2 Korɛnti ye 3
3
Joogaanvɔnni falipyebèlē kéele
1A yele jo lé wolo í náa ní gi séli bàā wolo tiimaa mɛ́ɛtaanyi yiri yele ma? Wàlá ba yele jo lé wolo màko i nyɛ gi na bi wolo mɛ́ɛtaanyi sɛ́bɛbéle caa sa tɛ̀ɛn yele na, koro ga jáa bi pèle nyɛ́ɛri yele ma àmɛɛ pèle gi kpéʔele lè? 2Yele ye nyɛ wolo sɛ́bɛw wee wi sɛ́bɛ lè wolo fúnyi ni, wee syɛ́ɛnbèle myɛ cán lè, ní i wi kàlá. 3#Yir 24:12; Zyer 31:33; Ezek 11:19; 36:26 Ki n tɔ̀nɔ n fílige ncan yele i nyɛ Kirisi sɛ́bɛw, wee wi sɛ́bɛ lè wolo fáliw báriga ni, wi ga wi sɛ́bɛ ní sɛ́bɛkaanna ní í, fwɔɔ ní Kolocɔlɔɔ woweew Pìle ní. Wi ga wɔ́ɔ̀ wi sɛ́bɛ kàdɛnɛyɛ kàlagorigēle na í, fwɔɔ syɔɔn fúngi kàlagolo na wi wi sɛ́bɛ.
4Koro gi nyɛ wolo tágali Kolocɔlɔɔ na Kirisi bárigaw ni. 5Ki o nyɛ mɔ a jo wolo i gi sɔ̀ngí wolo fúnyi ni n jo keelaa n kpéʔele wolo tiimaa báriga ni í, kàjáa Kolocɔlɔɔ wi séew kaangi wolo ma. 6#Zyer 31:31 Woro wi séew kaan wolo ma wolo í pye joogaanvɔnni falipyebèlē, làlwaw sɛ́bɛ joogaanna ban í, Pìicǎnni wólo lii. Níì cán làlwaw sɛ́bɛrɛ i syɛ́ɛnbèle kúu, Pìicǎnni si i sìi kaangi be ma.
7 #
Yir 34:29
Fáliwee wi da ni kùúw kaangi lè, wee sɛ́bɛrɛ pe da sámaga n sɛ́bɛ lè kàdɛnɛyi na, wi maa tɔ̀nɔ n pye ní nìjanra ní, fwɔɔ Isirayɛli ye da gbàn ni be yɛ́ɛyi nii Mowizi wógi ni í wi yɛ́ɛgi nìjanra kéele na, bi gi taa nìjanri bee maa ni kwóo, 8ki ga pye nya Pìicǎnni fáli a pye ní nìjanra ní bi sɔ̀lɔ nìjanri bee na ì? 9Fáliwee wi da ni kolomi kaangi syɔɔn ma lè, wee bee ga pye ní nìjanra ní, ye gi cán fáliwee wi sínni kaangi lè, woro nìjanri n kpɔ́ʔɔ n sɔ̀lɔ wee bee wóro na gbanʔama. 10Kányɛʔɛ ni wee na nìjanri da sélì pye lè, ki i nyɛ mɔ a jo nìjanra da pye wi na í, àmɛɛ nìjanri naa kpɔ́ʔɔ n sɔ̀lɔ dee bee na lè. 11Níì cán fáliwee wi da ni kwóo lè, kapye wee bee maa pye ní nìjanra ní, ye gi cán wee wi lè wi a kwɔ́ɔ bi nyaa í, woro i nyɛ ní nìjanra ní gbanʔama n sɔ̀lɔ wee bee wóro na.
12Amɛɛ wolo wo sɔ̀ngumi taʔa gee bee na lè, koro na wolo soro gbanʔama. 13#Yir 34:33 Wolo o gi kpéʔele àmɛɛ Mowizi da gi kpéʔele lè í, woro wee wi da wi yɛ́ɛgi tɔ́n ní fàni ní lè koro ga pye Isirayɛli ye a kɔ́ nìjanri kwɔ́ɔmɔ nyaa í, dee ti da ni kwóo lè. 14Kàjáa pe sɔ̀nguri maa pye yébilimɛ. Alí nlaa fwɔɔ n baa nan níjanʔa na, pe ga ni joogaanlɛɛli syɛ́ɛnrɛ wéle ni nyuu lǎlee ni lè, fàniw bee wonijaɔn n kòro yaà wodɔɔn ní. Wi ga láʔa í, níì cán Kirisi bárigaw ni wi a gbǎn láʔa. 15Alí níjanʔa pe ga ni Mowizi syɛ́ɛnri wéle ni nyuu, fàni i yaà wodɔɔn ní be fúnyi na. 16#Yir 34:34 Syɔɔn fúngi si ga kàri Kàfɔw ma lǎlee ni lè, fànitɔnw bee a láʔa. 17Kàfɔw si wi nyɛ Pìicǎnni. Tɛ́ɛgee ni Kàfɔw Pìle nyɛ lè, wɔ́rɔdi i nyɛ nɛɛ bee. 18Wolo bele myɛ yɛ́ɛyɛ yi nyɛ womúguyo ní lè, wolo i Kàfɔw nìjanra tèé mɔ a jo dùbale ni, Kàfɔw wi lè Pìicǎnni, wi i wolo kàragí, a nìjanraa i taari tàa na fwɔɔ bi taa wolo í ba woro tiimaa wíri.
Currently Selected:
2 Korɛnti ye 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
