Galasi ye 6
6
Yaa yeyɛɛ túgori tugu
1Ni senyɛ̀nnɛ, syɔɔnwaa ga too kapeele ni, yele bele ye nyɛ lè Pìicǎnni kôdanʔabéle, ki n yɛlɛ ye wi yìrige ye yérige ní fûnnyinge ní. Mɔ wee wi wi yìrige lè, maa miyɛɛ kɔ̀rɔsíi koro ga pye Sutanaw a wɔ́ɔ kɔ́ mɔ lɛ́ɛlɛ bi lége kapeelaa ni í. 2Yaa yeyɛɛ túgori tugu, kánmi bee na yele a Kirisi làlwaw foro. 3Syɔɔnwaa ga ni gi sɔ̀ngí woro i nyɛ yarigaa n gi yaʔa wi o nyɛ yafyɛn í, wi i wiyɛɛ váana. 4Syɔɔn o syɔɔn si n yɛlɛ wi wi tiimaa tánʔaganmi sɛʔɛ wi wéle, ki ga pye nya, wi a ra nyɔ̌ngbɔɔlɔ táanri wàa nikwɔɔ kéele na í, fwɔɔ wi tiimaa wóli na. 5Níì cán syɔɔn o syɔɔn a ra wi tiimaa túgori tugu.
6Wàa ga ni wàa tama Kolocɔlɔɔ syɛ́ɛnri na, pìitamaw n yɛlɛ waa wi tamafɔw lee wi kɔlɔ̀ yáriri myɛ na.
7Yele a kɔ́ ra yeyɛɛ váana í, ye gi cán syɔɔn a gbǎn kataanra wáa Kolocɔlɔɔ na í. Gee syɔɔn lùgu lè, gee bee wi a wɔ́ɔ ba láa. 8Wàa ga ni wi céri kanidaangéle luguro lúru, wee bee a ba céri yafɔnʔɔrɔ taa. Wee si wi Pìicǎnni kanidaanna luguro lúru lè, wee bee a ba sìibangwɔɔw taa Pìicǎnni ma. 9Wolo si ga yɛlɛ wolo í fɔ̀rɔ kacànbyeri na í. Níì cán wolo ga pye wolo ga fɔ̀rɔ í, cɛɛri ga pye wolo a di tɔ̀nɔw taa àmɛɛ yaliilaara nyɛ lè. 10Koro na lǎlee wo taa lè, ki n yɛlɛ wolo í da kacǎngèle kpéʔele syɛ́ɛnbèle myɛ na, sáā ge kpéʔele tágali narigbaʔa woolo na bi sɔ̀lɔ.
Sàmizanni ní fòów kéele
11Ye wéle, syɛ́ɛnri mii sɛ́bɛ lè dee ní mii tiimaa kɔ́gi ní bi tórigo yele ma, yele a di sɛ́bɛri nyaa wogboloro ní. 12Bele myɛ be caa lè bàā peyɛɛ dèé syɛɛncanbéle céri kàbaan na, bele bee be yele ŋàʔaná yele í kɛ́nɛw kpéʔele, gee gi nyɛ lè gi nyúngi, koro gi nyɛ pe o caa bàā wɔʔɔ Kirisi tiiparigi kéele na í. 13Níì cán bele be kɛ́nɛw kpéʔele lè, pe tiimaa o Mowizi làlwaw forogi í. Pe i caa yele í kɛ́nɛw kpéʔele jàngó poro í da peyɛɛ gbɔ́ʔɔgi ní yele kɛ́nɛw kéele ní. 14Mii si na, ki ga yɛlɛ mii í da niyɛɛ gbɔ́ʔɔgi í, kapye ní wolo Kàfɔw Zyezu Kirisi tiiparigi kéele ní ban í, woro bárigaw ni pe dulunyanw kèlē kóri tiiparigi na mii ma, ní wɔ́ɔ̀ mii kóri dulunyanw wòʔolo kabaan na! 15Níì cán kɛ́nɛkpeʔeleri yoo, kɛ́nɛnaa-sìngbeʔeleri yoo, dee bee tàa faala o nyɛ yafyɛn í, fwɔɔ syɔɔn í kàri syɛɛnfɔ́ɔn. 16Bele myɛ be táanri lè ni yɛlɛgi ní kajooli naa ní, ki n yɛlɛ Kolocɔlɔɔ í yɛɛ̀nyingi, ní nyínimi kaan be ma, n fàra Isirayɛli ye na be nyɛ lè Kolocɔlɔɔ wóbèle.#6:16 Isirayɛli ye be nyɛ lè Kolocɔlɔɔ wóbèle: Mɔ ga lóʔo tɛ́ɛgi naa ni, Isirayɛli ye be nyɛ lè Kolocɔlɔɔ wóbèle, tágafɔbèle myɛ na be nyɛ.
17Nlaʔa níjanʔa na, syɔɔnwaa faala ga yɛlɛ wi ní mii tɔ́ɔrɔ í, níì cán Zyezu fɛ̀ɛ́w i nyɛ mii céri na.
18Ni senyɛ̀nnɛ, ki n yɛlɛ wo Kàfɔw Zyezu Kirisi í wi kpɔ́ʔɔri le yele pìígèle ni! Amiina!
Currently Selected:
Galasi ye 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
