Tɛ̀ɛnnɛ 6
6
Fɛ̀ɛ́bèle kéele
1Koro kàdoʔo ma a mii Bàpili nyaa a li fɛ̀ɛ́bèle kɔrɔsiin wozelio múgu, sìi yáriyi sicɛrɛ ni, a mii gi kàa yákpolo lóʔo àmɛɛ nyɛ̀ʔɛni tìnmɛ nyɛ lè, a gi jo: «Da maa.» 2#Zak 1:8; 6:3,6 A mii wéle n syɔɔnfiige nyaa. Wee wi pye gi na lè wodɛ́ɛɔn ní, sedege maa pye wi kɔ́gi ni. A be fǎngi nyùndɔnnɔ kaan wi ma, a wi i syée ní fànʔa ní bi sa wi nigoobèle jáa.
3A Bàpili ga fɛ̀ɛ siin wów múgu, a mii sìi yáriyi siin wóʔo yákpolo lóʔo, a gi jo: «Da maa.» 4#Zak 1:8; 6:2 Lǎli bee ni a mii níì syɔɔngaa nikwɔɔ nyaa, a gi yiri wonyɛnʔɛ ní. Wee si wi pye gi na lè wodɛ́ɛɔn ní, pe maa fànʔa kaan wi ma jàngó wi yɛɛ̀nyingi yirige tári ni, koro ga pye syɛ́ɛnbèle í da peyɛɛ gúu. Pe maa ŋɔséekpɔʔɔ kaan wi ma.
5 #
Zak 6:2,6 A Bàpili ga fɛ̀ɛ taanri wów múgu, a mii sìi yáriyi taanri wóʔo yákpolo lóʔo, a gi joo: «Da maa.» A mii wéle n syɔɔnwɔʔɔ nyaa. Wee si wi pye gi na wodɛ́ɛɔn ní lè, cúlo maa pye wi kɔ́gi ni. 6A mii yákpolo lóʔo, mɔ a jo li n yiri sìi yáriyi sicɛrɛ nínge ni, a li jo: «Canʔa nibin sàra a pye ǹdege cúlo nibin lɔ́rɔ,» ní níì jo: «Canʔa nibin sàra a pye syɔ̀ɔ̄lɔ cúlobéle taanri lɔ́rɔ. Kàjáa mɔ a kɔ́ sǐnmi, wàlá dùvɛɛnw kálagi í.»
7A Bàpili ga fɛ̀ɛ sicɛrɛ wów múgu, a mii sìi yáriyi sicɛrɛ wóʔo yákpolo lóʔo, a gi jo: «Da maa.» 8#Ezek 14:21 A mii wéle n sumiige syɔ́nʔɔ nyaa. Wee si wi pye gi na lè wodɛ́ɛɔn ní, pe i wee bee mɛ́ʔɛ yiri Kùu, á kúbèle tɛɛkòrogo taʔa wi na. A Kolocɔlɔɔ séew kaan be ma pe tári tílaya sicɛrɛ wóʔo kpóo ní ŋɔsée ní, n fàra kateekpɔʔɔ, ní yaagbɔɔmɔ, ní tári yaweere na, ti lè sìnbirigi wóro.
9A Bàpili ga fɛ̀ɛ kagunɔ wów múgu, bele pe da kpóo lè Kolocɔlɔɔ syɛ́ɛnri joolo kéele na, ní be séeraw kpéʔelele kéele na, a mii bele bee pìigēle nyaa sáriga-wòlo-yafaangi láara ni. 10A be yákpogèle wáa gbanʔama níì jo: «Kàfɔzinw, mɔ wi lè kányɛɛgi fɔ́lɔ, làlìí mɔ sige si náa wolo sìsyaanw wolo kútii joo ceri tári syɛ̀ɛnnɛ na, si gi sìndɛɛgi lúrugo be ma?» 11A be buroviiye kaan pe myɛ nibin nibin ma, níì be pye ki n yɛlɛ pe ŋɔ́n daa bi ní làla cɛɛri kwɔ́ɔ bi taa be pulonyɛnbèle ní be senyɛnbèle nyɔɔ í foro, bele be yɛlɛ be kùu lè àmɛɛ poro nigoobèle da be tiimaw kpóo lè.
12 #
Tɛ̀ɛn 11:13; 16:18; Eza 13:10; Zyow 2:10; 3:4; 4:15; Mat 24:29; Mar 13:24-25; Luk 21:25 A Bàpili ga fɛ̀ɛ kɔrɔni wów múgu, a mii tári nyaa, a di cúngo gbanʔama, a cángi kàri wowɔʔɔ ní àmɛɛ gɔ̀nvaʔaga nyɛ lè, gee be tìin ní síiwɔɔrɔ ní lè. A yégi myɛ kàri wonyɛnʔɛ ní àmɛɛ sìsyaan nyɛ lè, 13#Eza 34:4 a nyɛ̀ʔɛni ŋɔ́ripiigéle fala ni yìrigí nyɛ̀ʔɛni na n ba ni tuun tári na, àmɛɛ káfalakpɔʔɔ gáā děsyaan-nìgbere kɔlɔ ni ŋuu lè. 14#Tɛ̀ɛn 16:20 A nyɛ̀ʔɛni wɔ́ɔ̀ fala n kùru n láʔa yaà àmɛɛ pe gáà kàlawaga kùru lè, á nyanbeleyi ní lǒgi nínge tára myɛ yìri n núngo di tɛ́ɛyi ni. 15#Eza 2:19,21 A dulunyanw fànʔafɔɔlɔ, ní syɛɛnkpolobèle, ní sùlasiibèle kàfɔɔlɔ, ní lɔ́ri fɔ̀ɔlɔ, ní syɛɛnniribèle, ní púlobèle myɛ, ní wɔ́rɔbèle myɛ sáà làra nyanbeweeyi ni, ní nyanbeleyi kàdɛnɛgboloyo nínge ni. 16#Oz 10:8; Luk 23:30 A be i yákpogèle wáa nyanbeleyi ní kàdɛnɛyi ma níì jo: «Ki n yɛlɛ ye too wolo na, ye wolo làriga fàngoli tɛ́ɛnfɔlɔ na, ní Bàpili fundanʔara na, 17#Zyow 2:11; Mal 3:2 níì cán pe fundanʔagbɔɔri canʔa n nan, wìí si wi a gbǎn yére di sige?»
Currently Selected:
Tɛ̀ɛnnɛ 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
