Tɛ̀ɛnnɛ 19

1Kérigèle bee nyaana kadoʔo ma a mii syɛɛnnɛʔɛmɛ yákpowáara lóʔo nyɛ̀ʔɛni ni, a bi pínɛ n gi joo níì jo:

«Aleluya!

Syɔɔli, ní nìjangbɔɔri, ní séew i nyɛ wolo Kolocɔlɔw ma,

2 # Làlw 32:43; 2Fàn 9:7 níì cán wi kútiijoori di nyɛ kányɛɛgi wóro, níì sín.

Wi n nànjaa-cepeew kútii ceri,

woro wee wi da tári myɛ nyìn ní wi kanɔnʔɔri ní lè,

níì wi púlobèle sìsyaan wolo gɔlɔ́ wòlo ní wi kɔ́gi ní.»

3 # Eza 34:10 A be níì gi joo tɔziin wógi na níì jo:

«Aleluya!

Wi sógili wírige si gi yìrigí gee,

làla o làla kwɔ́ɔmɔ fun.»

4Kolocɔlɔɔ wi nyɛ lè wodɛ́ɛɔn ní fàngoli na, a wolɛɛbèle toko ní sicɛrɛ, ní sìi yáriyi sicɛrɛ too n pe yɛ́ɛyi cíbele wi taana n wi kpɔ̀ʔɔrɔ níì jo:

«Amiina! Aleluya!»

Bàpili cèpɔrigɔ liile kéele

5 # Ŋún 115:13 A mii yákpolo lóʔo fàngoli ni a li jo:

«Yaa wolo Kolocɔlɔw sòoló,

yele bele myɛ ye nyɛ lè wi púlobèle ní i wi fɛ̀ɛgí,

n woyilibèle fàra wogbolobèle na!»

6 # Ezek 1:24; Ŋún 93:1; 97:1; 99:1 A mii joomɔ lóʔo àmɛɛ syɛɛnnɛʔɛmɛ wómɔ nyɛ lè, ní àmɛɛ lònɛʔɛgɛ tinmɛ nyɛ lè, ní àmɛɛ nyɛ̀ʔɛvōlogèle tingbɔɔmɔ nyɛ lè, a bi jo:

«Aleluya!

Níì cán wolo Kàfɔw Kolocɔlɔɔ wi lè Séew Myɛ Kàfɔlɔ,

wi n tɛ́ɛn wi fǎngi na.

7Ki n yɛlɛ waa fundaanra kpéʔele, wáā muguri,

wáā kpɔ́ʔɔri taari wi na,

níì cán Bàpili cèpɔrigɔ lala n nan,

a li cefɔnw wiyɛɛ zámaga n kwɔ́ɔ.

8A be burogo kaan wi ma,

lɛn fànifɛɛlɛfɛɛlɛɔ wóʔo,

a wi le, gee gi fílige lè kere kere.»

Lɛn fànifɛɛlɛfɛɛlɛw wi nyɛ Kolocɔlɔɔ syɛɛncanbèle kasinbyere.

9 # Mat 22:2-3 A nyɛ̀ʔɛni tunduɔn mii pye: «Ki sɛ́bɛ mi jo: ‹Bele Kolocɔlɔɔ yeri Bàpili cèpɔrigɔ liile na lè, bele bee i nyɛ dùba pìibēle!› » A wi níì mii pye: «Dee naa di nyɛ Kolocɔlɔɔ kányɛɛgi syɛ́ɛnrɛ.»

10A mii fala n too wi taana jàngó bi wi kpɔ̀ʔɔrɔ, a wi mii pye: «Tíi, mɔ a kɔ́ koro kpéʔele í! Níì cán mii i nyɛ mɔ ní mɔ senyɛnbèle púlonyɛnwaa, poro bele má Zyezu séeraw nyɛ lè. Da Kolocɔlɔɔ kpɔ̀ʔɔrɔ́! Zyezu séeraw wi nyɛ kanyaajoori joolo nyúngo.»

Syɔɔnfiigi tɛ́ɛnfɔlɔ kéele

11 # Ezek 1:1; Ŋún 96:13; Eza 11:4 A mii nyɛ̀ʔɛni nyaa womúgulo ní, níì syɔɔnfiige nyaa li ni. Wee wi pye gi na lè wodɛ́ɛɔn ní, pe i wi yiri Tágala Syɔ́ɔn ní Kányɛɛgi, wi kútiijoori ní wi kapɛɛnkpumɔnri n sín. 12#Dan 10:6 Wi nyapiigèle si i nyɛ àmɛɛ naanyìnge nyɛ lè, á wi fànʔafɔ-nyùndɔngéle* saʔa tɔ́n wi nyúngi ni. Mɛ́ʔɛ si i nyɛ wi na wozɛbɛgɛ ní, gee gi nyɛ lè wàa faala ga gi cán í, kapye woro nibin ban í, 13burogo si i nyɛ wi na, gee be cáan n yoro lè sìsyaan ni. Wi mɛ́ɛgi gi nyɛ Kolocɔlɔɔ Syɛ́ɛnri. 14A nyɛ̀ʔɛni sùlasiibéle taʔa wi na ní i nyɛ wodɛ́ɛnbéle ní syɔɔnfiiyaa na. Pe si maa lɛn fànifɛɛlɛfɛɛlɛɔ búroyo le, yee yi fílige lè ní i nyɛ fɔɔnrɔ fun. 15#Ŋún 2:9; Eza 63:3; Zyow 4:13; Tɛ̀ɛn 14:20 Ŋɔséetànʔa si i yirigi wi nyɔ́ɔgi ni, gee ní wi a ra syɛɛnfeleyi kpúmɔn lè. Wi a ra be nàʔá ní tunmɔrɔ kàgbeele ní, sáā ɛrɛzɛnw tánʔana Séew Myɛ Kolocɔlɔɔ fundanʔagbɔɔri ɛrɛzɛn tɛɛnùgugo ni. 16Mɛ́ʔɛ maa pye wozɛbɛgɛ ní wi búrogi, ní wi cèsiinyungi na, pe i gi yiri: FANʔAFƆBELE FANʔAFƆLƆ, ní KAFƆBELE KAFƆLƆ.

17 # Ezek 39:17-20 A mii nyɛ̀ʔɛni tundunwaa nibin nyaa a wi yére cángi fúngo ni, ní i yákpogbɔɔlɔ wáa féjɛɛnri myɛ ma di sɔ̀lɔ́ lè ǹjogi ni níì jo: «Yaa maa ye ba yeyɛɛ gbóʔoro Kolocɔlɔɔ lìigbɔɔli kánma na, 18ye ba ra fànʔafɔbèle cére jóori, ní sùlasiibèle kàfɔɔlɔ cére, ní syɛɛnniribèle cére, ní syɔ́ɔnyi cére ní, n fàra yi tɛ́ɛnfɔbèle wóro na, ní wɔ́rɔbèle myɛ cére ní, n fàra púlobèle myɛ wóro na, n syɛɛn-yilibèle pínɛ syɛɛnkpolobèle ni.»

19A mii yaweegi nyaa, ní tári fànʔafɔɔlɔ, ní be sùlasiibèle ní, a be peyɛɛ gbóʔoro bi ba kapɛɛnni kpúmɔn ní syɔ́ɔngi tɛ́ɛnfɔlɔ ní, n fàra wi sùlasiibèle na be nyɛ ní wi ní lè. 20#Tɛ̀ɛn 13:1-18 A wi fala n yaweegi cò n fàra kanyaajoo-fáanaw na, woro wee wi da ni fɛ̀ɛ́bèle kpéʔele lè ki yɛʔɛ̀ ma, fɛ̀ɛ́bèle bele báriga ni wi da ni syɛ́ɛnbèle fáana, bele na yaweegi fɛ̀ɛ da pye lè, ní bele pe da ni ki niwirigi kpɔ̀ʔɔrɔ́ lè. A syɔ́ɔngi tɛ́ɛnfɔlɔ fala n be siinw wáa woweebèlē ní naakpɔɔgi ni gee ni dìrigíw sóori lè, 21níì wozanbèle kpóo ní ŋɔséew ní wi yirigi lè wi nyɔ́ɔgi ni, a féjɛɛnri myɛ jɔ́ɔ n tín be céri na.

Currently Selected:

Tɛ̀ɛnnɛ 19: CB10

Highlight

Copy

Compare