Heburubèle 4
4
1Koro na, àmɛɛ Kolocɔlɔɔ da ŋɔ́ndaali jéele nyɔ́ɔ fàli lè, á nyɔɔfaligi bee kòro wolo ma lè, ki n yɛlɛ waa kɔ̀rɔsíi jàngó yele wàa faala a kɔ́ fɔ̀n ŋɔ́ndaali bee ni í. 2Níì cán àmɛɛ bele bee da Syɛɛnjóocǎnri lóʔo lè, kánmi bee na wolo wɔ́ɔ̄ di lúro. Kàjáa ti lóʔoli da pye ní tɔ̀nɔ ní be ma í, níì cán ti lóʔofɔbèle da tága di na í. 3#Ŋún 95:11 Wolo bele wo nyɛ lè tágafɔbèle, wolo i jǐn ŋɔ́ndaali ni, lee kéele Kolocɔlɔɔ da joo lè níì jo: «Amɛɛ mii fúngi da tanʔa lè, koro na mii da kàli níì jo pe a jée mii ŋɔ́ndaali ni nyáana í.»
Bi gi taa wi maa wi fáliw kwɔ́ɔ nlaa yaà dulunyanw sélimɛ na. 4#Sél 2:2 Níì cán wi n gi joo sɛ́bɛw tɛ́ɛgaa ni canya kɔrɔsiin wógi kéele na níì jo: «Kolocɔlɔɔ maa wi fáliw myɛ foro níì ŋɔ́n n daa canya kɔrɔsiin wógi na.» 5#Ŋún 95:11 Ní wɔ́ɔ̀ gi joo níì jo: «Pe a tée jée mii ŋɔ́ndaali ni nyáana í.» 6Gee bee na àmɛɛ gi kòro lè pèle ma pe jée li ni, ní àmɛɛ booma Syɛɛnjóocǎnri lóʔofɔɔlɔ céemɛ da be kaan lè pe ga gbàn n jée li ni í, 7#Ŋún 95:7-8 koro na Kolocɔlɔɔ cangaa nikwɔɔ tɛ́ʔɛ, gee be yiri lè «Níjanʔa.» Làla saʔa maa sɔ̀lɔ n taʔa céemi làla na, á Kolocɔlɔɔ náà gi le Davidi nyɔ́ɔgi ni, a wi gi joo àmɛɛ Kolocɔlɔɔ da sélì gi joo lè níì jo:
«Yele ga Kolocɔlɔɔ yákpoli lóʔo níjanʔa,
ki ga yɛlɛ yele í yele fúnyi gbàn í.»
8 #
Làlw 31:7; Zyoz 22:4 Kapye Zyozuwe maa ŋɔ́ndaali kaan be ma, Kolocɔlɔɔ mǎà dée ní cangaa nikwɔɔ kéele joo koro kàdoʔo ma í. 9Koro na canya kɔrɔsiin wógi ŋɔ́ndaala kòro Kolocɔlɔɔ syɛ́ɛnbèle tɛ́ʔɛmɛ ni. 10#Sél 2:2 Níì cán wee wi jée lè Kolocɔlɔɔ ŋɔ́ndaali ni, wi n wɔ́ɔ̀ ŋɔ́n n daa wi fáliw na àmɛɛ Kolocɔlɔɔ tiimaa da ŋɔ́n n daa wi wów na lè. 11Koro na gi yɛlɛ wolo í da ŋàʔaná gbanʔama jàngó wàa faala a kɔ́ bɔ̀nɔ li jéeli ni céemi bee pàa félege báriga ni í.
12Níì cán Kolocɔlɔɔ syɛ́ɛnri i nyɛ woweere ní, ní i báara, ti n tɛ́nɛ n sɔ̀lɔ nyɔɔyɔ siin-ziin ŋɔséebèle myɛ na. Alí ti i fúngi ní pǐli cɛnɛ ni láari tiyɛɛ na, ní i kaceleyi tɛɛsogiyo, ní yi pìremi láari tiyɛɛ na wɔ́ɔgēle. Ti i syɔɔn sɔnguri ní wi fúngi kakɔrirɔgēle sɛʔɛ ni wéle. 13Kolocɔlɔɔ yakpéʔelegaa faala a gbǎn làra wi na í, ti myɛ i nyɛ yatɔngɔ fun, ní wɔ́ɔ i nyɛ tɛɛlaraga fun wi yɛʔɛ̀ ma, woro wee má wolo yɛlɛ bàā wolo kérigèle fíligi da nyuu lè.
Zyezu wi nyɛ sáriga-wòlobèle kàfɔgbɔɔɔ
14Sáriga-wòlobèle kàfɔgbɔɔɔ i nyɛ wolo ma, wee wi jée n foro nyɛ̀ʔɛgèle ni lè, woro wi nyɛ Zyezu, wi lè Kolocɔlɔɔ Jáaw, gee bee na gi yɛlɛ wolo í tágali sámaga cò, lee séera wolo kpéʔele lè. 15Ki o nyɛ mɔ a jo wolo sáriga-wòlobèle kàfɔlɔ a gbǎn nyinimɛ taa wòlo na wolo fànʔa-fǔnmi ni wii í. Sutanaw maa ni wi kárima àmɛɛ wi wolo kárima lè kánmi féleye myɛ na, wi si da kapeele kpéʔele í. 16Gee bee na wolo màko ga pye dɛ̀ɛmɛnɛ na lǎlee ni lè, ki n yɛlɛ wo nùuni ní nànzorodo ní fàngoli fɔ́lɔ na, woro wee wi kpɔ́ʔɔri kaangi lè, koro ga pye wi nyinimɛ taa wolo na si kpɔ́ʔɔri kaan wolo ma lǎli bee ni.
Currently Selected:
Heburubèle 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
