Efɛzi ye 3
3
Fáliwee wi kaan Pɔli ma lè syɛɛnfeleyi wozanya kéele na
1Gee bee na mii Pɔli wi nyɛ lè Kirisi Zyezu kàsoleo yele syɛɛnfeleyi wozanya kéele na, 2mii i gi sɔ̀ngí yele n gi lóʔo n kwɔ́ɔ àmɛɛ Kolocɔlɔɔ wi kpɔ́ʔɔri kàlifáa mii ma lè yele kéeli na. 3Yanyaʔa báriga ni mii kalarali bee cán n yɛlɛ ní gi ní àmɛɛ mii li sɛ́bɛ lè syɛɛnkanya cɛɛri ni. 4#Kɔl 1:26-27 Yele ga ni dee bee wéle yele a gbǎn gi nyaa àmɛɛ mii Kirisi kalarali cán lè. 5Kolocɔlɔɔ da li tɛ̀ɛn booma syɛ́ɛnbèle na í, àmɛɛ wi baa li tɛ̀ɛn lè wi pìitunjanbèle, ní wi kanyaajoobèle na tɔ́ɔliw ni Pìicǎnni báriga ni lè í, 6kalarali bee li nyɛ ncan syɛɛnfeleyi wozanya n baa pye Zyefubèle kɔriliinyɛ̀nnɛ, níì cenijanra taa, ní wɔ́ɔ̀ pye be pínɛnyɛ̀nnɛ Kolocɔlɔɔ nyɔɔfaligi ni, gee gi taa lè Kirisi Zyezu ni Syɛɛnjóocǎnri báriga ni.
7Mii n baa pye Syɛɛnjóocǎnri falipyeo n yɛlɛ ní yakaangi ní ki nyɛ lè Kolocɔlɔɔ kpɔ́ʔɔri, dee wi kaan mii ma lè n yɛlɛ ní wi séew falipyeganma ní. 8Wi n kpɔ́ʔɔri bee kaan mii ma, mii wi lè Kolocɔlɔɔ syɛɛncanbèle myɛ wobile, koro ga pye mii í da Kirisi córomɔ fun lɔnɛʔɛri syɛɛnjóocànra nyuu syɛɛnfeleyi wozanya ma, 9mii si wɔ́ɔ ra kalarali fáli kpéʔele bi li yirige gbɛ̀ɛ́nmi na, Kolocɔlɔwee wi yáriri myɛ faan lè, wi maa kalarali bee làriga wi fúngi ni nlaa yaà làridɔɔnnɔ ni, 10koro ga pye woro í ba wi síciligbɔɔmi tɛ̀ɛn tɔ́ɔliw ni nyɛ̀ʔɛni fànʔafɔɔlɔ, ní nyɛ̀ʔɛni séekpɔɔɔ fɔɔlɔ na Egiliziw báriga ni, 11n yɛlɛ ní wi kwɔ́ɔmɔ fun kakɔrirɔli ní, wolo Kàfɔw Kirisi Zyezu bárigaw ni. 12Amɛɛ wolo nyɛ lè Kirisi ni, koro gi gi kaan a wolo gbàn n nùuni Kolocɔlɔɔ na ní nànzorodo ní, fyáara fun ni, tágali báriga ni Kirisi na. 13Gee bee na mii i yele nyɛ́ɛri jàngó yele a kɔ́ mii wɔʔɔli kéele yaʔa li yele fɔ̀rɔ yele fúnyi ni í, lee li tuun mii na lè yele kéeli na. Loro li nyɛ yele kpɔ́ɔmi sábabu.
Kirisi tàmagi kéele
14Gee bee na mii i kpùmɔnɔ́ Tofɔw yɛ́ʔɛ ma, 15wee má nyɛ̀ʔɛni ní tári narigbaaya myɛ yi mɛ́ɛyi taagi lè. 16Mii i wi nyɛ́ɛri jàngó wi Pǐli í fànʔa kaan yele ma yele í nìri yele fúnyi ni bi yɛlɛ ní wi nìjangbɔɔri lɔnɛʔɛrɛ ní, 17koro ga pye Kirisi í kòro yele fúnyi ni tágali báriga ni, yele si nìnre wáa bi sámaga yére tàmagi ni. 18Kánmi bee na yele ní Kolocɔlɔɔ syɛɛncanbèle myɛ a fànʔa taa bi gi cán àmɛɛ Kirisi tàmagi kpɔ́ʔɔganma, ní ki níngi tɔnɔganma, ní ki ǹjogi tɔnɔganma, ní ki cùruganmi nyɛ lè, 19jàngó yele í wi tàmagi bee cán bi gi taa ki n kpɔ́ʔɔ n sɔ̀lɔ syɔɔn cánni na, yele fúnyi si nyìn Kolocɔlɔɔ nyìnganmi myɛ na.
20Wee si wi a gbǎn kérigèle myɛ kpéʔele lè gbanʔama bi sɔ̀lɔ wolo nyɛ́ɛriyi ní wolo sɔ̀nguri myɛ na n yɛlɛ ní séew ní, wee ní wi báara lè wolo fúnyi ni, 21wee bee na nìjangbɔɔri yɛlɛ Egiliziw ni, ní wɔ́ɔ̀ yɛlɛ wi na Kirisi Zyezu ni làrigèle myɛ ni kwɔ́ɔmɔ fun. Amiina.
Currently Selected:
Efɛzi ye 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
