2 Korɛnti ye 4
4
Pǐli lɔnɛʔɛrɛ di nyɛ lè cóori yaleye ni
1Amɛɛ Kolocɔlɔɔ nyinimɛ taa wolo na lè níì fáliw naa kaan wolo ma, koro na fɔ̀rɔyi o wolo fǎngi kwóo í. 2Fɛ̀ɛ́ri kèlē syɛ́ɛnbèle kpéʔele lè làrama ni, wolo n gele bee cée. Wolo o wolo kérigèle kpéʔele ní sícilibeemɛ ní í, wolo o Kolocɔlɔɔ syɛ́ɛnri fɛ̀ɛ́ í. Kàjáa kányɛɛgi wolo fíligi ni nyuu, jàngó syɛ́ɛnbèle myɛ nibin nibin í da wolo mɛ́ɛtaanyi yiri be fúnyi ni Kolocɔlɔɔ yɛ́ʔɛ ma. 3Syɛɛnjóocǎnri wolo nyuu lè, ti ga làra pèle na, bele be peyɛɛ pùuní lè, poro na di làra. 4Dulunyanw naa kolocɔlɔɔ#4:4 Dulunyanw naa kolocɔlɔɔ: Mɔ ga lóʔo dulunyanw naa kolocɔlɔɔ, Sutanaw na be nyɛ. n sìndagabèle sɔ̀ngurɔ tɔ́n, koro ga pye pe a kɔ́ Syɛɛnjóocǎnri gbɛ̀ɛnmɛ nyaa í, bee bi Kirisi nìjangbɔɔri tèé lè, woro wee wi nyɛ lè Kolocɔlɔɔ niwiriw. 5Wolo o woyɛɛ kéeli nyuu í, Kirisi Zyezu kéeli wolo nyuu níì jo woro wi nyɛ Kàfɔw, ní níì jo wolo tiimaa i nyɛ yele púlobéle Zyezu kéeli na. 6#Sél 1:3 Níì cán Kolocɔlɔɔ wi gi joo lè níì jo: «Gbɛ̀ɛ́nmi í da nyín da yirigi yébilimi ni,» woro wonijanw wi wɔ́ɔ̀ gbɛ̀ɛ́nmi lége wolo fúnyi ni, jàngó woro nìjangbɔɔri cánna gbɛɛnmɛ í da nyín da yirigi Kirisi yɛ́ɛgi ni.
7Cánni bee i nyɛ lɔnɛʔɛrɛ wolo fúnyi ni, wolo bele ni di nyɛ lè wolo i nyɛ àmɛɛ yaleye nyɛ lè yee be faan ní cóoro ní lè, jàngó bi gi tɛ̀ɛn séekpɔɔw i nyɛ Kolocɔlɔɔ wóo, wolo wóo ban í. 8Pe i kagbangèle féleye myɛ cáan wolo na, ke si o wolo jáagi í. Wolo fúnyi i nyáʔami wolo na, wolo si o nyɛ sɔ̀ngumɔ tɛɛtaʔaga fun ni í. 9Pe i wolo wɔʔɔ, kàjáa dɛ̀ɛmɛfɔlɔ ga fɔ̀n wolo na í. Pe i wolo kpúmɔn ni cáan, wolo si o kúu í. 10Zyezu kùúw kéele i nyɛ wolo céri ni làla o làla, jàngó pe wɔ́ɔ ra Zyezu sìíw nyaagi wolo céri báriga ni. 11Níì cán wolo wo nyɛ lè woweebèlē ní, pe i wolo kaangi kùúw ma làla o làla Zyezu kéeli na, koro ga pye Zyezu sìíw í wɔ́ɔ ra nyaagi wolo céri báriga ni di kúu lè. 12Kánmi bee na kùúw báara wolo ni, sìíw si i báara yele ni.
13 #
Ŋún 116:10
Amɛɛ gi sɛ́bɛ lè níì jo: «Mii n tága, koro na mii joo!» Tágali bee wonijanna si li nyɛ wolo fúnyi ni, koro na wolo wɔ́ɔ̀ tága ní i nyuu. 14Wolo n gi cán wee wi Kàfɔw Zyezu nyán n yìrige lè, woro wi a wɔ́ɔ ba wolo nyán yìrige ní Zyezu ní, si wolo ní yele kpóʔoro woyɛɛ na wiyɛɛ daana. 15Gee bee myɛ i kpéʔele wolo na yele kéeli na, jàngó àmɛɛ kpɔ́ʔɔri nɛʔɛgi ni syée yɛʔɛ̀ ma lè syɛɛnnɛʔɛmi báriga ni, bariga kaanni í wɔ́ɔ ra nɛʔɛgi da syée yɛʔɛ̀ ma, nìjanri sáā taari Kolocɔlɔɔ na.
Bi pye sìi na tágali báriga ni
16Koro na fɔ̀rɔyi o wolo fǎngi kwóo í. Alí kàa ga ni yirigi wolo céri fànʔa ni, kàa si tɔ́ɔ i taari wolo pìígèle wóʔo na canʔa o canʔa. 17Níì cán lǎli cɛɛri wɔʔɔlɔ i nyɛ wɔʔɔbile, li si i bàngwɔɔ nìjangbɔɔrɔ taari wolo na wonɛʔɛrɛ ní gbanʔama. 18Yáriree syɛ́ɛnbèle nyaagi lè, wolo o dee bee wéle í, fwɔɔ dee di lè syɔɔn a gbǎn di nyaa í. Níì cán dee syɛ́ɛnbèle nyaagi lè, ti a kwɔ́ɔ, dee si di lè syɔɔn o di nyaagi í, toro i nyɛ bàngwɔɔ wóro.
Currently Selected:
2 Korɛnti ye 4: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
