Tɛ̀ɛnnɛ 5
5
Sɛ́bɛw ní Bàpili kéele
1 #
Ezek 2:9-10; Eza 29:11 Wee wi tɛ́ɛn lè fàngoli ni, a mii sɛ́bɛ nyaa wi kàliige kɔ́gi ni, pe maa sɛ́bɛ fúngi ni ní kàdogi myɛ na níì wi tɔ́n ní fɛ̀ɛbēle kɔrɔsiin ní. 2A mii nyɛ̀ʔɛni tundunwaa nyaa, báriga wóo, a wi i nyuu yákpogbɔɔlɔ ni níì jo: «Wìí wi nyɔɔ n yɛlɛ bi gbǎn fɛ̀ɛ́bèle naa kabagi, si sɛ́bɛw múgu?»
3Wàa faala ga taa nyɛ̀ʔɛni ni, wàlá tári na, wàlá tári fúngo ni, wee fánʔa wi da pye bi gbǎn sɛ́bɛw múgu, wàlá bi wéle wi ni lè í. 4A mii i nyaan gbanʔama àmɛɛ mii gi nyaa lè wàa faala ga taa, wee wi nyɔɔ n yɛlɛ bi sɛ́bɛw múgu, wàlá bi wéle wi ni lè í. 5#Sél 49:9; Eza 11:1,10 A wolɛɛbèle bee wàa mii pye: «Mɔ a kɔ́ ra nyaan í. Wéle, càarawee wi yiri lè Zyuda narigi ni, wi lè Davidi yòdaʔaga, wee bee n fànʔa taa bi gbǎn fɛ̀ɛ́bèle kɔrɔsiin kabagi si sɛ́bɛw múgu.»
6 #
Eza 53:7; Zak 4:10 A mii bàpile nyaa, li maa pye mɔ a jo pe n li kpóo, kàjáa li n yìri n yére fàngoli nínge ni, á sìi yáriyi sicɛrɛ, ní wolɛɛbèle li màʔa. Nyɛngéle kɔrɔsiin maa pye Bàpili na, ní nyapiigèlē kɔrɔsiin ní, gele ge nyɛ lè Kolocɔlɔɔ pìígèle kɔrɔsiin wi tórigo lè dulunyanw tɛ́ɛyɛ myɛ ni. 7Wee wi nyɛ lè wodɛ́ɛɔn ní fàngoli ni, a Bàpili pan n baa sɛ́bɛw yirige wi kàliige kɔ́gi ni. 8#Ŋún 141:2 Lǎli ni Bàpili sɛ́bɛw syɔɔ lè, a sìi yáriyi sicɛrɛ ní wolɛɛbèle toko ní sicɛrɛ fala n too n pe yɛ́ɛyi cíbele li yɛʔɛ̀ ma, kɔ̀ríbéle maa pye pe myɛ nibin nibin ma n fàra tɛɛ̀ yalegéle na, ke maa nyìn nùndaanna míimɛ na bi lè Kolocɔlɔɔ syɛɛncanbèle nyɛ́ɛriyɛ. 9#Ŋún 33:3; 98:1; Eza 42:10 A be i ŋúnuvɔngɔ ŋúu níì jo:
«Mɔ wi nyɔɔ n yɛlɛ bi sɛ́bɛw syɔɔ, si wi fɛ̀ɛ́bèle múgu,
níì cán pe maa mɔ kpóo,
á mɔ syɛ́ɛnbèle syɔɔ n yaʔa Kolocɔlɔɔ ma
mɔ sisyaanw wolo báriga ni,
poro bele be yiri lè syɛ́ɛnbèle yòdaʔaya myɛ ni,
ní syɛɛnfeleri joofɔɔlɔ myɛ, ní dulunyanw syɛ̀ɛnnɛ myɛ,
ní syɛɛnfeleyi wozanya myɛ ni.
10 #
Yir 19:6; Tɛ̀ɛn 1:6 Mɔ n be kpéʔele wolo Kolocɔlɔw ma fànnyɔɔgaa,
gee ni be nyɛ lè sáriga-wòlobēle,
pe si a ba pye fànʔafɔɔlɔ tári na.»
11 #
Dan 7:10
A mii wéle n nyɛ̀ʔɛni tundunnɛʔɛmɛ nyaa, ní wɔ́ɔ̀ pi joomi lóʔo, a bi fàngoli màʔa n kpàra, n fàra nyɛ̀ʔɛni sìi yáriya ní wolɛɛbèle na, nyɛ̀ʔɛni tundunbéle nyɔɔ maa pye sirakamayɛ sirakama ní selebingéle saʔa. 12A be i gi nyuu ní yákpogbɔɔlɔ ní níì jo:
«Bàpilee pe da kpóo lè,
li n nyɔɔ n yɛlɛ ní séew,
ní lɔnɛʔɛri, ní sícilimi ní,
n fàra bárigaw, ní kpɔ̀ʔɔrɔli,
ní nìjangbɔɔri, ní sòololi na.»
13A mii gi lóʔo Kolocɔlɔɔ kɔ́gi yafaanra myɛ ma di nyɛ lè nyɛ̀ʔɛni ni, ní dee di lè tári na, ní dee di lè tári fúngo ni, ní dee di lè sólomi lɔ̀ʔɔ ni, n fàra yáriri myɛ na di nyɛ lè dulunyanw ni, a di i gi nyuu níì jo:
«Wee wi tɛ́ɛn lè fàngoli ni,
woro ní Bàpili na sòololi,
ní kpɔ̀ʔɔrɔli, ní nìjangbɔɔri,
ní fǎngi yɛlɛ làla o làla kwɔ́ɔmɔ fun!»
14A sìi yáriyi sicɛrɛ i gi nyuu níì jo: «Amiina!» A wolɛɛbèle fala n too n pe yɛ́ɛyi cíbele ní i kpɔ̀ʔɔrɔli kpéʔele.
Currently Selected:
Tɛ̀ɛnnɛ 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
