Josue 6
6
Ja israelenio jumasa, oj yi'e kan ja Jerico
1Ja b'a wax ajyi ochel ja chonab' Jerico lutxi kani, kan talnuman b'a mi oj ochuke ja israelenio jumasa. Mi ma' oj b'ob' ochuk sok mi ma' oj b'ob' eluk ja b'a chonab' jawi. 2Ja'yuj ja Dyosi, ti yal yab' ja Josue:
—Oj ka' b'a a k'ab' ja chonab' Jerico, jach'ni ja smandaranumi, sok ja lekil soldado jumasa yi'oji. 3Ja we'n sok wa soldado jumasa, jun majke oj sututananik ja b'a sjoyanal ja chonab' ja jun k'ak'u, wake k'ak'u jach' oj ja k'u'lukex. 4Juke pagre oj ek' b'ajtan yuj ja skajonil strato ja Dyosi, june oj yi'e jujune skacho'e. B'a sjukil k'ak'u, a petsanilex juk majke oj sututananik b'a sjoyanal ja chonab'i, ja'xa pagre jumasa oj ya'we ok'uk ja skacho'e'i. 5Tsa'an oj cho ya'we ok'uke najat. Yajnixa wabyexi, spetsanil ja winiki oj awanuke tsats, jaxa sts'akab'il ja chonab'i, oj ch'ak jemuk; jaxa we'nlexi, ch'akan ochanik b'a jujune ja chonab' jumasa.
6Ja Josue stsomo ja pagre jumasa ti yal ya b'aj: —Wajtikik, tuluwik ja skajonil strato ja Dyosi. Ek'anik b'ajtan jukwane b'a oj ja wa'wex ok' och wa kacho'exi.
7Tsa'an ti yala yab' ja swinik jumasa: —ochanxa b'ejyanik b'a sjoyanal ja chonab'i. Ja ma'tik b'ajtan wajum yuj ja skajonil strato ja Dyosi, chapanxa aye b'a tiro'aneli.
8-9Jach' jastal yala ja Josue, jach'ni sk'u'lane'a, ya ek' b'ajtan jun nole ay stujk'anub'. Tsa'an ti wajye nochan jun nole pagre mix ch'ajb'ajiye ya'jel ok'uk ja skacho'e'i. Tsa'an ti wajye nochan ja pagre jumasa ma yi'oje ja skajonil strato ja Dyosi, tsa'an ti jak nochan jun nole ay stujk'anub'e. 10Ja Josue yaloj yab' ja swinik jumasa: —Ka'axik ch'ab'an, mok ma yab' ti wajumexa. Jaxa yajni x'alji a wabyex oj awananiki, awananik sok spetsanil wa wipexi.
11Ja jun nole winike jawi, yi'aje och ja skajonil strato ja Dyosi, ya'we sututuk b'a sjoyanal ja chonab'i, tsa'an cho kumxiye ja b'ay ja na'its k'u'lub'al so k'u'uts jumasa b'a ti oj ya'we ek' tiw ja a'kwali. 12B'a pilan k'ak'u sajto k'e ja Josue, cho sjeka ja pagre jumasa, a cho yi'e och ja skajonil strato ja Dyosi. 13B'ajtan el ja jun nole it tsa'ub'ale ay stujk'anub'e'i, ti cho el nochan ja juke pagre it ay skacho'e'i. B'a spatik ja ye'nle'i, ti wajye ja pagre jumasa ma'tik yi'oj ja skajonil strato ja Dyosi, tsa'an ti cho wajye ja jun nole ma cho ay stujk'anub'e'i. 14Ja b'a schab'il k'ak'u kechani jun majke sututananik b'a sjoyanal ja chonab'i, ti cho kumxiye b'a skarpa'e'i. Wake k'ak'u jach' sk'u'lane. 15Ja b'a sjukil k'ak'u sajto lek ch'ak k'e'uke, b'a waj b'ejyuke b'a sjoyanal ja chonab'i, ja k'ak'u jawi juk majke oj ja wa'wex yi. 16B'a sjuk majkili, yajni wa'ne ya'jel ok'uk ja skacho'e' ja pagre jumasa, ti yala ja Josue:
—Awananik sok spetsanil a wipex. —Ja Dyosi, ya'ata b'a jk'ab'tik ja chonab'i. 17Ja chonab' sok ja swinkil jumasa, oj ch'ak jch'aytik sna'jel spetsanil, lajan sok jastal jun smajtan oj ka'tik yi ja Dyosi. Kechan na'awik lek mok waj ja k'u'lukex yi b'a mi lekuk ja Rahab sok ja yuntikil yuj ja ye'n snak'a ja ma jekatik waj yil ja chonab'i. 18Mok jas a wi'ex ja b'a t'ilan oj ch'aytik sna'jeli. Kechan ta waj k'a a wi'ex jel niwan ja wokol oj a'juk ki'tik ja b'a'ytiki. 19Spetsanil ja sakal tak'in, ja k'anal tak'in, ja bronce, sok ja yerro, ja sb'a Dyosi, ti'xa wa'wex b'a snolo lab'il.
20Yajni ya'we ok'uk ja skacho'e ja pagre jumasa, jaxa soldado jumasa sok spetsanil yip awaniye, jaxa sts'akab'il ja chonab'i, ch'ak jemuk. Yajni yila ja soldado jumasa ch'ak jemuk, ch'ak ochuke ja b'a yoj chonab'i, snol k'ab'ine ja ma'tik tey tiwi, man yi'aje kani. 21Sok machit ch'ak smil'e ja winike'i, ja ixuke'i, ja yal untiki, ja b'ankilal jumasa. Jach'ni cho sk'u'lane yi ja swakaxe'i, ja scheje'i, sok ja sburro'ei.
Ja Rahab sok ja yuntikili, skoltan sb'aje
22Ja Josue yala yab' ja chawane ma waj sk'el b'ajtan ja chonab'i: —Ka'xik b'a snaj ja Rahabi, ka xkoltanik sok ja yuntikil jumasa, jach'ni jastal a walojex yab'i.
23Yajni yabye ja chawane jawi, ti waj sle'e b'a ay ja Rahab sok ja yuntikil jumasa, ti yi'aje och b'a jun lugar b'a oj sta' skoltajel meran, b'a sts'e'el ja na'its k'u'lub'al sok k'u'uts jumasa. 24Jaxa soldado jumasa, slapawe sk'ajk'al ja chonab'i, ch'ak stsik spetsanil ja jastiki, ja b'a yi'aje kani, ja' sakal tak'in, ja k'anal tak'in, ja vasija b'a bronce, sok ja yerro, spetsanil ja it jumasa ja ya'we sta' sb'aj sok ja jastik sb'aj ja Dyosi. 25Kechan skoltan sb'aj ja Rahab sok ja yuntikili. Skolta ja Josue yuj ja ye'n snak'a ja chawane winik ma waj sk'el'e b'ajtan jastal ja chonab' Jerico. Man ya'n ayto yintil jumasa ja Rahab b'a yojol ja israelenio jumasa.
26Tsa'an yajni ch'akta ja chonab' Jerico, ja Josue ya sna' ja israelenio jumasa: —Mini jun ma oj b'ob' stojb'es yajk'achil ja chonab' Jerico. Chikan ma wa sk'ana oj sk'u'l jachuki, oj a'ji ko' sb'aj jun niwan wokol yuj ja Dyosi. Ta ayk'a ma kechan oj k'e stojb'es ja b'a janek'to kan tek'ani, ja Dyosi, oj ch'ak ya cham spetsanil ja yuntikile ja kristyano jumasa jawi.
27Spetsanil ja jas k'u'lan ja Josue ja'ni koltaji yuj ja Dyosi, spetsanil ch'ak pukxuk ja jastal ch'ak b'ob' yuji.
Currently Selected:
Josue 6: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
