Heburubèle 5
5
1Sáriga-wòlobèle kàfɔlɔ o kàfɔlɔ Kolocɔlɔɔ ga nyɛ́nɛ n wòlo lè syɛ́ɛnbèle nínge ni, wi n wi télege be kéeli na waa woro fáliw kpéʔele, koro ga pye bàā yakaanyi kaangi, si wɔ́ɔ ra sárigaw wóo be kapeegèle kéele na. 2Amɛɛ wi tiimaw nyɛ lè fànʔa fun, koro na bele be nyɛ lè kanaa-sìnjánbéle ní i pùuní lè, wi a wɔ́ɔ gbǎn ra bele bee dɛ̀ɛmɛ́. 3#Lev 9:7 Gee bee na wi yɛlɛ waa sárigaw wóo wi tiimaa kapeegèle kéele na bi fàra syɛ́ɛnbèle wòʔolo na. 4#Yir 28:1 Syɔɔn faala a gbǎn jée kpɔɔmɔ fáliw bee ni wiyɛɛ ma í, fwɔɔ Kolocɔlɔɔ ga wee yeri lè, àmɛɛ wi da Aarɔn yeri lè.
5 #
Ŋún 2:7
Anbée Kirisi da wɔ́ɔ̀ pye, woro ban wi da wiyɛɛ gbɔ́ʔɔ n pye sáriga-wòlobèle kàfɔlɔ í, kàjáa Kolocɔlɔɔ wi da wi kpéʔele sáriga-wòlobèle kàfɔlɔ, woro wee wi da gi joo wi ma lè níì jo: «Mɔ wi nyɛ mii Jáaw, mii wi mɔ see níjanʔa.» 6#Ŋún 110:4 Kánmi bee na wi wɔ́ɔ̀ gi joo sɛ́bɛw tɛ́ɛgaa ni níì jo: «Mɔ i nyɛ sáriga-wòloo làla o làla n yɛlɛ ní Mɛlikizedɛki félegi ní.»
7 #
Mat 26:36-46; Mar 14:32-42; Luk 22:39-46 N Kirisi yaʔa sìi na wi céri ni, wi maa Kolocɔlɔɔ nyɛ́ɛri gbanʔama, níì gi cán wi a gbǎn woro syɔɔ kùúw ma. Wi maa wi nyɛ́ɛri ní yákpowáara, ní nyatinmɛ ní, a Kolocɔlɔɔ wi nyɛ́ɛrigi lóʔo àmɛɛ wi fɛ̀ɛgí lè woro na. 8Amɛɛ wi wírē nyɛ lè Jaafɔw, wɔʔɔyi yi too wi na lè, yoro n wi tama a wi gi cán àmɛɛ gi yɛlɛ lè woro í da lúro Kolocɔlɔɔ ma. 9Amɛɛ si Kolocɔlɔɔ wi sámaga n foro lè, a wi baa pye bàngwɔɔ syɔɔlɔ sábabu bele myɛ ma be lúro wi ma lè. 10Kolocɔlɔɔ n wi nyɛ́nɛ n wòlo n kpéʔele sáriga-wòlobèle kàfɔlɔ n yɛlɛ ní Mɛlikizedɛki félegi ní.
Sàmina, bi wo syɔɔ tágali céele kagbanna ma
11Syɛɛnrɛ saʔa i nyɛ wolo ma bi joo kéeli naa na, dee kɔ́rɔ wi a cánma bɛɛn yele ma lè, àmɛɛ yele líiweegèle baa pɛɛn lè. 12#1Kor 3:2 Níì cán nlaa yaà làridɔɔnnɔ ni yele maa yɛlɛ bi dée pye tamafɔɔlɔ bi kwɔ́ɔ, kàjáa a yele náà séli n pye wàa í da yele tama Kolocɔlɔɔ syɛ́ɛnri tamazelile na, yele láa sèʔé i nyɛ yiremɛ na, yaliinirire na ban í. 13Syɔɔn o syɔɔn si wi yíremi ŋɔri lè, wee bee ga kɔ́ɔ̀ sínni syɛ́ɛnrɛ cán n wàli í, níì cán wi i nyɛ pyà. 14Kàjáa yaliiniriri i nyɛ wolɛɛbèle wóro, poro bele be tàli lè gi na ni peyɛɛ sɔ̀nguri kɔ̀rɔsíi koro ga pye bàā sínni ní kolomi cángi da láʔala.
Currently Selected:
Heburubèle 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
