Josue 9
9
Ja swinkil gabaoni slo'laye ja Josue
1Ja mandaranum jumasa yuj ja kristyano jumasa b'a Canaani, sna'awe ja israelenio yilaweta sk'ujol ja ma' mi lek wax yila sb'aje soki. 2Ja'yuj slaja sb'aje b'a oj ochuke tiro'anel sok ja Josue sok ja israelenio jumasa.
3B'a'ya yajni yabye ja swinkil ja gabaon ja ma' ti' aye sok ja k'ole sb'a heveo jumasa, ja jas k'u'lan ja Josue b'a chonab' Ai sok b'a Jerico, 4yalawe oj slo'laye. Wajye chab' oxe waj sle' jas oj yabye, yajni sta'awe'i, ch'ak ya'we skuch ja sburro'ei, sok jujuntik k'a'el bolsa, cho ya'we och ya'lel ts'usub' b'a ye'tal jelxa poko, b'a maktonxta. 5Ja sk'u' swexe'i, ja sxanab'e'i, jelxa yi'ojik. Ja b'a oj yabye'i kechan ay yi'oje takin ts'ub'il waj, b'a jach' oj ya'we sk'u'uk ja Josue najat jakele. 6Yajni k'otye b'a na'its k'u'lub'al sok k'u'uts jumasa b'a Guilgali, ti yalwe yab' ja Josue sok ja israelenio jumasa:
—Ti jakelotikon b'a jun chonab' najat lek. Wax k'ana oj ka' jun jlo'iltikon a mokex.
7Jaxa israelenio jumasa, ti sjob'o we'a:
—¿Jas sb'ej ja waxa k'ana oj ja wa'a lo'ilex jmoktikoni? ¿Jastal oj na'tikon ta mi ti'uk ita a b'ajukex ek' il mojan?
8Jaxa swinkil ja gabaoni, ti yalwe yab' ja Josue:
—Wax k'ana oj ka' jb'ajtikon b'a oj a'tijukotikon a mok.
Ja Josue, cho sjob'o yi'e pilan majke:
—¿Mach'ayex ja we'nlex b'a? ¿B'a jakelex a?
9Ja swinkil ja gabaoni, ti och yal ja slo'ile'i:
—Jmoj alijel, ja ke'ntikoni, ti jakelotikon b'a jun chonab' najat lek, yuj ja' jmaklantikon ja jas jel tsamal sk'u'lan ja wa Dyos we'nlexi. Ch'ak kab'tikon spetsanil ja jas k'u'lan b'a Egipto, 10cho kab'tikon ja jas sk'u'lanyi ja chab' smandaranum ja amorreo jumasa b'a sk'axil ja niwan ja' Jordani, Ja Sihoni ti mandaranum ay b'a Hesbon, jaxa Ogi ti mandaranum ay b'a Basan, sok ti ajyi b'a Astarot. 11Yalawe kab'tikon ja ma'tik ay ya'tel kujtikoni, sok spetsanil ja jmojtikon jumasa b'a jchonab'iltikoni, i'ajik jitsan ja jas oj ja wabyexi, najat lek oj b'ejyanik, ja'ni oj waj ja ta'a b'ajex sok ja israelenio jumasa'a. Ochan a'tijananik soke, k'anawik a ya' jun lo'il a mokex. Xyuta jotikone. 12—K'elawilex ja jas wax kab'tikoni. Ja yajni eltikon ja b'a jnajtikoni k'ixinto lek, jaxa ya'n ch'akta takjuk sok ch'akta b'uyuk. 13Ja yajni jb'ut'utikon jan ya'lel ts'usub' ja ts'u'um jumasa iti, yajk'achilto lek; jaxa —Ya'n k'elawilex jastal ay. —Maktonikxta, spetsanil ja jas wax lapatikoni, mixa ni jun ya'tela, ja jxanab'tikoni ch'akta yuj tanto b'ejyeli.
14Ja israelenio jumasa lek yilawe ja oj yabye lajan ja jas yi'oje och ja swinkil ja gabaoni, mini t'un sjob'owe yi ja Dyos ta lek ma mi lekuka. 15Ja'yuj ja Josue, sk'u'lan sok jun lo'il ja swinkil ja gabaoni, cho yala yab' ti x'ajyiye'a jel lek oj ek' yujile. Jach'ni ja ma'tik ay ya'tel yuj ja israelenio jumasa, cho yala ja ye'nle ojni skis'e' ja lo'il sk'u'luneje'i.
Ja israelenio sna'awe ja jastal wa'ne lo'lanel ja swinkil ja gabaoni
16Kechan oxe k'ak'u ek' ja sk'u'lan ja slo'ile'i, ja israelenio sna'awe ja gabaoni mojan ita yi'oje, 17tsa'an k'otye ja b'a chonab' jumasa: b'a Gabaon, b'a Quefira, b'a Beerot sok b'a Quiriat-jearim, ja'ni b'a ajyiye ja kristyano jumasa jawi. 18Ja kristyano jumasa jawi, mi b'ob' smil'e ja israelenio, yuj ja ma'tik ay ya'tel yujile'i yaloje, b'a sb'i'il ja Dyos yuj ja israelenio mi ma oj smil'ex. Jaxa israelenio och stajb'aye ja ma'tik ay ya'tel yujile'i, 19jaxa ma'tik ay ya'teli, ti yalawe'a:
—A jak a k'ujolex kalojtik yabye, b'a sb'i'il ja Dyos yuj ja israelenio jumasa, mi jas oj k'u'ltikon a wi'ex b'a mi sb'ejuk. 20Ja'yuj mini jas oj b'ob' jk'u'ltik yi'e'a, kechan ta ke'n mi oj k'u'uktik, ye'n ja Dyos oj ya jtuptiki. 21Jaxa ye'nle'i, ti'ni oj a'tijuke jmoktika, oj wajuke noloj si', oj skuch e' ja'.
22Ja Josue, sjeka spayjel ja swinkil ja gabaoni, ti sjob'o yi'a:
—¿Jas lom a lo'lanotikon ja lom a walawex najat lek jakelexi, ja smeranili, ti'ita a b'ajex ek' il mojan tak? 23Yuj ja jach' a k'u'lanexi, ja'yuj ja Dyosi, oj ya' ochanik b'a oj moso'ukextikon, man ya'n oj wajanik noloj si', oj ja kuch ex jan ja' b'a snaj ja jDyosi.
24Ti sjak'awe ja ye'nle'i:
—Ta yuj k'a jle'atikon ab'al, ja'yuj ja wala xiwtikon ja oj chamkotikoni. Ja ke'ntikoni, wax na'atikon ja jas yaloj yab' ja Moises sok spetsanil ja israelenio ja wa Dyos we'nlexi. Yala oj ya' wi'ex spetsanil ja lu'umi, sok sjeka miluman spetsanil ja kristyano jumasa. 25Ja ya'n ti aytikon b'a wa k'ab'. K'u'lan ki'tikon ja jas lek waxa wila ja we'n.
26Jach' skoltan jastal it ja swinkil ja gabaon ja Josue mi sk'ana oj miljuke yuj ja israelenio jumasa. 27Kechan, ya'ni a'tijuk jastal moso'a, sjeka noloj si', skuchuwe ya'al ja israelenio jumasa, sok skuchuwe ya'lel ja altar b'a snaj ja Dyosi. Man ya'n wa'n ts'ijb'axel ja lo'il iti, jaxa swinkil ja gabaoni, jach'toni wa'ne a'tel man ya'n yuj ja ye'n stsa'a ja Dyos b'a oj ajyuke'i.
Currently Selected:
Josue 9: YABD
Highlight
Copy
Compare
Share
Want to have your highlights saved across all your devices? Sign up or sign in
© Sociedad Bíblica de México 2021
