Tɛ̀ɛnnɛ 20
20
Yɛ́ɛgèle saala kagunɔ kéele
1A mii nyɛ̀ʔɛni tundunwaa nyaa a wi yiri nyɛ̀ʔɛni ni ni tíri, weecurugi làkile maa pye wi ma kɔ́gi ni n fàra nyɔ̀ʔɔdirige na. 2#Sél 3:1 A wi baa yacobeegi cò, ki lè wàbilɛɛgi pe yiri lè Dàzɔɔnw, ní Sutanaw, n gi pwɔɔ n yaʔa jàngó ki yɛ̀ʔɛlɛ saala kagunɔ kwɔ́ɔ. 3Amɛɛ wi gi pwɔɔ lè, a wi gi wáa weecurugi ni, níì làkilew tɛ́ʔɛ n wéegi sɔ̀ʔɔ níì fɛ̀ɛ kpúmɔn gi na, koro ga pye yacobeegi a kɔ́ yiri gi ni bi ní da syɛɛnfeleyi fáana í, bi taa yɛ́ɛgèle saala kagunɔ í ba kwɔ́ɔ. Koro kàdoʔo ma pe a gi yirige yaʔa ki làla cɛɛri kwɔ́ɔ.
4 #
Dan 7:9,22 A mii fàngorigēle nyaa. Bele pe da pye ge na lè wodɛ́ɛnbéle ní, a be fànʔa kaan bele bee ma paa kútiiw nyuu. Bele nyúnyo pe da cɛnɛ lè Zyezu séeraw kpéʔelele kéele na, ní Kolocɔlɔɔ syɛ́ɛnri kéele na, àmɛɛ be nyɛ lè pe da fɔ̀lɔ ni yaweegi ní ki niwirigi kpɔ̀ʔɔrɔ́ lè í, pe si da wɔ́ɔ̀ fɔ̀lɔ be gi fɛ̀ɛ́w kpúmɔn poro gbáagèle na, wàlá poro kɔ́yi na lè í, a mii bele bee nyaa, a be nyán níì tɛ́ɛn fǎngi na ní Kirisi ní yɛ̀ʔɛlɛ saala kagunɔ. 5Kúsanbèle si da nyán í, fwɔɔ bi taa yɛ́ɛgèle saala kagunɔ í ba foro. Lee bee li nyɛ kúbèle nyán-yiri-zélile. 6Bele be lɛɛlɛ taa lè kúbèle nyán-yiri-zélile ni, bele bee i nyɛ dùba pìibēle, ní Kolocɔlɔɔ syɛɛncanbéle! Kùu siin wów a fànʔa taa bele bee wàa na í, pe a pye Kolocɔlɔɔ ní Kirisi sáriga-wòlobēle, si pye fǎngi na ní wi ní yɛ́ɛgèle saala kagunɔ.
Sutanaw jáala
7Yɛ́ɛgèle saala kagunɔ ga baa foro lǎlee ni lè, pe a Sutanaw sánʔa yirige wi kàsow ni. 8#Ezek 7:2; 38:2,9,15 Wi si a kári sa tári kàbanya sicɛrɛ syɛɛnfeleye fáana, gee bee n joo Gɔgi, ní Magɔgi,#20:8 Gɔgi ní Magɔgi: Mɔ ga lóʔo Gɔgi ní Magɔgi, dulunyanbow sìndagabéle na be nyɛ. jàngó bi be kpóʔoro kapɛɛnkpumɔnri kéele na. Pe n nɛʔɛ àmɛɛ sólomi lɔ́ʔɔ kàgomɔ táminyɔɔ nyɛ lè. 9A be tári myɛ tɔ́n ni maa n baa Kolocɔlɔɔ syɛɛncanbèle tɛɛkòrogo màʔa n kpàra ki lè wi kènidaamagi. A naà fala n yìri nyɛ̀ʔɛni na n tìgi n baa too be na n be sórigo mɛnɛ mɛnɛ. 10A be fala n Dàzɔɔnw cò n wáa náagi ni gee ni dìrigíw sóori lè, woro wee wi da ni be fáana lè, tɛɛgee ni yaweegi ní kanyaajoo-fáanaw nyɛ lè. Pe a ra wɔʔɔ yaà canʔa ní yébilige làla o làla kwɔ́ɔmɔ fun.
Kútiisanw joolo kéele
11 #
Dan 7:9-10
A mii fàngolo nyaa, li maa kpɔ́ʔɔ níì fílige, wàa si i nyɛ li ni wodɛ́ɛɔn ní. Tári ní nyɛ̀ʔɛni maa ni fé wi yɛ́ɛgi na bi làra, kàjáa ti ga tɛɛlaraga taa í. 12Kúbèle be nyɛ lè wogbolobèle n fàra woyilibèle na, a mii bele bee nyaa woyérebéle ní fàngoli yɛ́ʔɛ ma. A fàngoli tɛ́ɛnfɔlɔ fala n sɛ́bɛbéle múgu, a wi níì sɛ́bɛwaa nikwɔɔ múgu, wee wi nyɛ lè sìíw sɛ́bɛ. A wi kúbèle kútii joo n yɛlɛ ní be kapyegèle ní, gele ge sɛ́bɛ lè sɛ́bɛbèle bee ni. 13Bele myɛ pe da kùu lè sólomi lɔ̀ʔɔ ni, a gi bele bee yirige n kaan kútiiw ma, a kùúw ní kúbèle tɛɛkòrogo be wóbèle kaan kútiiw ma, a fàngoli tɛ́ɛnfɔlɔ pe myɛ nibin nibin kútii ceri n yɛlɛ ní pe kapyegèle ní, 14níì fala n kùúw ní kúbèle tɛɛkòrogo wáa naakpɔɔgi ni. Naakpɔɔgi bee gi nyɛ kùu siin wów. 15Syɔ́ɔnwee mɛ́ʔɛ ga pye ki ga nyaa wozɛbɛgɛ ní sìíw sɛ́bɛ ni lè í, pe n wee bee fɔ́lɔ wáa naakpɔɔgi ni.
Currently Selected:
Tɛ̀ɛnnɛ 20: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
