ̀ɛ́w kpúmɔn lè.
Córomɔ fun syɛ́ɛnmi kéele
9Koro kàdoʔo ma a mii wéle n syɛɛnnɛʔɛmɛ nyaa, bee bi nyɛ lè syɔɔn faala a gbǎn bi córo í, pi maa yiri syɛɛnfeleyi myɛ ni, ní syɛɛnfeleyi yòdaʔaya myɛ ni, ní dulunyanw syɛ̀ɛnnɛ myɛ ni, ní syɛɛnfeleri joofɔɔlɔ myɛ ni. Pi myɛ si i nyɛ woyéremɛ ní fàngoli ní Bàpili yɛ́ʔɛ ma ní buroviiye ní, sɛ́ʔɛwara si i nyɛ bi kɔ́yi ni. 10A bi i gi nyuu ní yákpogbɔɔlɔ ní níì jo:
«Wolo syɔɔli n yìri Kolocɔlɔɔ ma,
wi lè wodɛ́ɛɔn ní fàngoli na n fàra Bàpili na.»
11Nyɛ̀ʔɛni tundunbéle myɛ si maa pye woyérebéle ní n fàngoli màʔa, n fàra wolɛɛbèle ní sìi yáriyi sicɛrɛ na. A be too fàngoli yɛ́ʔɛ ma n be yɛ́ɛyi cíbele ní i Kolocɔlɔɔ kpɔ̀ʔɔrɔ́, 12ní i gi nyuu níì jo:
«Amiina.
Wolo Kolocɔlɔw na sòololi,
ní nìjangbɔɔri, ní sícilimi,
ní bariga kaanni, ní kpɔ̀ʔɔrɔli,
ní séew, ní bárigaw yɛlɛ làla o làla kwɔ́ɔmɔ fun!
Amiina.»
13A wolɛɛwaa mii yíbe níì jo: «Bele na buroviiyi nyɛ lè bele, bɛ̀lɛ́ be nyɛ bele bee? Ba sán be yìri?» 14#Dan 12:1; Mat 24:21; Mar 13:19 A mii wi yari: «Mii Kàfɔw, mɔ n gi cán n sɔ̀lɔ mii na.» A wi mii yari: «Bele naa be yiri wɔʔɔgbɔɔgi ni níì pe búroyi jée n mùnu Bàpili sìsyaan ni, a yi fílige. 15Gee bee na be nyɛ Kolocɔlɔɔ fàngoli yɛ́ʔɛ ma, ní i wi fáliw kpéʔele canʔa ní yébilige wi kpɔ̀ʔɔrɔli kpaʔa ni. Wee wi tɛ́ɛn lè fàngoli ni, wee bee a wi fànikpaagi tɛ́ʔɛ bi be tɔ́n. 16#Eza 49:10 Kateʔe ní lògbaʔa a ní be jáa í, cángi wàlá káfugaa faala a ní yafyɛn pye be na í. 17#Ŋún 23:1; Ezek 34:23; Ŋún 23:2; Eza 49:10; 25:8 Níì cán Bàpilee li nyɛ lè fàngoli nínge ni, loro li a ra be nàʔá, sáā syée ní be ní sìíw pùnweegéle ma, Kolocɔlɔɔ si a nyatinmi myɛ tùuni bi láʔa pe yɛ́ɛyi na.»
Currently Selected:
Tɛ̀ɛnnɛ 7: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
