Tɛ̀ɛnnɛ 22
22
1 #
Ezek 47:1; Zak 14:8 A nyɛ̀ʔɛni tunduɔn fala n sìíw lɔ́ʔɔ cábiga tɛ̀ɛn mii na, ki maa ni nyɛ́ʔɛnɛ àmɛɛ kirisitali nyɛ lè, ní i yirigi Kolocɔlɔɔ ní Bàpili fàngolo ni, 2#Sél 2:9; Ezek 47:12 ni fóo ni syée kěgi kàlari-kólogo nínge ni. Sìíw tíige maa pye cábigi jeligɔyɔ siin na, tíigi bee i yasanveleye kɛɛ ní siin sangi yɛɛlɛ o yɛɛlɛ, gee bee n jo, yeʔe o yeʔe ní gi yasanvelege. Tíigi wára si i nyɛ bàā syɛɛnfeleyi poori.
3 #
Zak 14:11
Dánga yárigaa faala a ní pye kěgi ni nyáana í. Kolocɔlɔɔ ní Bàpili fàngolo si a pye yaà gi ni, wi púlobèle sáā wi fáliw kpéʔele. 4Pe a ra wi yɛ́ɛgi nyaagi, wi mɛ́ɛgi si pye wozɛbɛgɛ ní pe gbáagèle na. 5#Eza 60:19; Dan 7:18 Yébilige a ní pye yaà í, pe màko a ní pye fètinnɛ gbɛ̀ɛnmɛ na í, wàlá cángi wómɔ na í, níì cán Kàfɔw Kolocɔlɔɔ a ra gbɛ̀ɛ́nmi yirigi be ma. Pe a pye fànʔafɔɔlɔ làla o làla kwɔ́ɔmɔ fun.
Zyezu panni kéele
6A nyɛ̀ʔɛni tunduɔn gi joo mii ma níì jo: «Syɛ́ɛnri naa i nyɛ kányɛʔɛ, syɔɔn n yɛlɛ wi tága di na. Kàfɔw Kolocɔlɔɔ wi kanyaajoobèle pìigēle kàragí lè, woro wi wi tundunw tun wi ba kérigèle naa tɛ̀ɛn woro púlobèle na, gele ge lè ke a ní mɔn si kpéʔele í.»
7Zyezu n jo: «Wéle, cɛɛri ga pye mii a pan. Wee wi ga kanyaajoori naa sɛ́bɛ syɛ́ɛnrɛ kɔn lè ní i di kpéʔele, wee bee i nyɛ dùba pyà!»
8Mii Zyan, mii n kérigèle naa lóʔo ní wɔ́ɔ̀ ge nyaa. Ke lóʔoli ní ge nyaagwɔɔli kàdoʔo ma, a mii sáà too nyɛ̀ʔɛni tunduɔn taana jàngó bi wi kpɔ̀ʔɔrɔ, woro wee wi ge tɛ̀ɛn mii na lè. 9A wi si mii pye: «Tíi, mɔ a kɔ́ koro kpéʔele í! Mii i nyɛ mɔ ní mɔ senyɛnbèle púlonyɛnnɛ, poro bele be nyɛ lè kanyaajoobèle, n fàra bele na be sɛ́bɛw naa syɛ́ɛnrɛ kɔn ní i di kpéʔele lè. Da Kolocɔlɔɔ kpɔ̀ʔɔrɔ́!»
10A wi níì mii pye: «Mɔ a kɔ́ fɛ̀ɛ taʔa kanyaajoori naa sɛ́bɛ syɛ́ɛnrɛ na bi di làriga í, níì cán ti làrivoroli n nùuni. 11#Dan 12:10 Wee wi kolo lè, ki n yɛlɛ wi kòro wi kolomi ni, wee wi nɔ́nʔɔ lè, ki n yɛlɛ wi kòro wi nɔ́nʔɔri ni, wee wi sín lè, ki n yɛlɛ wi kòro wi sínni ni, wee wi nyɛ lè Kolocɔlɔɔ syɛɛncaɔn, ki n yɛlɛ wi kòro wi cǎnmi ni.
12 #
Eza 40:10; 62:11; Ŋún 28:4; Zyer 17:10 Wéle, cɛɛri ga pye mii a pan, mii si a pan ní sàraw ní wi nyɛ mii ma lè, bi ba syɛ́ɛnbèle myɛ nibin nibin sàra bi yɛlɛ ní be fáliw ní. 13#Tɛ̀ɛn 1:8,17; 2:8; Eza 44:6; 48:12 Mii wi nyɛ Alifa ní Omega,#22:13 Alifa ní Omega: 1:8 wéle. Yɛɛ̀kiniw ní Kàdotɔnw, Sélimi ní Kwɔ́ɔmi.
14 #
Sél 2:9; 3:22 Bele be be fànibèle jée lè koro ga pye poro í lɛɛlɛ taa sìíw tíige ni, si wɔ́ɔ gbǎn jée kěgi kpàánweegéle ni lè, bele bee i nyɛ dùba pìibēle! 15Bele si be kòro lè kàfugi na, poro be nyɛ pɔ́nbèle, ní dɛ̀ɛ́bèle, ní kanɔnʔɔbyebèle, ní syɛɛnkpoobèle, ní yasunzunbèle ní, n fàra bele myɛ na jànvaaw dɛ́nɛ lè, a be i finɛ.
16 #
Eza 11:1,10 Mii Zyezu wi mii nyɛ̀ʔɛni tunduɔn tun jàngó wi sa kérigèle bee séera joo Egilizibèle ma. Mii wi nyɛ Davidi nǐnri, ní wi yòdaʔagi, mii wi nyɛ Nyǐndaliŋɔni, lee li nyín lè gbanʔama.»
17 #
Eza 55:1
Pìicǎnni ní cefɔnw i gi nyuu níì jo: «Da maa!» Bele be di lúro lè, ki n yɛlɛ paa gi nyuu si jo: «Da maa!» Lògbaʔa ga wee jáa lè, ki n yɛlɛ waa maa. Wee wi ga ni sìíw lɔ́ʔɔ caa lè, wi a gi taa kawaʔa na!
Syɛɛnsanri kéele
18 #
Làlw 4:2; 13:1 Bele be kanyaajoori naa sɛ́bɛ syɛ́ɛnrɛ lúro lè, mii a gi joo gbàn bele bee myɛ ma si jo, syɔ́ɔnwee faala wi ga syɛɛnraa taʔa di na lè, wɔʔɔyee kéele li sɛ́bɛ lè sɛ́bɛw naa ni, Kolocɔlɔɔ a yee bee taʔa syɔ́ɔnw bee na. 19Syɔ́ɔnwee si ga zǐn tàa yirige kanyaajoori naa sɛ́bɛ syɛɛnrɛ ni lè, Kolocɔlɔɔ a wɔ́ɔ wee bee lɛɛlɛ yirige sìíw tíige ni si wɔ́ɔ li yirige kècǎngi ni, dee kéele li sɛ́bɛ lè sɛ́bɛw naa ni.
20Wee wi kérigèle naa séera kpéʔele lè, woro wi gi joo níì jo: «Ɛɛn, cɛɛri ga pye mii a pan.»
«Amiina! Da maa Kàfɔw Zyezu!»
21Ki n yɛlɛ Kàfɔw Zyezu í wi kpɔ́ʔɔri kaan syɛ́ɛnbèle myɛ ma!
Currently Selected:
Tɛ̀ɛnnɛ 22: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
