2 Korɛnti ye 5
5
1Wolo n gi cán wolo céri di lè vòyo, yee ni wolo nyɛ lè tári na, yoro ga too, wolo a bàngwɔɔ kpaaya taa, yee Kolocɔlɔɔ faan lè nyɛ̀ʔɛni na, yi lè syɔɔn kɔ́lɔ ga yi faan í. 2Wolo si wɔ́ɔ i cɛ́ɛn vǒyi naa ni, ní i caa bi jée wolo tɛɛkòroyi ni yi nyɛ lè nyɛ̀ʔɛni na. 3Wolo céri di lè nyɛ̀ʔɛni wóro, wolo a ba di le buroyo koro ga pye pe a kɔ́ wolo nyaa níboribéle í. 4Níì cán kányɛʔɛ na n wolo yaʔa vǒyi naa ni wolo i cɛ́ɛn, wolo túgori n líbe, gee bee ga jo wolo i caa bi yiri wolo céri ni àmɛɛ be burogo wòló lè í, kàjáa wolo i caa bi jée nyɛ̀ʔɛni cére ni, koro ga pye dee di kúu lè, sìíw í dee bee jɔ́ɔ. 5Wee si wi wolo sámaga lè kéeli bee kánma na, woro wi nyɛ Kolocɔlɔɔ, woro wee wi Pìicǎnni kaan wolo ma lè li pye yaseligi wozanri yɛ́ʔɛ na.
6Gee bee na wolo nìrimɛ le làrigèle myɛ ni níì gi cán, bi wolo yaʔa céri naa ni wolo n léeli Kàfɔw tɛɛkòrogo na. 7Níì cán tágali báriga ni wolo táanri, nyaani báriga ni ban í. 8Koro na wolo nìrimɛ le ní i gi sɔ̀ngí wolo ga yiri céri ni n sáà pye ní Kàfɔw ní wi tɛɛkòrogi ni, gee bee a pɔ́rɔ. 9Gee bee na wolo wɔ́ɔ̀ lòmaana le, koro ga pye wolo ga kòro céri naa ni yoo, a wolo náà yiri di ni yoo, wolo kéeli í Kàfɔw dɛ́nɛ. 10#Wɔr 14:10 Níì cán ŋàʔanaga gii fwɔɔ wolo myɛ í woyɛɛ dɛ̀ɛn Kirisi kútiiceri-tɛ́ɛgi ni, jàngó gee syɔɔn o syɔɔn kpéʔele lè n wi yaʔa wi céri ni, kapeele yoo, kacànna yoo, wi gi tɔ̀nɔw taa bi yɛlɛ ní wi kapyegèle ní.
Bi bɛ̀ɛ ní Kolocɔlɔɔ ní Kirisi bárigaw ni
11Wolo n gi cán àmɛɛ gi yɛlɛ wolo í da fɛ̀ɛgí Kàfɔw na lè, gee bee na wolo ŋàʔaná syɛ́ɛnbèle na koro ga pye wolo í be fúnyi kàriga. Kolocɔlɔɔ n wolo fúnyi cán, mii sɔ̀nguri i nyɛ gi na n jo yele n wɔ́ɔ̀ wolo cán yele fúnyi ni. 12Ki o nyɛ mɔ a jo wolo n níì séli ni woyɛɛ mɛ́ɛtaanyi yiri yele ma wii í. Kàjáa kanmaa wolo kaangi yele ma, jàngó yele í da nyɔ̌ngbɔɔlɔ táanri wolo kéeli na, koro ga pye bele be lè pe o peyɛɛ gbɔ́ʔɔgi fúnyi kèlē na í, fwɔɔ céri kèlē na, yele í syɛɛnrɛ taa bi lúrugo bele bee ma. 13Kapye wolo n cúro, gee bee i nyɛ Kolocɔlɔɔ kéeli na. Wolo si ga pye wo ga cúro í, gee bee i nyɛ yele kéeli na. 14Níì cán Kirisi tàmagi gi wolo kàragí, wolo n gi tímana n gi nyaa, àmɛɛ wàa nibin kùu lè syɛ́ɛnbèle myɛ sìndɛʔɛ ni, pe myɛ be wɔ́ɔ̀ kùu. 15Wi n kùu syɛ́ɛnbèle myɛ sìndɛʔɛ ni, koro ga pye bele be nyɛ lè sìi na, poro a ní kɔ́ ra pe nyɛnɛ kérigèle kpéʔele be sìíw làla ni í, fwɔɔ wee wòʔolo, woro wee wi kùu lè níì nyán poro kéeli na.
16Koro na tɔ́ɔliw ni wolo ní o syɔɔnwaa faala tímana céri kàbaan na ni yɛlɛgi ní dulunyanw syɛ̀ɛnnɛ tímanaganma ní í. Alí wolo da wíre ni Kirisi tímana lè dulunyanw syɛ̀ɛnnɛ tímanaganma na, wolo ní o wi tímana kánmi bee na í. 17Gee bee na ní syɔ́ɔnwee ga pye lè Kirisi ni, Kolocɔlɔɔ n wee bee faan kavɔn. Wéle, yalɛɛri n sɔ̀lɔ n kwɔ́ɔ, á di kàri wovɔnrɔ. 18Kolocɔlɔɔ wi gee bee myɛ kpéʔele, woro wee wi wolo bɛ̀ɛ lè ní wiyɛɛ ní Kirisi bárigaw ni, ní wɔ́ɔ̀ fáliw bee kaan wolo ma wolo í syɛ́ɛnbèle dɛ̀ɛmɛ pe bɛ̀ɛ ní woro ní. 19Níì cán Kolocɔlɔɔ maa pye Kirisi ni, ní i dulunyanw syɛ̀ɛnnɛ bɛ̀ɛgí ní wiyɛɛ ní, wi da ní ni be kapeegèle córo be kurugo í, wi si n bɛ̀ɛ́li bee tundunro kaan wolo ma.
20Koro na wolo nyɛ Kirisi tundunbéle, á Kolocɔlɔɔ si i syɛ́ɛnbèle yiri wolo jooli báriga ni. Wolo si i yele nyɛ́ɛri Kirisi mɛ́ɛgi na níì jo ye bɛ̀ɛ ní Kolocɔlɔɔ ní! 21Wee wi lè wi ga kapeele pye n nyaa í, a Kolocɔlɔɔ baa wolo kapeeli tugo wi na, koro ga pye wolo í Kolocɔlɔɔ sínni taa woro bárigaw ni.
Currently Selected:
2 Korɛnti ye 5: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
