Galasi ye 5
5
Yele a kɔ́ bɔ̀nɔ yele wɔ́rɔdi ni í
1 Kirisi n wolo yirige púlori ni wɔ́rɔdi kánma na. Gee bee na gi yɛlɛ yele í sámaga yére, ki ga yɛlɛ yele í be yaʔa pe ní púlori túgoro tugo yele na í.
2Ye wéle, mii Pɔli a gi joo yele ma, yele ga kɛ́nɛw kpéʔele yele a Kirisi tɔ̀nɔw taa í. 3Syɔɔn o syɔɔn wi kɛ́nɛw kpéʔele lè, mii a ní gi joo taʔa wi ma si wi pye, ŋàʔanaga gii fwɔɔ wi Mowizi làlwaw myɛ foro. 4Yele ga ni sínni caa làlwaw báriga ni yele n wàli n láʔa Kirisi na. Yele n yeyɛɛ lɛɛli yirige Kolocɔlɔɔ kpɔ́ʔɔri ni. 5Wolo si na, tágali ní Pìicǎnni báriga ni wolo sínni sige, sínlee na wolo wo sɔ̀ngumi taʔa lè. 6Níì cán syɔɔnwaa ga pye Kirisi Zyezu ni, kɛ́nɛkpeʔeleri yoo, kɛ́nɛnaa-sìngbeʔeleri yoo, tàa faala o nyɛ ní tɔ̀nɔ ní í, fwɔɔ tágali li báara lè tàmagi báriga ni.
7Yele maa ni fé cama, wìí si wi baa yele yérige kányɛɛgi lóʔolo na? 8Syɛ́ɛnri bee ní pe baa yele fúnyi kàriga lè, yele yerifɔw má ban di yìri í. 9#1Kor 5:6 Pe ga levé cɛɛri le búrumii-pírigege ni, wi n cariga n gi myɛ yìrige. 10Mii n tága yele na Kàfɔw báriga ni, ncan yele a tée ní sɔ̀nguraa nikwɔɔ sɔ̀ngi nyáana í. Syɔ́ɔnwee faala si wi yaà ni yele fúnyi curugu lè, kútiiw a too wee bee na.
11Mii si na, ni senyɛ̀nnɛ, kapye mii maa sèʔé ni gi nyuu níì jo ki n yɛlɛ syɔɔn í kɛ́nɛw kpéʔele, nyàʔá na pe sèʔé i mii wɔʔɔ? Kapye mii maa ni gee bee kpéʔele, fundanʔari di yaà be ma tiiparigi kéele na lè, ti a dée sàa. 12Koro na bele be yele fúnyi curugu lè, ki n yɛlɛ be peyɛɛ cɛnɛ kálagi.
13Yele si na, ni senyɛ̀nnɛ, yele yerifɔw n yele yeri wɔ́rɔdi kánma na. Ki si ga yɛlɛ yele í wɔ́rɔdi bee kàriga bàā yele céri kínidɛnɛgɛ kele kpéʔele í, kàjáa ki n yɛlɛ yele í pye yeyɛɛ púlobéle bàā báara yeyɛɛ ma tàmagi báriga ni. 14#Lev 19:18 Níì cán nyɔɔsyɛɛnkangi naa nibin n Mowizi làlwaw syɛ́ɛnrɛ myɛ foro, gee gi jo lè: «Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè.» 15Yele si ga ni yeyɛɛ nɔngi ní i yeyɛɛ gáa, ki n yɛlɛ yaa yeyɛɛ kɔ̀rɔsíi koro ga pye yele a kɔ́ yeyɛɛ gáa kwɔ́ɔ í.
Bi Pìicǎnni yaʔa laa mɔ kàragí, ki a kɔ́ pye céri kínidɛnɛgɛ kánma í
16Dee si mii a joo lè, toro di dee naa: Ki n yɛlɛ yaa táanri Pìicǎnni báriga ni koro ga pye yele a ní da céri kínidɛnɛgɛ kele kpéʔele nyáana í. 17#Wɔr 7:15-23 Níì cán kérigèle gele ge céri dɛ́nɛ lè kányɛʔɛ ni, gele bee i Pìicǎnni bɛɛngi, gele si ge Pìicǎnni dɛ́nɛ lè, gele bee i céri bɛɛngi. Níì cán Pìicǎnni ní céri i túngu ní tiyɛɛ ní, a koro gi kaan gee yele caa bàā kpéʔele lè, ye ga gbàn ni gi kpéʔele í. 18Kàjáa Pìicǎnni ga pye yele yɛɛ̀kiniw, ye gi cán yele o nyɛ Mowizi làlwaw fànʔa ni í.
19Tɔ́ɔliw ni gele ge nyɛ lè céri kapyegèlē, koro ge nyɛ gele naa: ceyuugi, ní nànyuugi, ní kanɔnʔɔri, ní cecaabeeri, ní nànjaabeeri, 20ní yasunzunri, ní nìnyɔʔɔnɔgi, ní nigoori, ní kàsiiw, ní nyabɛɛnni, ní fundanʔari, ní fungboloyi, ní kàkabalayi, ní funwaliyi, 21ní paragi, ní singbaadinri, ní kakolobyeri ní, n fàra kérigèle kèle nikwɔɔlɔ na, gele ge nyɛ lè sèjira ní gele naa ní. Mii a gi joo yele ma àmɛɛ mii da sélì gi joo lè níì jo: Kérigèle bee kpéʔelefɔɔlɔ a gbǎn Kolocɔlɔɔ fǎngi kɔ́rigɔ lìi í.
22Kàjáa gee Pìicǎnni sangi lè, koro gi nyɛ: tàmagi, ní fundaanri, ní bɛ̀ɛ́li, ní kpàracogi, ní tánʔaganjǎnmi, ní funjǎngi, ní mɔ í pye tágala syɔ́ɔn, 23ní fûnnyingi, ní miyɛɛ-cǒmi ní. Làlwaw o túngu ní yasanri bee tàa ní í. 24Kirisi Zyezu wóbèle n peyɛɛ kóri tiiparigi na tɔ́ɔliw ni jàngó céri, ní di ki laànitaagi, ní di kínidɛnɛgi í kùu. 25Amɛɛ wolo sìíw taa lè Pìicǎnni báriga ni, ànbée gi wɔ́ɔ̀ yɛlɛ wolo í da táanri Pìicǎnni báriga ni. 26Ki ga yɛlɛ wolo í kɔ́ woyɛɛ gbɔ́ʔɔ gbanzan si woyɛɛ fúnyi kaan yaa taanri í, sáā nyabɛɛnni kpéʔele ní woyɛɛ ní í.
Currently Selected:
Galasi ye 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
