Efɛzi ye 4
4
Amɛɛ céri nyɛ lè nibin
1Gee bee na mii i yele nyɛ́ɛri, mii wi lè Kàfɔw kàsoleo, níì jo kéelee na Kolocɔlɔɔ yele yeri lè, yele í da táanri da yɛlɛgi ní lee bee ní. 2#Kɔl 3:12-13 Ki n yɛlɛ yaa màámi ní funjǎngi myɛ kpéʔele, yáā fûnnyingi ní kpàracogi kpéʔele ní yeyɛɛ ní tàmagi ni. 3Amɛɛ Pìicǎnni yele pínɛ nibin lè, yaa ŋàʔaná gbanʔama, ye pínɛnyɛnnɛgi bee cò cama bɛ̀ɛ́li báriga ni, lee li yele pwɔɔ yeyɛɛ na lè. 4Céri i nyɛ nibin, a Pìicǎnni i nyɛ nibin àmɛɛ Kolocɔlɔɔ wɔ́ɔ̀ yele yeri lè sɔ̀ngumi tɛɛtaʔaga nibin na ki nyɛ lè yele kayeli nyúngo. 5Kàfɔw i nyɛ nibin, a tágali i nyɛ nibin, a batɛmiw i nyɛ nibin, 6a Kolocɔlɔɔ wɔ́ɔ i nyɛ nibin wi lè tágafɔbèle myɛ Tóo, woro wi nyɛ pe myɛ nyúngo na, ní i nyɛ pe myɛ nínge ni, ní i nyɛ pe myɛ fúnyo ni.
7Wi si n kpɔ́ʔɔri kaan wolo myɛ nibin nibin ma n yɛlɛ ní Kirisi yakaangi kpɔ́ʔɔganma ní. 8#Ŋún 68:19 Koro na gi jo:
«Wi lúgu ǹjogi ni lè,
a wi pulobèlē kɔ́ri n kári
níì yakaanya kaan syɛ́ɛnbèle ma.»
9Dee si di joo lè níì jo: «Wi n lúgu,» nyàʔá gi nyɛ gi kɔ́rɔw? Ki o nyɛ ncan wi n wɔ́ɔ̀ tìgi táàma n jée tári tɛɛcuruyo ni wii ì? 10Wee wi tìgi lè, woro wonijanw wi wɔ́ɔ̀ lúgu nyɛ̀ʔɛgèle myɛ ǹjoʔo ma, koro ga pye wi yáriri myɛ nyìn. 11Wi n pèle kaan poro í pye pìitunbéle, níì pèle kaan pe pye kanyaajoobéle, pèle si pye Syɛɛnjóocǎnri joofɔɔlɔ, pèle si pye bànaʔabēle ní tamafɔɔlɔ. 12Wi n koro kpéʔele jàngó bi Kolocɔlɔɔ syɛɛncanbèle nyɔɔ bi foro, koro ga pye poro í da Kolocɔlɔɔ fáliw kpéʔele, kàa sáā taari Kirisi céri na, 13bi taa wolo myɛ í ba pye nibin tágali ni, si wɔ́ɔ Kolocɔlɔɔ Jáaw sámaga cán, si pye wolɛɛbèlē tágali ni bi nyɔɔ foro àmɛɛ Kirisi nyɔɔ n foro lè. 14Kánmi bee na wolo a ní kòro pìími ni, tamaveleyi káfalaya í ra wolo fíigi sáā wolo lée ra wáa da máari í bi yɛlɛ ní syɛ́ɛnbèle námara, ní be sícilibeemi ní bi syɔɔn pùuní lè í, 15fwɔɔ wolo í da kányɛɛgi nyuu ní tàmaga ní wáā leegi bi taa wolo í ba nyɔɔ foro àmɛɛ Kirisi nyɛ lè, wi lè céri nyúngo. 16#Kɔl 2:19 Woro wi céri tɛ́ɛyɛ pínɛ n sogi yiyɛɛ na ti tɛɛsogiyi dɛ̀ɛmɛnɛ báriga ni, koro ga pye céri í da tiyɛɛ zámagi, sáā kpɔ́ʔɔgi bi yɛlɛ ní ti tɛ́ɛyi myɛ nibin nibin báaraganma ní tàmagi ni.
Sìifɔnw kéele Kirisi ni
17Gee bee na mii i dee naa nyuu ní i di séeraw kpéʔele Kàfɔw ni, koro gi nyɛ yele a ní kɔ́ ra táanri àmɛɛ syɛɛnfeleyi wozanya táanri ni yɛlɛgi ní pe sɔ̀ngubeeri ní lè í. 18Pe fúnyi i nyɛ yébilimɛ, pe kanaa-sìnjánmi ní be zɔ̀nniribèle báriga ni be kòro nibɔɔnnɔ sìíw kàbaan na, wee Kolocɔlɔɔ kaangi lè. 19Pe ga níì fɛ̀ɛrɛ cán í, pe n peyɛɛ gaan cecaabeeri ní nànjaabeeri ma jàngó bàā kanɔnʔɔri féleye myɛ kpéʔele sìndín ni.
20Yele si na, tánʔaganmi bee félege na ban Kirisi yele tama í. 21Kapye yele n Zyezu syɛ́ɛnri lóʔo kányɛʔɛ ni, á wi yele tama n yɛlɛ ní kányɛɛgi ní ki nyɛ lè woro ni, 22#Kɔl 3:9 ye gi cán ki n yɛlɛ yele í yele kanlɛɛmi yaʔa, pi da pye lè yele booma tánʔaganmi, kanlɛɛmi bee pi da kálagi lè ki laànitaagi báriga ni gi syɔɔn fáana ni pùuní lè, 23yé yele pìígèle ní yele fúnyi yaʔa yi kàri wovɔnyɔ ní, 24#Sél 1:26; Kɔl 3:10 yé kanvɔnmɔ le yeyɛɛ na, bee Kolocɔlɔɔ kpéʔele lè pi woro wómi wíri sínni, ní funviiri ni ti yìrigí lè kányɛɛgi ma.
25 #
Zak 8:16
Gee bee na gi yɛlɛ yele í jànvaaw yaʔa, syɔɔn o syɔɔn n yɛlɛ yele ni waa kányɛʔɛ nyuu wi syɛɛnnyɛnnɛ ma. Níì cán wolo i nyɛ woyɛɛ céri tɛ́ɛyɛ. 26#Ŋún 4:5 Ki ga yɛlɛ yele fundanʔari í kɔ́ yele kaan yele í kapeele kpéʔele í. Ki ga yɛlɛ cángi í jée bi yele yaʔa funbɛɛnrɛ na í. 27Yele a kɔ́ tɛɛ̀jeʔe yaʔa Dàzɔɔnw ma í. 28Wee wi yúu lè, ki ga yɛlɛ wi ní da yúu í, fwɔɔ gee gi pɔ́rɔ lè, ki n yɛlɛ waa báara ní wi tiimaa kɔ́yi ní wáā kacàngēle kpéʔele koro ga pye wee màko ga pye yárigee na lè, kàa í pye wi ma bi gbǎn kaan syɔ́ɔnw bee ma. 29Ki ga yɛlɛ syɛɛnpeeraa faala í kɔ́ yiri yele wàa nyɔ́ɔ ni í, fwɔɔ syɛɛntaanra, dee ti a gbǎn ti lóʔofɔbèle kɛɛlɛ lè, sáā kàa fàrá be na tágali kólogo ni bi yɛlɛ ní be màkonyɔɔri ní. 30Ki ga yɛlɛ yele wàa í kɔ́ Kolocɔlɔɔ Pìicǎnni kanibɛɛnnɛ kpéʔele í, níì cán loro li nyɛ Kolocɔlɔɔ fɛ̀ɛ́w, wee wi taʔa yele na lè bi taa syɔɔli canʔa í ba nan. 31Ki si n yɛlɛ yele í dìgiri, ní fundanʔari, ní funbɛɛnri, ní kàfulogi, ní mɛ́ɛkalagiri myɛ yirige yeyɛɛ níngi ni n fàra funbeeyi myɛ na. 32#Kɔl 3:13 Ki n yɛlɛ yele í da kérigèle nyɔɔgi yeyɛɛ na, sáā fúnyi nyíngi yeyɛɛ kurugo, yáā yeyɛɛ kùsulugi syoo àmɛɛ Kolocɔlɔɔ yele kùsulugi syɔɔ lè Kirisi ni.
Currently Selected:
Efɛzi ye 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
