Galasi ye 4
4
1Dee si mii a joo lè toro di nyɛ dee naa, n kɔriliio yaʔa wi pìími làla myɛ ni wi ga fàli puloo na í, bi gi taa wi i nyɛ pe myɛ kàfɔlɔ. 2Wi i gáà kòro wi tamafɔbèle, ní wi kàrigafɔbèle kɔ́yɔ ni bi taa sa nan lǎli na, lee tofɔw kɔ̀rirɔ n tímana lè. 3Anbée ki da wɔ́ɔ̀ pye wolo ma lǎlee ni wolo da pye lè pìibēle, wolo maa pye dulunyanw kalɛɛgéle púloro ni. 4Kàjáa àmɛɛ lǎli baa foro lè, a Kolocɔlɔɔ wi Jáaw tórigo, a cɔlɔɔ baa wi see, wi n see Mowizi làlwaw làla ni, 5#Wɔr 8:15-17 koro ga pye bele pe da pye lè làlwaw kôdanʔabéle, wi be syɔɔ jàngó wolo í pye Kolocɔlɔɔ jàala.
6Amɛɛ si yele nyɛ lè Kolocɔlɔɔ jàala, koro na wi wi Jáaw Pìle tórigo a li baa jée wolo fúnyi ni. A li i gi nyuu ni yákpoli wáa níì jo: «Abaa! Mii Tóow!» 7Ki ga pye nya, mɔ ní o nyɛ puloo í, fwɔɔ jaafɔlɔ. Amɛɛ si mɔ nyɛ lè jaafɔlɔ, mɔ wɔ́ɔ i nyɛ kɔriliio Kolocɔlɔɔ bárigaw ni.
Galasi ye kéeli maa wári Pɔli na
8Kàjáa lǎli ni yele da pye lè Kolocɔlɔɔ sìnján ni, yele maa pye kolocɔlɔbèle pèle púloro ni, be lè pe o nyɛ kolocɔlɔbèlē í. 9Amɛɛ si yele Kolocɔlɔɔ cán lè tɔ́ɔliw ni, wàlá ki n pɔ́rɔ mii í gi joo si jo àmɛɛ Kolocɔlɔɔ yele cán lè, nyàʔá na yele ní i caa bi lúru kári gbanzan kalɛɛgèle kurugo, koro ga pye bi ní sa jée ke púlori ni kavɔn? 10Yele i canyaa, ní yeyaa, ní làrigèle kèle, ní yɛ́ɛgèle kèle córo n sɔ̀lɔ kèle na! 11Mii i fɛ̀ɛgí yele kéeli na, ní i gi sɔ̀ngí n jo, dɔ̀ʔɔ́ mii maa báara yele níngi ni gbanzan.
12Ni senyɛ̀nnɛ, mii i yele nyɛ́ɛri, ki n yɛlɛ yele í pye àmɛɛ mii nyɛ lè, níì cán mii wɔ́ɔ i nyɛ àmɛɛ yele nyɛ lè. Yele ga kolo mii ma keelaa faala ni í.
13Yele si n gi cán mii céri yáama pi da pye sábabu, á mii sáà Syɛɛnjóocǎnri joo yele ma tɔzeligi na. 14Wɔʔɔlee si yele da taa lè mii céri yáama kéele na, yele ga li córo í. Yele ga wɔ́ɔ̀ còʔoro mii na àmɛɛ yanɔnʔɔgɔ nyɛ lè í. Níì cán yele maa mii sámaga n cò àmɛɛ Kolocɔlɔɔ tunduɔn nyɛ lè, wàlá àmɛɛ Kirisi Zyezu nyɛ lè. 15Sán si yele fundaanri bee nyɛ? Níì cán mii i gi séeraw kpéʔele yele kéeli na níì jo, kapye ki a dée gbǎn pye, yele mǎà dée yele tiimaa nyapiigèle wòlo bi kaan mii ma. 16Amɛɛ mii kányɛɛgi joo yele ma lè, gee bee na lé mii baa kàri yele nígoo?
17Pe i yele caa gbanʔama, kàjáa kacànna kéele na ban be yele caa í, pe i caa bi yele láʔa wolo na, jàngó yele í taʔa poro na. 18Wàa si ga ni yele caa kányɛʔɛ ni kacànna kánma na làrigèle myɛ ni, gee bee n nyɔɔ, ànbée mii gi kpéʔele, ki si o nyɛ mɔ a jo mii ga pye ní yele ní lǎli ni lè mii n náa ni gi kpéʔele í. 19Mii pìíbèle, àmɛɛ fícɛnnɛ gáā fícɛnnɛfɔlɔ yáa lè, ànbée yele kéeli ní i mii yáa mii fúngi ni kavɔn, fwɔɔ bi taa Kirisi í tɛɛ̀tɛ́nɛgɛ wòlo yele fúnyi ni. 20Mii si i caa bi pye ní yele ní tɔ́ɔliw ni jàngó bi mii jooganmi fàli, níì cán mii i niyɛɛ gábala yele kéeli na.
Gee Agari ní Sara kéeli tɛ̀ɛn lè
21Yele bele ye caa lè bi pye Mowizi làlwaw kôdanʔabéle, gee làlwaw joo lè yele ga gi lóʔo wii ì? 22#Sél 16:15; 21:2 Níì cán ki n sɛ́bɛ níì jo nànbiigéle siin maa pye Abirahami ma, wi maa nibin see wi pulocew na ní wɔ́ɔ̀ nibin see wi wɔ́rɔjew na. 23Kàjáa pulocew maa wi pìíw see n yɛlɛ ní céri kánma ní, á wɔ́rɔjew si wi wów see nyɔɔfaligi báriga ni. 24Syɛ́ɛnri bee i nyɛ àmɛɛ kàseele nyɛ lè. Níì cán cébèle bee i nyɛ joogaangèle siin. Làa nibin n taa Sinayii nyanbelegi na, loro li nyɛ Agari, wi i pìíbèle sii púlori kánma na. 25Tɔ́ɔliw ni Agari i nyɛ Sinayii nyanbelegi gi lè Arabii tári ni, ki i nyɛ sèjira ní tɔ́ɔliw Zyerusalɛmi ní, níì cán Zyerusalɛmiw bee i nyɛ púlori ni, ní wi pìíbèle ní. 26Kàjáa ǹjoʔo ma Zyerusalɛmiw i nyɛ wɔ́rɔɔ, ní i nyɛ wolo nɔ́ɔw. 27#Eza 54:1 Níì cán ki n sɛ́bɛ n jo:
«Maa fundaanra kpéʔele mɔ wi lè cenaa-sìnzeew,
wi lè wi a pyà taa í!
Maa fundaanra yákpogbɔɔlɔ wáa
mɔ wi lè fícɛnnɛ ga kɔ́ɔ̀ mɔ yáa í!
Níì cán céwee be yaʔa lè,
woro pìíbèle a ba nɛʔɛ bi sɔ̀lɔ
wee wòolo na wee wi nyɛ ní wi nǎnw ní lè.»
28Yele si na, ni senyɛ̀nnɛ, yele i nyɛ nyɔɔfaligi jàala àmɛɛ Izaaki da pye lè. 29#Sél 21:9 Pìíwee si pe da see lè n yɛlɛ ní céri kánma ní, àmɛɛ wee bee da ni Kolocɔlɔɔ Pǐli kólogo wóo wɔʔɔ lè, ànbée gi wɔ́ɔ̄ kpéʔele tɔ́ɔliw ni. 30#Sél 21:10 Mɛ̀ɛ́ si Kolocɔlɔɔ syɛɛnsɛbɛri jo? Ti n jo:
«Pulocew ní wi pìíw nɛnɛ mi tórigo,
níì cán pulocew pyà ga yɛlɛ wi pínɛ kɔ́rigi lìi
kanmaa faala na ní wɔ́rɔjew pyà ní í.»
31Gee bee na, ni senyɛ̀nnɛ, wolo o nyɛ pulocew pìibēle í, wolo i nyɛ wɔ́rɔjew pìibēle.
Currently Selected:
Galasi ye 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
