2 Korɛnti ye 6
6
1Amɛɛ wolo nyɛ lè Kolocɔlɔɔ falipyenyɛ̀nnɛ, wolo i yele nyɛ́ɛri níì jo kpɔ́ʔɔri yele taa wi ma lè, yele a kɔ́ dee bee yaʔa di pye yele ma gbanzan í. 2#Eza 49:8 Níì cán wi n gi joo níì jo:
«Mii n mɔ nyɛ́ɛrigi lóʔo làrijǎnni ni,
ní wɔ́ɔ̀ mɔ dɛ̀ɛmɛ syɔɔli canʔa na.»
Wéle, tɔ́ɔliw naa wi nyɛ làrijǎnni, wéle, níjanʔa wi nyɛ syɔɔli canʔa.
3Wolo a tée pye sábabu syɔɔnwaa faala na wi too keelaa ni í, koro ga pye pe kɔ́ dìgire nyaa wolo fáliw na í. 4Kàjáa wolo kérigèle myɛ i gi tèé ncan wolo i nyɛ Kolocɔlɔɔ falipyejànbēle, àmɛɛ wolo wɔʔɔyi, ní fɔ̀rɔyi, ní kagbanyi myɛ kpàracó lè gbanʔama. 5#Kap 16:23 Pe i wolo kpúmɔn, ní i wolo nii kàsow ni, ní i kàsiikpoloyi yìrigí wolo kurugo, falinɛʔɛw, ní sìnŋunɔmi, ní sìnliimi myɛ i wolo fɔ̀rɔgí. 6A wolo funjǎnyi, ní wolo cánni, ní wolo fûnnyinyi, ní wolo kapyejǎngèle wɔ́ɔ i gi tèé wolo i nyɛ Kolocɔlɔɔ falipyejànbēle, Pìicǎnni, ní wolo tàmadelegi, 7ní kányɛɛgi syɛ́ɛnrɛ, ní Kolocɔlɔɔ séew báriga ni n fàra sínni kapɛɛnkpumɔn-yárira na dee ní wolo kapɛɛnni kpúmɔn ni woyɛɛ zyoo nigoobèle ma lè. 8Pe i wolo kpɔ́ʔɔgi ní wɔ́ɔ i wolo faari, pe i wolo mɛ́ɛpɛɛnyi yiri, ní wɔ́ɔ i wolo mɛ́ɛtaanyi yiri. Pe i wolo córo jànvaafɔɔlɔ, bi gi taa wolo i nyɛ kányɛɛjoobéle. 9Pe i wolo córo mɔ a jo syɛ́ɛnbèle ga wolo cán í, bi gi taa pe n wolo cán gbanʔama. Pe wɔ́ɔ i wolo córo mɔ a jo wolo n kùu, bi gi taa wolo i nyɛ woweebèlē ní. Pe i wolo kpúmɔn, wolo si o kúu í. 10Pe i wolo kanibɛɛngèle kpéʔele, wolo si i nyɛ fundaanra na làla o làla. Wolo i nyɛ mɔ a jo fɔ̀ngɔfɔɔlɔ bɛɛ, bi gi taa wolo i pèle saʔa kpéʔele lɔrɔfɔɔlɔ. Wolo i nyɛ mɔ a jo yafyɛn o nyɛ wolo ma í, bi gi taa yáriri myɛ i nyɛ wolo wóro.
11Yele Korɛnti ye, wolo nyɔ́ɔyi n wolo funviiw myɛ joo yele ma. Wolo n yele láa ní wolo fúnyi myɛ ní. 12Wolo ban wo yele tàmagi cée í, yele tiimaa fúnyi ni ki céeli taa. 13Mii i nyuu ní yele ní mɔ a jo mii pìibēle bɛɛ, àmɛɛ wolo yele láa lè ní wolo fúnyi myɛ ní, ye wɔ́ɔ yaa koro wonijangi kpéʔele wolo ma!
Tágafɔbèle ní sìndagabèle ga yɛlɛ pe pwɔɔ peyɛɛ na í
14Ki ga yɛlɛ yele ní sìndagabèle í pwɔɔ yeyɛɛ na keelaa na í, ki pye mɔ a jo yele i nyɛ sèjira ní be ní í. Níì cán katimanalìí li nyɛ sínni ní kolomi nínge ni? Mɛ̀ɛ́ gbɛ̀ɛ́nmi ní yébilimi a gbǎn pínɛ bi sɛ́ɛ? 15Bɛ̀ɛlìí félile li nyɛ Kirisi ní Beliyali#6:15 Beliyali: Mɔ ga lóʔo Beliyali, Sutanaw na be nyɛ. Mɛ́ɛgi naa kɔ́rɔ wi nyɛ nifaʔaga. níngi ni? Ba mɛ̀ɛ́ tágafɔlɔ ní sìndagaɔ a gbǎn bɛ̀ɛ bi sɛ́ɛ? 16#Lev 26:12; Ezek 37:27; 1Kor 3:16; 6:19 Mɛ̀ɛ́ Kolocɔlɔɔ kpɔ̀ʔɔrɔli kpaʔa ní yasunyi a gbǎn pínɛ bi sɛ́ɛ? Níì cán wolo i nyɛ Kolocɔlɔɔ woweew kpɔ̀ʔɔrɔlɔ kpaʔa, àmɛɛ Kolocɔlɔɔ gi joo lè níì jo:
«Mii a tɛ́ɛn be níngi ni,
sáā nyaari ní be ní.
Mii a pye be Kolocɔlɔw,
poro si pye mii syɛ́ɛnbèle.»
17 #
Eza 52:11
Gee bee na Kàfɔw jo:
«Ye yiri be níngi ni, yé láʔa be na.
Ye a kɔ́ tánga yanɔnʔɔgɔ na í,
koro ga pye mii a fɔ̀lɔ yele na,
18 #
2Sam 7:14; 1Cán 17:13; Eza 43:6; Zyer 31:9 si pye yele Tóow,
yele si wɔ́ɔ pye mii jáabèle,
pe lè nanbèle ní cébèle.»
Séew Myɛ Kàfɔlɔ wi gi joo ànbée.
Currently Selected:
2 Korɛnti ye 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
