Tɛ̀ɛnnɛ 21
21
Nyɛ̀ʔɛvɔnni ní táfɔnri kéele
1 #
Eza 65:17; 66:22; 2Pyɛ 3:13 A mii nyɛ̀ʔɛvɔnnɔ ní táfɔnrɔ nyaa. Níì cán nyɛ̀ʔɛzelili ní táseliri n sɔ̀lɔ n kwɔ́ɔ, sólomi lɔ̀ʔɔ ní wɔ́ɔ o yaà í. 2#Eza 52:1; 61:10; Tɛ̀ɛn 3:12 A mii kècǎngi nyaa ki lè Zyerusalɛmifɔnw, a gi yìri nyɛ̀ʔɛni na Kolocɔlɔɔ ma ni tíri wozamagagwɔʔɔ ní, àmɛɛ cefɔɔn gáà wiyɛɛ vère lè wi nǎnw kéele na. 3#Ezek 37:27; Lev 26:11-12 A mii yákpogbɔɔlɔ lóʔo fàngoli ni a li jo: «Wéle, Kolocɔlɔɔ tɛɛkòrogi i nyɛ syɛ́ɛnbèle nínge ni! Wi a kòro ní be ní, pe a pye wi syɛ́ɛnbèle, Kolocɔlɔɔ tiimaa a pye ní be ní, si pye be Kolocɔlɔw. 4#Eza 25:8; 35:10; 65:19 Wi a nyatinmi myɛ tùuni bi láʔa pe nyapiigèle na, kùu a ní pye beè í, wàlá kùu káyaʔa, wàlá sùpiiwáara, wàlá yaama, dee bee tàa faala a ní pye beè í, níì cán yalɛɛri n sɔ̀lɔ n kwɔ́ɔ.»
5Wee wi da tɛ́ɛn lè fàngoli ni, a woro jo: «Wéle, mii i yáriri myɛ sámagi wovɔnrɔ ní.» A wi jo: «Mi gi sɛ́bɛ, níì cán syɛ́ɛnri naa i nyɛ kányɛʔɛ, syɔɔn n yɛlɛ wi tága di na.»
6 #
Eza 55:1
A wi níì mii pye: «Ki n kpéʔele! Mii wi nyɛ Alifa ní Omega,#21:6 Alifa ní Omega: 1:8 wéle. gi Sélimi ní gi Kwɔ́ɔmi. Lògbaʔa ga wee jáa lè, mii a wi kaan wi gbaa sìíw lɔ́ʔɔ pùnweele ni kawaʔa na. 7#2Sam 7:14; Ŋún 89:27-28 Wee si ga fànʔa taa lè, gee bee a pye wi kɔ́rigi. Mii a pye wi Kolocɔlɔw, woro si pye mii pyà. 8Kàjáa fyáari fɔ̀ɔlɔ, ní sìndagabèle, ní syɛɛn-nɔ́nʔɔbèle, ní syɛɛnkpoobèle, ní kanɔnʔɔbyebèle, ní dɛ̀ɛ́bèle, ní yasunzunbèle, ní jànvaafɔbèle myɛ tɛɛkòrogo a pye naakpɔɔgi ni, gee ni dìrigíw sóori lè, gee bee gi nyɛ kùu siin wów.»
Zyerusalɛmifɔnw kéele
9Nyɛ̀ʔɛni tundunbéle kɔrɔsiin pe da yalegèle kɔrɔsiin cò lè, gele ke da nyìn wɔʔɔzanyi kɔrɔsiin na lè, a bele bee wàa pan n baa mii pye: «Da maa, mii a ba cefɔnw tɛ̀ɛn mɔ na, wi lè Bàpili cɔ́ɔ.»
10 #
Ezek 40:2
A wi mii láa n lúrugo pǐli kàbaan na n sáà yérige nyanbe-nyundɔnɔgɔ njoʔo ni, ki maa kpɔ́ʔɔ gbanʔama, níì kècǎngi tɛ̀ɛn mii na, ki lè Zyerusalɛmi, a gi yìri nyɛ̀ʔɛni na Kolocɔlɔɔ ma ni tíri. 11Kolocɔlɔɔ nìjangbɔɔri maa tɔ̀nɔ n gi nyìn, ki gbɛ̀ɛ́nmi maa ni daragi àmɛɛ zyasipi lɔgbanra kadɛɛnnɛ nyɛ lè, lee ni be wéle ni forogi àmɛɛ kirisitali nyɛ lè. 12#Ezek 48:30-35 Tògbɔɔ-tɔ́nɔgɔ maa gi màʔa n kpàra. Kpàánweegéle kɛɛ ní siin si maa pye tǒw na, á nyɛ̀ʔɛni tundunbéle kɛɛ ní siin si i nyɛ kpàánweegèle bee na. Isirayɛli ye féleyi kɛɛ ní siin mɛ́ɛyɛ maa pye ge na wozɛbɛyɛ ní. 13Kpàánweegéle taanri-daanri maa pye kěgi kàbanya myɛ sicɛrɛ na, taanri maa pye canʔafolomɔ ma, a taanri i nyɛ solomɔkulo kàbangi na, a kèle taanri i nyɛ wòrogulo kàbangi na, á gele taanri si i nyɛ canʔajeemɛ ma. 14Kěgi tò kàpɔɔn kàdɛnɛyɛ maa pye kɛɛ ní siin, á be Bàpili pìitunbéle kɛɛ ní siin mɛ́ɛyɛ sɛ́bɛ yi na.
15 #
Ezek 40:3
Wee wi da ni nyuu lè ní mii ní, yatimana-kàgaanna maa pye wi ma, tɛɛ̀ wólo, lee ní wi a kěgi, ní gi kpàánweegèle, ní gi tǒw tímana lè. 16Kěgi kàbanya myɛ sicɛrɛ tɔnɔganma maa pye sèjira, ki tɔnɔganmi ní gi kpɔ́ʔɔganmi maa pye sèjira. A wi kěgi tímana ní wi kàgaanni ní n gi nyaa a gi cúlobéle selebinnɛ ní sirakele félege kwɔ́ɔ. Ki tɔnɔganmi, ní gi kpɔ́ʔɔganmi, ní gi ǹjoʔo ma tɔnɔganmi maa pye sèjira. 17A wi kěgi tò tímana n gi nyaa a wi mɛ́tirinyɛngéle togoye taanri ní kpɔrigɔ ní siin félege kwɔ́ɔ n yɛlɛ ní syɛ́ɛnbèle yatimanaga ní ki nyɛ lè sèjira ní nyɛ̀ʔɛni tunduɔn wóʔo ní. 18#Eza 54:11-12 Tǒw maa faan ní zyasipi lɔgbanra kàdɛɛnnɛ ní, níì kěgi tiimaa faan ní tɛɛteleo ní, wee wi nyɛ́ʔɛnɛ àmɛɛ dùbalecàɔn nyɛ lè. 19Tǒw kàpɔɔn maa fère ní lɔgbanra kadɛɛngèle féleye myɛ ní, kàpɔɔnw kàdɛɛnzelile maa pye zyasipi, siin wóli si i nyɛ safiiri, taanri wóli kaliseduwani, sicɛrɛ wóli emerodi, 20kagunɔ wóli saridoniikisi, kɔrɔni wóli sariduwani, kɔrɔsiin wóli kirizoliiti, kɔrɔtaanri wóli berili, kpanjɛrɛ wóli topazi, kɛɛ wóli kirizopirazi, kɛɛ ní nibin wóli yasɛnti, kɛɛ ní siin wóli amɛtiisi.#21:19-20 Kàdɛɛngèle féleye kàlawaga wéle. 21Kpàánweegèle kɔ̀riyɔ kɛɛ ní siin maa pye lɔgbanra kɔ́nɔpiiye kɛɛ ní siin. Kɔ̀rigɔ o kɔ̀rigɔ maa pye kɔ́nɔpiige nibin. Kěgi nínge kógbɔʔɔ si maa pye tɛɛteleo, wee wi nyɛ́ʔɛnɛ àmɛɛ dùbalecàɔn nyɛ lè.
22Mii si ga kpɔ̀ʔɔrɔlɔ kpaʔa nyaa gi ni í, níì cán Séew Myɛ Kàfɔlɔ wi lè Kolocɔlɔɔ, woro ní Bàpili i nyɛ gi kpɔ̀ʔɔrɔli kpaʔa. 23#Eza 60:19-20 Kěgi màko o nyɛ cángi gbɛ̀ɛnmɛ na í, wàlá yégi wómɔ na í, níì cán Kolocɔlɔɔ nìjangbɔɔri di nyɛ ki gbɛ̀ɛ́nmi, á Bàpili si i nyɛ gi fètinni. 24#Eza 60:3 Syɛɛnfeleyi a ra táanri ki gbɛ̀ɛ́nmi na, tári fànʔafɔɔlɔ sáā maa ní be nìjanri ní bi ba ra légi gi ni. 25#Eza 60:11 Ki kpàánweegèle a ra tɔ́ngi cángi fúngo ni í, níì cán yébilige a pye yaà í. 26Pe a syɛɛnfeleyi nìjanra ní yi kpɔ́ɔmi lége gi ni. 27#Eza 52:1; Ezek 44:9 Yanɔnʔɔgaa faala si a gbǎn jée yaà gi ni nyáana í, bele be Kolocɔlɔɔ kanibɛɛngèle kpéʔele lè, wàlá bele be finɛ lè, bele bee wàa faala a tée jée yaà gi ni í, kawolo bele mɛ́ɛyɛ yi sɛ́bɛ lè Bàpili sìi sɛ́bɛ ni.
Currently Selected:
Tɛ̀ɛnnɛ 21: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
