Popular Bible Verses from Tɛ̀ɛnnɛ 6

Share

A mii wéle n sumiige syɔ́nʔɔ nyaa. Wee si wi pye gi na lè wodɛ́ɛɔn ní, pe i wee bee mɛ́ʔɛ yiri Kùu, á kúbèle tɛɛkòrogo taʔa wi na. A Kolocɔlɔɔ séew kaan be ma pe tári tílaya sicɛrɛ wóʔo kpóo ní ŋɔsée ní, n fàra kateekpɔʔɔ, ní yaagbɔɔmɔ, ní tári yaweere na, ti lè sìnbirigi wóro.

A mii wéle n syɔɔnfiige nyaa. Wee wi pye gi na lè wodɛ́ɛɔn ní, sedege maa pye wi kɔ́gi ni. A be fǎngi nyùndɔnnɔ kaan wi ma, a wi i syée ní fànʔa ní bi sa wi nigoobèle jáa.

A Bàpili ga fɛ̀ɛ kagunɔ wów múgu, bele pe da kpóo lè Kolocɔlɔɔ syɛ́ɛnri joolo kéele na, ní be séeraw kpéʔelele kéele na, a mii bele bee pìigēle nyaa sáriga-wòlo-yafaangi láara ni.

A be yákpogèle wáa gbanʔama níì jo: «Kàfɔzinw, mɔ wi lè kányɛɛgi fɔ́lɔ, làlìí mɔ sige si náa wolo sìsyaanw wolo kútii joo ceri tári syɛ̀ɛnnɛ na, si gi sìndɛɛgi lúrugo be ma?» A be buroviiye kaan pe myɛ nibin nibin ma, níì be pye ki n yɛlɛ pe ŋɔ́n daa bi ní làla cɛɛri kwɔ́ɔ bi taa be pulonyɛnbèle ní be senyɛnbèle nyɔɔ í foro, bele be yɛlɛ be kùu lè àmɛɛ poro nigoobèle da be tiimaw kpóo lè.

Lǎli bee ni a mii níì syɔɔngaa nikwɔɔ nyaa, a gi yiri wonyɛnʔɛ ní. Wee si wi pye gi na lè wodɛ́ɛɔn ní, pe maa fànʔa kaan wi ma jàngó wi yɛɛ̀nyingi yirige tári ni, koro ga pye syɛ́ɛnbèle í da peyɛɛ gúu. Pe maa ŋɔséekpɔʔɔ kaan wi ma.

níì cán pe fundanʔagbɔɔri canʔa n nan, wìí si wi a gbǎn yére di sige?»

A Bàpili ga fɛ̀ɛ kɔrɔni wów múgu, a mii tári nyaa, a di cúngo gbanʔama, a cángi kàri wowɔʔɔ ní àmɛɛ gɔ̀nvaʔaga nyɛ lè, gee be tìin ní síiwɔɔrɔ ní lè. A yégi myɛ kàri wonyɛnʔɛ ní àmɛɛ sìsyaan nyɛ lè, a nyɛ̀ʔɛni ŋɔ́ripiigéle fala ni yìrigí nyɛ̀ʔɛni na n ba ni tuun tári na, àmɛɛ káfalakpɔʔɔ gáā děsyaan-nìgbere kɔlɔ ni ŋuu lè.

A Bàpili ga fɛ̀ɛ taanri wów múgu, a mii sìi yáriyi taanri wóʔo yákpolo lóʔo, a gi joo: «Da maa.» A mii wéle n syɔɔnwɔʔɔ nyaa. Wee si wi pye gi na wodɛ́ɛɔn ní lè, cúlo maa pye wi kɔ́gi ni. A mii yákpolo lóʔo, mɔ a jo li n yiri sìi yáriyi sicɛrɛ nínge ni, a li jo: «Canʔa nibin sàra a pye ǹdege cúlo nibin lɔ́rɔ,» ní níì jo: «Canʔa nibin sàra a pye syɔ̀ɔ̄lɔ cúlobéle taanri lɔ́rɔ. Kàjáa mɔ a kɔ́ sǐnmi, wàlá dùvɛɛnw kálagi í.»

A nyɛ̀ʔɛni wɔ́ɔ̀ fala n kùru n láʔa yaà àmɛɛ pe gáà kàlawaga kùru lè, á nyanbeleyi ní lǒgi nínge tára myɛ yìri n núngo di tɛ́ɛyi ni. A dulunyanw fànʔafɔɔlɔ, ní syɛɛnkpolobèle, ní sùlasiibèle kàfɔɔlɔ, ní lɔ́ri fɔ̀ɔlɔ, ní syɛɛnniribèle, ní púlobèle myɛ, ní wɔ́rɔbèle myɛ sáà làra nyanbeweeyi ni, ní nyanbeleyi kàdɛnɛgboloyo nínge ni.