Josue 10
10
Ja israelenio jumasa yilaweta sk'ujol ja amorreo jumasa
1Ja Adonisedek mandaranum b'a Jerusaleni, yab' ja' Josue sch'aka sna'jel spetsanil ja chonab' Ai sok ja smandaranumi, jach'ni jastal sk'u'lan sok ja chonab' Jerico sok ja smandaranumi. Cho yab'i, ja israelenio jumasa slajuneje jun lo'il b'a slekil ja swinkil ja Gabaoni, sok ti'xani aye lajana. 2Sok ja jawi, jel och ja sxiweli, yuj ja chonab' Gabaon jel niwan wax ilji, cho jel niwan yuj ja chonab' Ai. Lajan sok ja chonab' jumasa b'a ay smandaranumi, mi kechanuk ja jawi, ja winik jumasa jel tsatse. 3Ja'yuj ja mandaranum Adonisedeki, sjekayi jun ab'al ja mandaranum jumasa iti, ja Hohami, ja Pirami, ja Jafia sok ja Debiri. Jaxa it jumasa ye'n mandaranume b'a chonab' jumasa b'a Hebroni, b'a Jarmuti, b'a Laquis sok b'a Egloni. Ja slo'ili, jach' wax yala jastal iti: 4—B'a mi jas oj ek' yuj ja swinkil ja Gabaoni, ya'ata slo'ile sok ja Josue, cho jach'ni sok ja israelenio jumasa. Ja'yuj, la koltanonik oj nol k'ab'uktike, —xchi ja mandaranumi.
5Ja jo'wane mandaranum jawi, stsomo sb'aje, sjoyb'ane ja chonab' Gabaoni, ochye b'a yoj chonab'i. 6Jaxa swinkil ja Gabaoni sjekawe ma oj waj yal yab' ja Josue yuj ja ye'n tey k'ot b'a snaj it k'u'lub'al sok k'u'uts b'a Guilgali: Ti yalawe'a la'ik la koltanotikonex. Ja mandaranum jumasa sb'a amorreo it ti aye ek' b'a witsi, stsomo ta sb'aje b'a oj snol k'ab'ukotikone. Mok a jip'otikonex kani. La koltayotikonex.
7Yajni yab' ja Josue juts'in el ja b'a Guilgali, yi'aj spetsanil ja soldado jumasa ye'n, cho yi'aj ni ja ma'tik chapan leki. 8Ja mitox elye'i, alji yab' ja Josue yuj ja Dyosi: —Ka'axik mok xiwanik, ke'n oj ka'a wil'ex sk'ujole. Ja ye'nle'i, mini jun ma' oj kan yujile sak'an ja ye'nle'a.
9Ja Josue sok ja soldado jumasa ye'n snajtil a'kwal b'ejyiye man k'otye b'a Gabaoni, jun ch'ay k'ujol ochye ja b'ay ja amorreo jumasa. 10Yajni yila ja kristyano jumasa jel jitsan ja soldado israelenio b'a Gabaoni, jel a'ji och sxiwele yuj ja Dyosi. Sok jel jitsan miljiye yuj ja israelenio jumasa, jaxa tuki ch'ak i'juk spatike b'a yoj yaxk'ul man b'a Bet-horon, cho smilawe'to ja kristyano jumasa b'a Azeca sok b'a Maqueda b'a ko'el k'inali. 11Ja amorreo jumasa spakawe ajnel yuj ja israelenio jumasa yajni ko'umexa ko b'a Bet-joroni, a'ji ko' sb'aje niwak b'at yuj ja Dyosi. Snajtil ja b'eji wa'n ko'el sb'aje man Azeca, jel jitsan smila ja kristyano jumasa ja b'at yuj ja stujk'anub' ja soldado jumasa.
12Ja k'ak'u koltajiye ja israelenio yuj ja Dyosi, a'ji yil sk'ujol ja ma' mi lek wax yila sb'aje soki, jaxa Josue sk'uman ja Dyos b'a sti' sat spetsanil ja israelenio jumasa, ti yala'a:
—Moka nika b'aj ja we'n k'ak'u;
ti la kan tek'an b'a Gabaon.
Jaxa we'n, nan ixaw,
majlan b'a loman yaman Aialon.
13—Jaxa k'ak'u, k'ot ni tek'ana,
jach ni ja nan ixawi mini t'un snijki'a,
man ya'we stup ja smul
ja ma'tik mi lek wax yila sb'aje sok ja israelenio jumasa.
Ja iti, jach' kan ts'ijb'anub'al b'a sju'un ja ma toji. Ja k'ak'u, ti kan tek'an b'a nalan satk'inal, t'usan mi snajtiluk jun k'ak'u tek'ani. 14Mixani b'a ilxi pilan k'ak'u'a, cho mixani ojto ilxuk ja jastal it ja smaklan ja Dyos ja jastal sk'ana ts'akatal ja winiki. —Yujni ye'ni ja Dyos yuj ja israelenio'a. 15Tsa'an yajni yilaweta sk'ujol ja ma'tik mi lek xyila sb'aje sok ja israelenio jumasa, jaxa Josue sok ja soldado jumasa yi'oji, ti'xa kumxiye b'a na'its k'u'lub'al sok k'u'uts b'a Guilgal.
Yamji sok milji ja jo'e smandaranum ja amorreo jumasa
16Ja jo'e smandaranum ja amorreo jumasa, b'ob' spak e ajnel ti waj snak' sb'aje b'a jun k'e'en b'a Maqueda. 17B'aya ay ma ta'jiye k'ot yuj cho k'oy schikin ja Josue. 18Ja'yuj ti yala ja Josue: Kax b'altsunik jan chab' oxuk niwak ton b'a oj maktik sok ja sti' k'e'eni, cho a'wik kan chab' oxuk ma' oj stalna. 19Jaxa we'nlexi, mok ma kanuk a wujilex ja tiwi. Nochowik ja ma'tik mi lek waxa wila b'ajex soki. Mok ma spak ajnel yujile oj waj b'a snaje. Ye'n ja Dyos oj ya kiltik sk'ujol ja ma' mi lek wax kila jb'ajtik soki.
20Ja Josue sok ja soldado jumasa yi'oji, jel jitsan smilawe ja amorreo jumasa, kechan ayni ma b'ob' spak ajnel yujile'a, ti waj skolta sb'aje b'a schonab'ile. 21Spetsanil ja soldado jumasa sb'a Josue lek ch'ak kumxuke b'a snaje b'a Maqueda ja b'ay ja Josue. Jach'ni ja ma' tey tiwi, mini jun ma' mi lekuk k'umani sb'aj ja israelenio jumasa'a.
22Ti yala ja Josue a sjam'e ja k'e'eni, a i'juk ochyi b'a sti' sat ja jo'e mandaranumi. 23-24Ti'xa sjamawe ja sti' ja k'e'ena, yi'aje och ja mandaranum jumasa sb'a Jerusaleni, ja sb'i'ile'i, jach' jastal iti. Hebron, Jarmut, Laquis, sok Eglon. Jaxa Josue spaya spetsanil ja israelenio jumasa, ti yala yab' ja ma'tik niwak ya'tel yuj ja soldado israelenio: Jitsanik jani, b'atawik yi ja snuk' ja mandaranum jumasa iti.
Jaxa ye'nle'i, jach'ni sk'u'lane'a, 25Ti yala ja Josue: Tsatsal k'ujolan a b'ajex. Tsats ajyanik mok xiwanik. A' sniwanil a k'ujolex, yujni jach' oj sk'u'l jastal it ja Dyos sok ja ma' mi lek waxa wila b'ajex soki.
26Jaxa Josue ti'xa smila ja jo'e mandaranuma, yala jujune aji k'e'uke lokan te', cho yala tix kanye lokan tiw man oj och ja a'kwali. 27Yajni och ja k'ak'u, ti'xa yala ja Josue a ya'we ko'uk ja sb'ak'tel ja cham winiki, tix cho waj ya'we kan b'a k'e'en b'a snak'unej sb'aje ajyi. Smakawe kan lek sok niwak ton ja sti' ja k'e'eni.
Ja Josue sjapayi jitsan ja slu'um ja amorreo jumasa
28Ja Josue ja k'ak'u jawi, yi'aj kan ja chonab' Maqueda, ti yala a miljuk ja mandaranum sok spetsanil ja swinkil jumasa ja chonab' jawi. Jach'ni jastal sk'u'lanyi ja mandaranum b'a Jerico, jach' sk'u'lanyi ja mandaranum b'a Maqueda. Mini jun ma skolta sb'aj ja.
29Yajni elye ja Josue sok ja soldado jumasa, b'a chonab' Maqueda, ti wajye b'a chonab' Libna, cho snol k'ab'ine ja tiwi. 30Ja Dyosi, skolta ja israelenio b'a yil k'ujolan ja swinkil ja chonab' jaw sok ja smandaranumi. Smilawe spetsanil ja ma'tik tey tiwi. Ye'n smila ja Josue ja mandaranum b'a Libna, ja jastal sk'u'lan yi ja mandaranum b'a Jerico, jach'ni cho sk'u'lanyi ja mandaranum iti, mini jun ma skolta sb'aj ja.
31Yajni el ja Josue b'a chonab' jawi, ti waj b'a Laquis, sjoyb'ane ja chonab' sok ja soldado jumasa cho snol k'ab'ine. 32B'a schab'il k'ak'u wa'ne tiro'aneli, ti'xa koltajiye yuj ja Dyos ja israelenio jumasa. Ch'ak smil'e spetsanil ja ma tey b'a yoj chonab'i, jach'ni jastal sk'u'laneyi ja swinkil ja Libna. 33Yilawe sk'ujol ja Horam mandaranum b'a Guezer it jak sok ja soldado b'a oj skolta ja swinkil ja Laquisi. Mini jun ma skoltan sb'aj ja.
34Elye b'a Laquisi, ti wajye b'a Eglon. Sjoyb'ane ja chonab'i, snol k'ab'ine ja swinkili. 35Ja k'ak'u jawi, ochye, sok ch'ak smil'e spetsanil ja ma' ti' aye tiwi, jach'ni jastal sk'u'laneyi ja swinkil ja Laquisi.
36Ja Josue sok spetsanil ja soldado jumasa, ti wajye b'a chonab' Hebron, snol k'ab'ine ja swinkil ja chonab' jawi, 37yi'aje kani, smilawe ja mandaranumi, smilawe spetsanil ja swinkil ja chonab'i, cho jach' sk'u'laneyi ja chonab' jumasa b'a mojan ay soki. Ye'n yala ja Josue a sch'ay'e sna'jel spetsanil ja swinkil ja chonab'i, jach'ni jastal sk'u'laneyi ja chonab' b'a Egloni. Mini jun ma skolta sb'aj ja.
38Tsa'an ti wajye b'a Debir, snol k'ab'ine ja swinkili, 39ye'n yi'aje kan ja chonab' jaw sok ja smandaranumi. Cho ochyeni ja b'a chonab' jumasa b'a mojan yi'oj sb'aji, ch'ak smil'e spetsanil ja ma tey tiwi. Jach' sk'u'lan ja Josue sok ja chonab' jawi, cho jach ni sk'u'lan sok ja chonab' jumasa b'a Hebron sok b'a Libna: Yala a miljuk ja smandaranumi, sok spetsanil ja swinkil ja chonab'i. Mini jun ma skolta sb'aj ja.
40-42Jach' ch'ak yi'kan jastal it ja Josue spetsanil ja lu'um jumasa jawi. Tiro'ani b'a yoj yaxk'ul, b'a yoj wits b'a stojol wax jak ja k'ak'u, jach'ni b'a stojol wax och ja k'ak'u, cho jach'ni b'a takin lu'um k'inal jumasa b'a ko'el k'inali. Ja soldado jumasa yi'oj ja Josue ti' yi'aj och b'a Cades-barnea b'a ko'el k'inal, man b'a Gasa b'a mojan sti' ja niwan paman ja'. Ch'ak sb'ejtaye spetsanil ja slujmal ja Gosen.#10:40-42 Gosen: Schonab'il ko'el k'inal ja Palestina. Mok ma sjom sk'ujol sb'aj sok ja schonab'il ja egipsiano it junxta sb'i'il soki. K'otie man b'a Gabaon b'a k'e'el k'inal. Ch'ak smil'e spetsanil ja mandaranum jumasa b'a lu'um jumasa jawi, jach'ni ja kristyano jumasa ma tey tiwi, yujni jach' yalunej ja Dyos yuj ja israelenio jumasa'a. Mini jun ma skoltan sb'aj ja.
43Tsa'an yajni ch'ak ek'uk ja iti, ti'xa kumxiye b'a snaje k'u'lub'al sok k'u'uts b'a Guilgal ja Josue sok ja soldado jumasa.
Currently Selected:
Josue 10: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
