Heburubèle 3
3
Zyezu n kpɔ́ʔɔ n sɔ̀lɔ Mowizi na
1Gee bee na, mii senyɛnjǎnbèle, yele bele Kolocɔlɔɔ wɔ́ɔ̀ yeri lè, ki n yɛlɛ ye yele sɔ̀ngumi myɛ taʔa Zyezu na, woro wi nyɛ pìitunw ní sáriga-wòlobèle kàfɔlɔ wolo tágali kéele na, lee wo nyuu ni tèé lè. 2#Cór 12:7 Wi maa pye tágala syɔ́ɔn Kolocɔlɔɔ ma woro wee wi nyɛ lè wi télegefɔw, àmɛɛ Mowizi da wɔ́ɔ̀ pye lè tágala syɔ́ɔn Kolocɔlɔɔ kpáagi tɛ́ɛyɛ myɛ ni lè. 3Amɛɛ kpaafaaɔn kpɔ́ʔɔri nɛʔɛ n sɔ̀lɔ lè kpáagi wóro na, gee wi faan lè, ànbée Kolocɔlɔɔ Zyezu córo wi n yɛlɛ ní kpɔʔɔrɔ ní n sɔ̀lɔ Mowizi na. 4Níì cán kpaʔa o kpaʔa mɔ nyaa lè, syɔɔn wi gi faan. Kàjáa wee si wi yáriri myɛ faan lè, woro wi nyɛ Kolocɔlɔɔ. 5Mowizi maa pye tágala syɔ́ɔn Kolocɔlɔɔ kpáagi tɛ́ɛyɛ myɛ ni, wi maa pye falipyeo, ni séeraw kpéʔele kérigèle na, gele Kolocɔlɔɔ a kɔ́ ba joo lè. 6Kàjáa Kirisi i nyɛ Jaafɔlɔ, wi i nyɛ tágala syɔ́ɔn Kolocɔlɔɔ kpáagi nyúngo na. Wolo si i nyɛ wi kpáagi, kapye wolo n tágali sámaga n cò, ní i nyɔ̌ngbɔɔlɔ táanri wolo sɔ̀ngumi tɛɛtaʔaga báriga ni.
Ŋɔ́ndaali li yaʔa Kolocɔlɔɔ syɛ́ɛnbèle ma lè
7 #
Ŋún 95:7-11
Gee bee na Pìicǎnni da ni syɛ́ɛnri naa nyuu níì jo:
«Yele ga wi yákpoli lóʔo níjanʔa,
8ki ga yɛlɛ yele í kɔ́ yele fúnyi gbàn
àmɛɛ pe da gi kpéʔele céemi làla ni lè í,
cángee na pe da mii pye n wéle lè fìími tára ni,
9lǎli ni yele tóolɛɛbèle da ni mii pingi ni wéle lè
ní i mii kapyegèle nyaagi,
10pe n koro kpéʔele yɛ̀ʔɛlɛ togoye siin nínge ni.
Koro na mii fúngi da tanʔa lǎli bee syɛ̀ɛnnɛ kurugo,
a mii jo:
Pe funzɔngumi i be léeli mii na làla o làla,
pe ga mii kérigèle cán í.
11Koro na mii kàli mii fundanʔari làla ni níì jo:
Pe a tée jée mii ŋɔ́ndaali ni nyáana í.»
12Yaa kɔ̀rɔsíi, ni senyɛ̀nnɛ, koro ga pye sìndagali sɔ̀ngubeere a kɔ́ jée yele wàa faala ni bi wi láʔa Kolocɔlɔɔ woweew na í. 13Kàjáa ki n yɛlɛ yele í da yeyɛɛ kɛɛlɛ canʔa o canʔa àmɛɛ Kolocɔlɔɔ lǎli naa yiri lè Níjanʔa, koro ga pye yele wàa faala a kɔ́ gi yaʔa kapeelaa í wi fáana pùuni wi zɔ̌nw í nìri kapeeli bee báriga ni í. 14Níì cán tágali li da sélì pye wolo ma lè, wolo ga li sámaga n cò n taa n sáà nan gi kwɔ́ɔmi na, wolo i nyɛ Kirisi pínɛnyɛ̀nnɛ, 15#Ŋún 95:7-8 àmɛɛ gi joo lè níì jo: «Yele ga Kolocɔlɔɔ yákpoli lóʔo níjanʔa, ki ga yɛlɛ yele í kɔ́ yele zɔ̌nbèle nìri àmɛɛ pe da gi kpéʔele céemi làla ni lè í.» 16#Cór 14:1-35 Bɛ̀lɛ́ pe da wi yákpoli lóʔo níì cée? Bele myɛ Mowizi da yirige lè Ezyipiti ni, poro ban ì? 17Bɛ̀lɛ́ kurugo Kolocɔlɔɔ da ni wi fúngi taanri fwɔɔ n baa taa yɛɛgéle togoye siin? Bele pe da ni kapeegèle kpéʔele lè ní i tuun ni kúu fìími tára ni lè, poro ban ì? 18Ba bɛ̀lɛ́ má wi da kàli n kaan níì jo pe a jée woro ŋɔ́ndaali tɛ́ʔɛ ni í, kapye syɛɛnceebèle bee má ban í? 19A wolo wɔ́ɔ̀ gi nyaa pe sìndagali báriga ni pe da gbàn n jée li ni í.
Currently Selected:
Heburubèle 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
