Efɛzi ye 5
5
Bàā táanri gbɛ̀ɛ́nmi na
1Ki n yɛlɛ yele í da Kolocɔlɔɔ tɛ́ɛlɛ àmɛɛ yele nyɛ lè wi pìinidaanmabéle, 2#Yir 29:18; Ŋún 40:6 yaa táanri tàmagi na àmɛɛ Kirisi wɔ́ɔ̀ tàmaga le ní wolo ní lè níì wiyɛɛ gaan Kolocɔlɔɔ ma yakanʔa ní sáriga, wolo kéeli na àmɛɛ nùndaanna yáriga nyɛ lè.
3Kàjáa ceyuugi, ní nànyuugi, ní kanɔnʔɔrɔ syɛ́ɛnraa faala ga yɛlɛ taa nyuu yele níngi ni í, wàlá fungbɔʔɔ syɛ́ɛnrɛ í, gee bee ga yɛlɛ Kolocɔlɔɔ syɛɛncanbèle na í. 4Ki ga wɔ́ɔ̀ yɛlɛ fɛ̀ɛfɔnmi syɛ́ɛnrɛ, ní faʔami syɛ́ɛnrɛ, ní kɔ̀nʔɔbeeri syɛ́ɛnrɛ í da nyuu yele níngi ni í, ncan dee bee ga nyɔɔ í. Dee si yele yɛlɛ bàā nyuu lè, toro di nyɛ bariga kaanni syɛ́ɛnrɛ. 5Ki n yɛlɛ ye gee naa cán gbanʔama bi cán ceyuuo, ní nànyuuo, ní kanɔnʔɔbyeo, ní fungbɔʔɔfɔlɔ wi lè yasunzuɔn, bele bee wàa faala a Kirisi ní Kolocɔlɔɔ fǎngi kɔ́rigɔ lìi í.
6Ki ga yɛlɛ syɔɔn faala í kɔ́ yele fáana pùuni ní gbanzan syɛ́ɛnrɛ ní í, níì cán kérigèle bee ge Kolocɔlɔɔ fundanʔari yaari ti i tuun wi syɛ́ɛnri céefɔɔlɔ na. 7Gee bee na yele a kɔ́ pínɛ ní be ní keelaa faala na í. 8Yele maa sélì pye yébilimɛ, kàjáa tɔ́ɔliw ni yele i nyɛ gbɛ̀ɛnmɛ Kàfɔw ni. Ki n yɛlɛ yele í da táanri gbɛ̀ɛ́nmi pìibēle tánʔaganma na. 9Níì cán gbɛ̀ɛ́nmi yasanra di nyɛ funjǎnyi féleye myɛ n fàra sínni, ní kányɛɛgi féleye myɛ na. 10Ki n yɛlɛ yaa kérigèle sɛʔɛ bàā Kàfɔw kanidaangéle cángi. 11Ki ga yɛlɛ yele lɛɛlɛ í pye yébilimi kapyegèlē ni í, ncan ke i nyɛ tɔ̀nɔ fun, fwɔɔ yaa fúlo ke kpéʔelefɔbèle na. 12Kérigèle syɛ́ɛnbèle bee kpéʔele lè làrama ni, àlí ke jooli i nyɛ fɛ̀ɛrɛ kéele. 13Keele o keele si ga yiri kàfugi na, gbɛ̀ɛ́nmi n li kánmi tɛ̀ɛn. 14Níì cán keele o keele li yiri lè gbɛ̀ɛ́nmi na, li n kàri gbɛ̀ɛnmɛ. Gee bee na gi jo:
«Yìri, mɔ wi ŋúnɔ lè,
mi nyán mi yiri kúbèle nínge ni,
koro ga pye Kirisi a gbɛ̀ɛnmɛ yirige mɔ ma.»
15Gee bee na gi yɛlɛ yaa yele tánʔaganmi kɔ̀rɔsíi, yele a kɔ́ ra táanri àmɛɛ sícilimɛ-fùnvɔɔlɔ nyɛ lè í, fwɔɔ àmɛɛ sícilimɛfɔɔlɔ nyɛ lè. 16#Kɔl 4:5 Ye lǎli còganma cán, níì cán cányi naa n pee. 17Gee bee na ki ga yɛlɛ yele í pye kanaa-sìnjánbéle í, kàjáa ki n yɛlɛ yele í da Kàfɔw nyɛ́nɛ kèlē cángi.
18Ki ga yɛlɛ yele í da dùvɛɛnw gbo waa yele yɛ́ɛyi wóo í, ncan kanɔnʔɔri i taagi wi ni. Kàjáa ki n yɛlɛ Pìicǎnni í yele fúnyi nyìn. 19#Kɔl 3:16-17 Yaa nyuu ní yeyɛɛ ní ní Kolocɔlɔɔ yɛ́ɛgi fyáara ŋúnuyo, ní Kolocɔlɔɔ kpɔ̀ʔɔrɔli ŋúnuyo, ní Kolocɔlɔɔ kôdanʔari ŋúnuyo ní, yáā ŋúu yaa Kàfɔw Kolocɔlɔɔ kpɔ̀ʔɔrɔ́ yele fúnyi ni. 20Ki n yɛlɛ yaa bariga kaangi Tofɔw Kolocɔlɔɔ ma làrigèle myɛ ni kérigèle myɛ na wolo Kàfɔw Zyezu Kirisi mɛ́ɛgi na.
Cébèle ní be nǎnbèle kéele
21Ki n yɛlɛ yaa lúro yeyɛɛ ma Kirisi yɛ́ɛgi fyáara na.
22 #
Kɔl 3:18; 1Pyɛ 3:1 Cébèle, ki n yɛlɛ yaa lúro yele tiimaa nǎnbèle ma àmɛɛ yele lúro lè Kàfɔw ma. 23Níì cán nǎnw wi nyɛ céw nyúngo, àmɛɛ Kirisi nyɛ lè Egiliziw nyúngo wi lè wi céri, woro tiimaa si i nyɛ wi Syɔɔfɔw. 24Amɛɛ si Egiliziw lúro Kirisi ma kánmee na lè, kánmi bee na cébèle yɛlɛ paa lúro be nǎnbèle ma kérigèle myɛ ni.
25 #
Kɔl 3:19; 1Pyɛ 3:7 Nǎnbèle, ki n yɛlɛ ye yele cébèle kéele yaʔa li yele dɛ́nɛ àmɛɛ Egiliziw kéele Kirisi dɛ́nɛ lè a wi wiyɛɛ gaan wi kéeli na, 26koro ga pye bi wi jée mùnú yaʔa Kolocɔlɔɔ ma, wi n wi jée n mùnu lǒgi ni, wi syɛ́ɛnri báriga ni, 27koro ga pye bi Egiliziw bee yaʔa wi pye woro ma wojaɔn ní, tɛɛ̀nɔnʔɔgɔ fun, wàlá tɛɛ̀kurɔlɔ fun, kérigèle bee làa faala a kɔ́ pye wi na í, fwɔɔ wi pye womunuyaʔaɔ ní tɛɛlɛ fun. 28Anbée nǎnbèle wɔ́ɔ̀ yɛlɛ pe be tiimaa cébèle kéele yaʔa li be dɛ́nɛ àmɛɛ pe tiimaa céri kéele be dɛ́nɛ lè. Wee wi nyɛ tàmaga na ní wi céw ní lè, wee bee i nyɛ tàmaga na ní wiyɛɛ ní. 29Níì cán syɔɔn faala a gbǎn wi tiimaa céri kéele nyaa li wi bɛɛn í, kàjáa wi i di màkow nyɔɔgi ní i di kɔ̀rɔsíi àmɛɛ Kirisi wɔ́ɔ i gi kpéʔele lè Egiliziw ma. 30Níì cán wolo i nyɛ wi céri tɛ́ɛyɛ. 31#Sél 2:24 «Koro na nàɔn n yɛlɛ wi wi tóow ní wi nɔ́ɔw yaʔa si tan wi céw na, pe siinw a ba pye cere nibin.» 32Kalarali bee n kpɔ́ʔɔ. Mii si i li nyuu Kirisi ní Egiliziw kéele na. 33Koro ní ki myɛ ní ki n wɔ́ɔ̀ yɛlɛ yele myɛ nibin nibin í yele tiimaa cébèle kéele yaʔa li yele dɛ́nɛ àmɛɛ yele tiimaa céri yele dɛ́nɛ lè, céw si n yɛlɛ waa wi nǎnw kpɔ́ʔɔgi.
Currently Selected:
Efɛzi ye 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
