Josue 7
7
Ja smul ja Acani
1Ja yintil ja Zerahi, tey sok ja k'ole sb'a Juda, ay jun winik sb'i'il Acan, ja' stat ja Carmi, ja stat awel ja Zabdiji. Ja winik jawi, mi sk'u'an ja yab'al ja Dyos a'jiyi ja yuntikil ja Dyosi. Ja Dyosi yala oj sch'ak ja chonab' Jerico, jaxa Acani ay jas yi'aj kani, sok mi sk'ana ja Dyos ay jas oj kanuk. Ja'yuj jel tajki ja Dyos sok ja israelenio jumasa.
2Ti aye b'a Jerico ja Josue sjeka chab' oxe winike man b'a chonab' Ai. Ja chonab' jawi, tey b'a stojol wax jak ja k'ak'u yuj ja Beteli, mojan ay sok ja chonab' Bet-aveni. Ti yala yabye'a: —Ka'axik kax ilawik spetsanil ja jas oj b'ob' a wil'ex ja b'a chonab' Ai, cho jach'ni b'a sjoyanali.
Ja winik jumasa jawi, sk'u'ane ja jas alji yabye yuj ja Josue, 3yajni kumxiye'i, jak yal'e ja jas yilawe'i: —Ja chonab' b'a Ai mi jel niwanuk. Mok a jek spetsanil ja kristyano jumasa mi oj sta' b'a oj ayuke'a. Jeka jun chab' mil (2,000) ma oxuk mil (3,000) malan sok ja jawi.
4Ja'yuj kechan oxe mil (3,000) winik waj snol k'ab'uke ja swinkil ja chonab' jawi, jaxa swinkil ja chonab' Ai, ilji sk'ujole yuja ja ma' k'oti, 5nutsjiye alji yabye ja lek a yaktaye kan ja chonab'i, ja'yuj ch'ak spak e' ajnel b'a wits man b'a mixa chikanuk ta ayto b'ej. Yajni timb'ujiye'i, ti'xa ko'umekon b'a wits yajni milji jun tajb'e sok wak lajune (36) ja israelenio jumasa. Ti axwiye tiwi, och sxiwele.
6Jaxa Josue sok ja ma'tik ay ya'tel yuj ja israelenio jumasa, ti ochye mojan sok ja skajonil ja strato sk'u'lunej ja Dyosi, ch'ak sch'i' ja sk'u'e'i, stikawe ta'an ja s'olome' b'a oj sje'e jel niwan ja scham k'ujole'i. Ti ochye nujana man sta'a ja lu'um ja spatane'i, jach' ajyiye jastal jaw man och ja a'kwali. 7Ti yala ja Josue:
—Dyos kujtikon, we'n waxa talnayotikon, ¿Jastal lek a wala oj ek' jk'utstikon ja niwan ja' Jordani? —Mix k'u'an yuj oj ja wa'wotikon b'a sk'ab' ja amorreo jumasa b'a oj ch'ak sch'ay jna'jeltikon. Ayxta b'i ti'xa xa wa'wotikon kan b'a sk'axil ja niwan ja' Jordani. 8Dyos kujtikon, ja jsoldadotikon jumasa axwiyeta wa'ne spakjel ajnel, Mix na'a jas oj k'u'luk. 9Yajni xwaj yabye ja cananeo jumasa sok spetsanil ja ma ti aye tiwi, oj sjoyb'anotikone ti ch'ak smil'otikone'a. ¿Jasunk'a oj ja k'u'luk b'a mi ma oj yal'e yuj mi b'ob' talnaxuk a wuj ja wa wuntikil b'a?
10Ti alji yab' ja Josue yuj ja Dyosi:
—K'e'an tek'an. ¿Jasyuj ja ti pakana ek' b'a lu'umi? 11Yuj ja jach' wa'n ek'eli, yuj ja sta'a smul ja israelenio. Ja ke'n kala wabyex ch'akan ch'akawik sna'jel spetsanil ja jas ay b'a chonab' Jerico. Ja iti lajan kalatikik jach' oj k'u'luktik. Jaxa we'nlexi, ay jas a wi'ajex kan ja jastik junuk jawi. A welk'anex kani, ti waj ja nak' ex b'a yoj ja najex, sok mi cho a walawex stojol ja jas a k'u'lanexi. 12Ja'yuj minix b'ob' yuj ja israelenio'a. —Pakawik ajnel ja ye'nle'i sb'ej ni oj ch'ay sna'jelea. Ja ke'n mi ma oj kolta ta yuj k'a mi oj ja ch'ay'ex sna'jel ja jas kala mi oj ja yam'exi. 13Tulu a b'aj wajtik. Ala yabye ja kristyano jumasa a noxjuke lek a schap sb'aje ja jecheli. Jach' oj ja wal yabye jastal iti: Ja Dyos yuj ja israelenio jumasa yala oj kal a wabyex oj ja ch'ay'ex sna'jel spetsanil ja jas ay b'a chonab' Jerico, jaxa we'nlexi, ay jas a wi'ajex kan b'a t'ilan oj ch'ayxuk sna'jel ajyi. 14Ja'yuj ja jecheli ch'akan tsomo b'ajik, pilan pilan b'a jujune k'ole, ja k'ole b'a oj kal oj ek' b'ajtani, jujune oj ek'uk sok ja yuntikili. Jaxa k'ole untikal oj kali, oj ek' b'ajtan b'a sti' sat ja smoj alijel jumasa. Jaxa ma'tik smoj alijel sb'aj oj kali, oj ek' b'ajtan spetsanil ja winiki, jujuntik oj ek'uke. 15Ja winik ma oj kali, ye'n yi'oj ja jas t'ilan oj ch'ayxuk sna'jeli. Tsikawik sak'an sok ja yuntikili, sok spetsanil ja jastik sb'aji, yuj ja lom mi sk'u'an ja jas kalunejtik sok ja Dyosi. Ja jas sk'u'lani kechan ita ya sta' k'ixwel ja israelenio jumasa.
16Ja pilan sakb'eli stsomo sb'aje ja israelenio jumasa. Spetsanil ja k'ole jumasa ch'ak ya och mojan ja Josue jujuntik ya ek'uk ja' ko' sb'a oj ek' b'ajtan ja k'ole sb'a Juda. 17Jach' och ek' jujuntik ja k'ole jumasa b'a smoj alijel sb'aje sok ja Juda, b'aya ja ko' sb'aj ja k'ole sb'a Zeraji, ja ko' sb'a ja yuntikil ja Zabdi, 18jach' och ek' jujuntik spetsanil ja winiki. Ja ko' sb'aj ja Acan yunin ja Carmi, ja yij ja Zabdi, ja k'ole sb'a Juda. 19Jaxa Josue ti sjob'o yi ja Acani:
—Kala unin, b'a sti' sat ja Dyos yuj ja israelenio jumasa, ala kab' ja smeranili; ala ja jas a k'u'luneji. Mok a le' jastal oj ja lo'layon.
20—Jaxa Acani —ti yal yab' ja Josue —merani'a. —Jta'a jmul sok ja Dyos yuj ja israelenio jumasa. Yuj ja jach' jk'u'lani 21ja b'a jastik jumasa ki'ajtikoni, ti kila jun pake tsamal k'u'uts sb'a Babilonia, chab' kilo sakal tak'in, sok jun mak'e k'anal tak'in wax ek' yuj ja nalan kilo ja yalali. Jel tsamal kila ja jastik jumasa jawi, ja'yuj ti jnolo'a sok ti jmukunej b'a yoj jnaj, ja sakal tak'in it tey man yojoli.
22Sjeka chab' oxe winike ja Josue b'a snaj k'u'lub'al sok k'u'uts ja Acani. Yajni yabye ja winike jumasa jawi ajnel waj yil'e, ja jas smukunej ja Acani, ch'akni sta'e'a. Ja sakal tak'in ye'n ib'elajel ay. 23Yajni sta'awe'i, ch'ak yi'e', ti'xa elye b'a snaj ja Acani, ch'ak waj ya'we yi b'a sk'ab' ja Josue, jaxa ye'n, ti'ni ay sok ja kristyano jumasa'a. Ja jastik jumasa jawi, ti ch'ak waj ya'we b'a sti' sat ja Dyosi. 24Jaxa Josue sok spetsanil ja israelenio jumasa, ti yi'aje ja Acan sok ja yelk'al b'a loman yaman sb'i'il Acor,#7:24 Ja Acori, wa sk'ana yale, ab'al k'umal. cho yi'aje spetsanil ja yuntikili, keremtik ak'ixuk sok ja yal ch'in untiki, spetsanil ja swakaxi, ja sburro, ja scheji, spetsanil ja jas yi'oji ch'ak yi'e', man snaj yi'aje yi. 25Yajni k'otye b'a tiwi, ti yala ja Josue: —¿Jasyuj ja mini jun lek ja jas a k'u'lan ki'tikon b'a? Ja ya'n, cho jach'ni ja we'n ay jas mi sb'ejuk oj sk'u'luk a wi ja Dyosi.
Jaxa israelenio jumasa ti och sch'oje' tona man smilawe, cho jach'ni ja yuntikil jumasa. Yajni ch'ak chamuke'i, ti ch'ak slap'e k'ak' spetsanil'e'a, 26ja b'a slapawe k'ak'i, ya'we jun monton ton man ya'n ti'ni aya. Ja'yuj ya'we sb'i'iluk Acor. Jach' ek ja stajkel ja Dyosi.
Currently Selected:
Josue 7: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
