Lukase 6:27-49

Tá’, mèŋ n gɔɔn mbwo pi pie pi ne ńjú’u shwóŋè yɔ́ɔn ngie, pi kwoŋ megàŋ mbù pí, ńgÿo pɔ́ nò mbòŋo ná pʉ̀a pie pɔ́ pʉa gẅí. Pi tsɔ́ɔn pɔ́ nò mbòŋo á nà twó pʉ̀a pie pɔ́ ne ńtsɔ́ɔn nò tepòŋ ná pi. Pi sẅíŋte Ssé nà twó pʉ̀a pie pɔ́ ne shwóŋe tépoŋ nà lezíŋ sí. Nyìŋ cúa pwó letwóŋó ɔ̀, ɔ̀ sele yetsɔ́ gwǒŋ, ńná á mege ńcúɔ. Nyìŋ gwoon gú ńkẅé nzsǒ fÿɔ́g jù, ɔ̀ mege sẅɛ nzsǒ jù, ńná né yé. Awɔ̌wɔ́ɔ tó ńdúɔ mmó mbwo gù wɔ́, ɔ̀ ná. Nyìŋ tó ḿbíi mmó jú ńdɔg ńgʉa, ɔ̀ pɔ́ɔn lékʉ́a. Ammó gie pi ne ńtsɔ́ɔn ngie me gÿo ná pi lá, pi gÿo kwà’ yɛ̌ ná petsɔ́ pʉ̀a. Pi lɔɔn ńkwoŋ pɔ́ ndà’ pʉ̀a pie pɔ́ kwoŋo gẅí, mbà mé ge gíŋe ná ndǎg né pi nà kɔ́? Megàŋ mefʉ̀a zɔ́ɔn ńkwoŋ yɔ́b pɔ́ pʉ̀a pie pɔ́ kwoŋo wɔ́b. Pi lɔɔn ne ńgÿo nò mbòŋo pɔ́ ndà’ ná pʉ̀a pie pɔ́ gÿo nò mbòŋo ná pi, mbà mé ge gíŋ ná ndǎg mbwo pi nà kɔ́. Mbɔɔ megàŋ mefʉ̀a gíŋe ńgÿo yɔ́b pɔ́ pá’ pi. Pi lɔɔn fu nkáb pɔ́ mbwo pʉ̀a pie pi zsě ngie pɔ́ ge gÿo tsɔ́’, mbà mé ge gíŋe ná ndǎg mbwo pi nà kɔ́. Mbɔɔ megàŋ mefʉ̀a gíŋe fu nkáb pɔ́ mbwo petsɔ́ pʉ̀a tepòŋ, ńne ńzsé ngie pɔ́ ge táa gíŋe tsɔ́’ pɔ́ yɛ̌ náa mbwo pɔ́b. Ammó gie á poŋ ngie pi gÿo gwɔ́ pɔ́ ngie: Pi kwoŋ megàŋ mbù pí, ńgÿo pɔ́ nò mbòŋo ná pɔ́b. Pi fu nkáb mbwo nyìŋ té sáŋ ngie ngàŋ ge gÿo tsɔ́’. Pi lɔɔn ne ńgÿo pú’u, mbà Ssé ge lá’ náa gẅi máa ntsɔ’ɔ́ fà’, pi gíŋe ńgwɔ́ púɔ Ssé gẅie à pi’i kɔ̀ɔkɔ́ɔ, ńtí nue kwà’ yé ne ńgÿo nò mbòŋo ná pàjÿó ńjÿɔg ncwò, mbɔɔ ná megàŋ sóon. Pi tsɔ́ɔn mezìŋe pʉ̀a pá’ Tá gẅi Ssé tsɔ́ɔn mezìŋe mânyìŋ ntsèm. Tà pi ńnéŋe ńtúu lɔ’ɔ́ pʉ̀a ḿbɔ́g Ssé létúu gí *lɔ̌’. Tà pi ńnéŋe ńkʉ́e pʉ̀a ḿbɔ́g Ssé lékʉ́e gẅí. Pi ńnéŋe ńdege mefʉ̀a pʉ̀a, e Ssé lege mefʉ̀a mí. Pi ńnéŋe ńkẅéte pʉ̀a, e Ssé gÿo ńkẅéte gẅí. Mé ge gÿo néŋ shúm tsɛ̀ɛ pɔ̀ɔn nyìŋ tà à lúe mé tsɛte, ńdẅíŋe, tà memvòm pʉle ssé! Pi zsé ngie Ssé ge táa ńnéŋe pɔ́ɔn gí pɔ́ pá’ pi zɔɔn ńnéŋe ye petsɔ́ pʉ̀a! Yěsô gíŋe sag ngie: Tà à lɔɔn ńgwɔ́ afʉ̀ menÿɔ́g kíbe pwó wetsɔ̌ pɔ́ yé giŋ? Ngǎŋ! Mbà pɔ́b mépʉ́a ge gʉa pú gwe tsɛ̀ɛ gem, ńgíŋe ngie: Anzì’i fà’ tè tá fà’ we cʉa. Tá’, anzì’i fà’ gẅie à zi’í fà’ tà ńcʉ́me gÿo yé pá’ tá fà’ we lá. Á piŋ ngǎ ɔ̀ ne ńgyá múɔ méfùbe pǐŋ gie e gwě lejÿɔ́g fɛ́ gù, tá kúmo nuŋe lejÿɔ́g gù, ɔ̀ piŋ ńké tè gyá? Ngwɔ́ ɔ̀ gǎ tá ńgɔɔn né fɛ́ gù ngie: Afɛ̌, cʉ́’ n kẅile fùbe pǐŋ yɛ gie ee lejÿɔ́g gù lɛ, ńgwaa gɔɔn éfó le ne ńgyá kúmo gẅie à nuŋe nà shú wɔ́ wɔ́? Ɔ̀ɔ ngàŋ melɔ̀ɔn, vɔg ńkẅile kúmo gẅie aa lejÿɔ́g gù, tà ne ńcwoŋo ńgyá jʉ’ tá ńku’u lékẅile fùbe pǐŋ tsɛ̀ɛ lejÿɔ́g fɛ́ gù. Yěsô gíŋe ńgɔɔn ngie: Atÿǒ mbòŋo té zém ntɔ̌ɔn tèpòŋ wɔ́. Atÿǒ tepòŋ piŋ ńké tè ntɔ̌ɔn mbòŋo zém. Mé zsé yɛ̌ tÿǒ wɔ́ pɔ́ nà mentɔ̌ɔn mé. Mé ée ntě ńkába shʉ́shÿó nà tÿǒ shʉ́shÿó nè wɔ́. Ndʉŋ ndʉŋ pá’ à lɔɔn ńgwɔ́ mé le káb lepfò nà tÿǒ léngɔɔn wɔ́. Pi zsé ngie nyìŋ lɔɔn ńgẅiin ntʉ́m mbòŋo, mbà à ge gẅiin ncwò mbòŋo, ńgẅiin ntʉ́m tepòŋ, mbà shwóŋè tepòŋ zɔ̌ ge kẅɛɛ ncwò yé, mélà’mie nyìŋ gɔɔn pɔ́ nò gie áa tsɛ̀ɛ ntʉ́m yé. Yěsô gíŋe ńgɔɔn ngie: Mélà’a kɔ́ pi ne ńtóŋo wɔ̀ɔn lé Andè! Andè! MÀbiŋ ńké tè ne ńgÿo mmó gie mèŋ n tsẅǐ wɔ́? Nyìŋ lɔɔn ńtó, ńtsɛ́ɛ wɔ̀ɔn, ńzẅí’te shwóŋè yɔ́ɔn, ńgÿo pá’ á né ńzɛ́te, mbà à ge sẅé nyìŋ gẅie n gee nyɛ̌ pi lɔɔn. Angàŋ gwá’a tsɔ̌ nyìŋ wa gẅie à la cʉ́’ʉ lékwɛ́ ndá, ḿvɔg ńtúŋo jʉ’ tǔŋ tà ńkúu nà máa tóon tá ḿbwóon cÿó ndá, tá ńtÿɔ́g ndá mǒ. Mbʉ̀ŋ gÿo ńdú, ngʉ̀a ntse tó ńtéme nà cÿó ndá, tá ńké tè ku’u légÿo tà é ŋele wɔ́, mélà’mie mé la nyɛte ńkwɛ́ ndá mboŋó. Tá, nyìŋ gẅie à ju’ú shwóŋè yɔ́ɔn, ńgʉa, à tè gÿo pá’ n gɔ̌ɔn wɔ́, mbà ngàŋ gwá’a tsɔ̌ nyìŋ gẅie à la léen ńkwɛ́ yé ndá kwɛ́ pɔ́ tè pwǒon cÿó. Mbʉ̀ŋ gÿo ńdú, ngʉ̀a ntse tó ńtéme nà ndá, é keme ḿbʉle ssé lê jû.