Lukase 6
6
Yěsô zɔ poŋo nò nà lyɛ̌’ɛ nzsé pà Yuda
(Matio 12.1-8; Malékuse 2.23-28)
1Á laa tsɔ́ *lyɛ̌’ɛ nzsé pà Yuda, Yěsô pâ ngàŋa nkwò yé ne ńcʉa tsɛ̀ɛ nká’a ngesáŋ ntsíŋ, ngàŋa nkwò yé gíŋe sẅé ngesáŋ ŋwɛ́, éshʉ’ʉ mbwó pɔ́b ḿpfɛ́ɛ. 2Tsɔ́ pʉ̀a nà nùɔ pà *farisay zɛ́te wɔ́b ngie: Mélà’a kɔ́ pi gÿo mmó gie mé la pʉ́ légÿo á lyɛ̌’ɛ nzsé? 3Yěsô tsɔ́’ ngie: Pi laa fó ńtóŋo jʉ’e ŋwà’ne Ssé gie á la’te mmó gie fùɔ Ndavíd la gÿo wɔ́ ka? Pá’ á laa tsɔ́ lyɛ̌’, nzyè gyáŋa yé lâ pʉ̀a pé, 4á kúu tsɛ̀ɛ ndá Ssé, ḿbí mbelég gie mé nǎ mbwo Ssé, ḿpfɛ́ tà ńná ye ngàŋa nkwò yé, tá *lepʉ̌ gɔɔn ngie ndà’ *pànùŋe pwɔ́’ zɔ̌ gẅiin lépfɛ́! 5Yěsô fó mǒ, ńdêen ńké ńgɔɔn né pɔ́b ngie: *Míŋ Nyìŋ zɔ zɔɔn ńgẅiin légɔɔn mmó gie à lɔɔn ńgwɔ́ mé gÿo nà lyɛ̌’ɛ nzsé pà Yuda.
Yěsô zeŋé tsɔ̌ nyìŋ gẅie pwó yé la kwé
(Matio 12.9-14; Malékuse 3.1-6)
6Á gíŋe ńgwɔ́ tsɔ́ lyɛ̌’ɛ nzsé pà Yuda, Yěsô kúu *ndá cú’tè pà Yuda, ńně ńda’te nò Ssé. Atsɔ̌ mámbàŋa gwɔ́ yé ndá ŋwɛ́, mbà pwó yé ye tʉ̀ léen ńkwé. 7Pà *farisay pâ *pàkyàgte lepʉ̌ Mǒsê ńnéŋe ssé ńně ńdʉŋe Yěsô ngie kà à ge gÿo nyìŋ zeŋe *lyɛ̌’ɛ nzsé wɔ́, mélà’mie pɔ́ la zɔɔn ne fa’a mmó gie pɔ́ ge fó mǒ lɔg sẅiŋe yé. 8Tá Yěsô vɔg ńzsé nkwaŋá wɔ́b, ńgɔɔn né kwè pwó ngie: Lu ssé ńtó ńtyé mvfò lá’. Á lu ssé ńtó. 9Yěsô lêen ńké ńgɔɔn mbwo pàkyàgte ŋwà’ne Ssé pâ pà *farisay ngie: N ge zɛ́te gẅi tà’a nò. Áa pé’e *lepʉ̌ sége tsẅi ngie mé gÿo kɔ́ lyɛ̌’ɛ nzsé yégè? Ngie mé gÿo nò mbòŋo kà nò tepòŋ? Ngie mé gÿo nyìŋ tsẅɛ́ kà pɔ́ ngie mé zẅé yé? 10Ńzɛ́te tà ńtsẅé jʉ’, ńdíe wɔ́b wémɔ’ɔ́ wémɔ’ɔ́, tà à ku’, á gɔɔn né ngàŋ ngie: Siŋe pwó ɔ́! Á siŋ, mé gyá á tʉte. 11Pà *farisay pâ *pàkyàgte lepʉ̌ Mǒsê gyá, á pú ḿbÿɔ́gɔ wɔ́b tɛ’. Pɔ́ sele ńzɛ́te tsetsɛ̀ɛ pɔ́b ngie: Pege ge gÿo lêkɔ́ lé Yěsô awɛ̌.
Yěsô tsɔ̌’ ngàŋ ntúm yé ntsɔ̀b pʉ́a nê legém
(Matio 10.1-4; Malékuse 3.13-19)
12Yěsô gwɔ́ lyɛ̌’, ńgʉa ndùm lekwɔ’ɔ́ lésẅíŋte Ssé, tà ńdá’a wó lá’. 13Njÿó lʉ́a, á tóŋ *ngàŋa nkwò yé, ńgʉa tsetsɛ̀ɛ pɔ́b, ńtsɔ́’ pʉ̀a ntsɔ̀b pʉ́a nê legém, ńtsẅi lezíŋ sɔ́b lê ngàŋ ntúm wé. 14Wɔɔn laa Símo gẅie Yěsô la tsẅi tsɔ́ lezíŋ sé le Piɛ, ńgÿo Ndeléya, á fɛ́ Símo ŋwɛ́, ńgÿo Jâg, ńgÿo Jâŋ, ńgÿo Filib, ńgÿo Patelemî 15ńgÿo Matio, ńgÿo Tomáse, ńgÿo Jâg míŋ Alfe, ńgÿo Símo gẅie pɔ́ lɔ́ɔn ńtóŋo yé le mûɔ ngwòŋ, 16ńgÿo Jẅide míŋ Jâg, ńgÿo Jẅidas Iskariod gẅie à la táa sẅiŋe Yěsô.
Yěsô shwóŋó nò Ssé ḿbiŋ ńgÿo megùɔ zeŋe
(Matio 4.23-25; Malékuse 3.7-11)
17Yěsô pâ *ngàŋ ntúm yé gie à tsɔ̌’, fó ndùm lekwɔ’ɔ́ sẅɛ́’ tà ńkúu tsìŋe lekwɔ’ɔ́, ńgyá yetsɔ́ *Ngàŋa kwò yé gwɔ́ jʉ’ó tà ńgyɔ́ɔn pâ nùɔ lá’, mbà mé fǒ nà pàga ngwòŋ Jẅidea, éfó tÿǒsoŋ Yerósalem, éfó mengʉ̀ŋe metÿǒsoŋo Tir pɔ́ Sidoŋ tà mbɔɔ metÿǒsoŋ mie ée nkʉ̀ŋ ntse. 18Pɔ́b metsèm tóo pú’u, léju’u shwóŋè Yěsô, mbɔɔ pá’ à ge gÿo megùɔ mɔ́b zeŋe. Pʉ̀a pie *messé tepòŋ la ne ḿbue wɔ́b é zeŋe yɔ́b. 19Mânyìŋ ntsèm la ne fa’a lézába pwó ná yé, mélà’mie metʉ̀ la ne fóo ná yé, ńzoŋo wɔ́b metsèm.
Anò shÿó mbòŋo pɔ́ shÿó tepòŋ
(Matio 5.1-12)
20Yěsô ńnéŋe tà ḿbʉ’ʉ twó yé, ńdíe *ngàŋa nkwò ye, ńgɔɔn ne pɔ́b ngie:
Pi ee pàshÿó mbòŋo, pi pie pi ee mepóŋ, mélà’mie *lefùɔ Ssé gwɔ́ pɔ́ sí.
21Pi ee pàshÿó mbòŋo pi pie pi ne ńkwé nzyè fʉ̀’ɔɔn, mélà’mie e Ssé ge gÿo jÿɔ́gɔ gẅí, pi zẅɛ́.
Pi ee pàshÿó mbòŋo pi pie pi ee fʉ̀’ɔɔn ńne ńdʉa, mélà’mie pi ge gÿo gẅe.
22Pi ee pàshÿó mbòŋo, á na fʉ̀’ gie pi cʉmé nzèm *Míŋ Nyìŋ, mé piŋ ne ḿbʉa gẅí, ńne ńkʉ́e gẅí, ńne ńzoonte gẅí, ńne ńcʉŋte lezíŋ sí. 23Yɔɔn nò lɔɔn ńgwɔ́ tà ne ńgÿo gẅí, pi kág, ńzɔb ńzíŋ, mélà’mie e Ssé nyɛté máamáa ntsɔ’ɔ́ fà’ ńne ńdɔgɔ ńzẅí’te gẅí.
Pi zɔɔn ńzsé ngie á gíŋe ńgwɔ́ pɔ́ ndʉŋ ndʉŋ pá’ metá pɔ́b lɔ́ɔn ńgÿo yɔ́b ná *Pàntsẅì nkʉ̀ Ssé.
24Tá’, pi ee kwà’ pàshÿó tepòŋ pi pie pi ee megàŋa mmó, mélà’mie pi lêen ńgẅiin léjÿó sî shúm mbòŋo pɔ́ ndà’ fʉ̀’ɔɔn.
25Pi ee pàshÿó tepòŋ, pi pie pi ee fʉ̀’ɔɔn ḿpfɛ́ɛ ńzẅɛ́ɛ, mélà’mie pi ge lá’ kwé nzyè.
Pi ee pàshÿó tepòŋ pi pie pi ne ńgẅe fʉ̀’ɔɔn, mélà’mie pi ge lá’ cʉ́’ʉ ńnéŋe pɔ́ tsɛ̀ɛ lemÿɔg é piŋ ne lʉa.
26Pi ee pàshÿó tepòŋ pá’ à lɔɔn ńgwɔ́ epʉ̀a ne ńkíme gẅi pɔ́ mboŋó, mélà’mie á zɔ́ɔn ńgwɔ́ pɔ́ pá’ metá pɔ́b lɔ́ɔn ńgÿo ná *pàntsẅì nkʉ̀ Ssé pe cÿɔ̌ nò.
Pi kwoŋ megàŋ mbù pí
(Matio 5.38-48)
27Tá’, mèŋ n gɔɔn mbwo pi pie pi ne ńjú’u shwóŋè yɔ́ɔn ngie, pi kwoŋ megàŋ mbù pí, ńgÿo pɔ́ nò mbòŋo ná pʉ̀a pie pɔ́ pʉa gẅí. 28Pi tsɔ́ɔn pɔ́ nò mbòŋo á nà twó pʉ̀a pie pɔ́ ne ńtsɔ́ɔn nò tepòŋ ná pi. Pi sẅíŋte Ssé nà twó pʉ̀a pie pɔ́ ne shwóŋe tépoŋ nà lezíŋ sí. 29Nyìŋ cúa pwó letwóŋó ɔ̀, ɔ̀ sele yetsɔ́ gwǒŋ, ńná á mege ńcúɔ. Nyìŋ gwoon gú ńkẅé nzsǒ fÿɔ́g jù, ɔ̀ mege sẅɛ nzsǒ jù, ńná né yé. 30Awɔ̌wɔ́ɔ tó ńdúɔ mmó mbwo gù wɔ́, ɔ̀ ná. Nyìŋ tó ḿbíi mmó jú ńdɔg ńgʉa, ɔ̀ pɔ́ɔn lékʉ́a. 31Ammó gie pi ne ńtsɔ́ɔn ngie me gÿo ná pi lá, pi gÿo kwà’ yɛ̌ ná petsɔ́ pʉ̀a.
32Pi lɔɔn ńkwoŋ pɔ́ ndà’ pʉ̀a pie pɔ́ kwoŋo gẅí, mbà mé ge gíŋe ná ndǎg né pi nà kɔ́? Megàŋ mefʉ̀a zɔ́ɔn ńkwoŋ yɔ́b pɔ́ pʉ̀a pie pɔ́ kwoŋo wɔ́b. 33Pi lɔɔn ne ńgÿo nò mbòŋo pɔ́ ndà’ ná pʉ̀a pie pɔ́ gÿo nò mbòŋo ná pi, mbà mé ge gíŋ ná ndǎg mbwo pi nà kɔ́. Mbɔɔ megàŋ mefʉ̀a gíŋe ńgÿo yɔ́b pɔ́ pá’ pi. 34Pi lɔɔn fu nkáb pɔ́ mbwo pʉ̀a pie pi zsě ngie pɔ́ ge gÿo tsɔ́’, mbà mé ge gíŋe ná ndǎg mbwo pi nà kɔ́. Mbɔɔ megàŋ mefʉ̀a gíŋe fu nkáb pɔ́ mbwo petsɔ́ pʉ̀a tepòŋ, ńne ńzsé ngie pɔ́ ge táa gíŋe tsɔ́’ pɔ́ yɛ̌ náa mbwo pɔ́b. 35Ammó gie á poŋ ngie pi gÿo gwɔ́ pɔ́ ngie: Pi kwoŋ megàŋ mbù pí, ńgÿo pɔ́ nò mbòŋo ná pɔ́b. Pi fu nkáb mbwo nyìŋ té sáŋ ngie ngàŋ ge gÿo tsɔ́’. Pi lɔɔn ne ńgÿo pú’u, mbà Ssé ge lá’ náa gẅi máa ntsɔ’ɔ́ fà’, pi gíŋe ńgwɔ́ púɔ Ssé gẅie à pi’i kɔ̀ɔkɔ́ɔ, ńtí nue kwà’ yé ne ńgÿo nò mbòŋo ná pàjÿó ńjÿɔg ncwò, mbɔɔ ná megàŋ sóon.
Pi lag twó sí létú melɔ̌’ pʉ̀a
36Pi tsɔ́ɔn mezìŋe pʉ̀a pá’ Tá gẅi Ssé tsɔ́ɔn mezìŋe mânyìŋ ntsèm.
37Tà pi ńnéŋe ńtúu lɔ’ɔ́ pʉ̀a ḿbɔ́g Ssé létúu gí *lɔ̌’. Tà pi ńnéŋe ńkʉ́e pʉ̀a ḿbɔ́g Ssé lékʉ́e gẅí. Pi ńnéŋe ńdege mefʉ̀a pʉ̀a, e Ssé lege mefʉ̀a mí. 38Pi ńnéŋe ńkẅéte pʉ̀a, e Ssé gÿo ńkẅéte gẅí. Mé ge gÿo néŋ shúm tsɛ̀ɛ pɔ̀ɔn nyìŋ tà à lúe mé tsɛte, ńdẅíŋe, tà memvòm pʉle ssé! Pi zsé ngie Ssé ge táa ńnéŋe pɔ́ɔn gí pɔ́ pá’ pi zɔɔn ńnéŋe ye petsɔ́ pʉ̀a!
39Yěsô gíŋe sag ngie: Tà à lɔɔn ńgwɔ́ afʉ̀ menÿɔ́g kíbe pwó wetsɔ̌ pɔ́ yé giŋ? Ngǎŋ! Mbà pɔ́b mépʉ́a ge gʉa pú gwe tsɛ̀ɛ gem, 40ńgíŋe ngie: Anzì’i fà’ tè tá fà’ we cʉa. Tá’, anzì’i fà’ gẅie à zi’í fà’ tà ńcʉ́me gÿo yé pá’ tá fà’ we lá.
41Á piŋ ngǎ ɔ̀ ne ńgyá múɔ méfùbe pǐŋ gie e gwě lejÿɔ́g fɛ́ gù, tá kúmo nuŋe lejÿɔ́g gù, ɔ̀ piŋ ńké tè gyá? 42Ngwɔ́ ɔ̀ gǎ tá ńgɔɔn né fɛ́ gù ngie: Afɛ̌, cʉ́’ n kẅile fùbe pǐŋ yɛ gie ee lejÿɔ́g gù lɛ, ńgwaa gɔɔn éfó le ne ńgyá kúmo gẅie à nuŋe nà shú wɔ́ wɔ́? Ɔ̀ɔ ngàŋ melɔ̀ɔn, vɔg ńkẅile kúmo gẅie aa lejÿɔ́g gù, tà ne ńcwoŋo ńgyá jʉ’ tá ńku’u lékẅile fùbe pǐŋ tsɛ̀ɛ lejÿɔ́g fɛ́ gù.
Mé zsé tÿǒ nà mentɔ̌ɔn mé
(Matio 7.16-20)
43Yěsô gíŋe ńgɔɔn ngie: Atÿǒ mbòŋo té zém ntɔ̌ɔn tèpòŋ wɔ́. Atÿǒ tepòŋ piŋ ńké tè ntɔ̌ɔn mbòŋo zém. 44Mé zsé yɛ̌ tÿǒ wɔ́ pɔ́ nà mentɔ̌ɔn mé. Mé ée ntě ńkába shʉ́shÿó nà tÿǒ shʉ́shÿó nè wɔ́. Ndʉŋ ndʉŋ pá’ à lɔɔn ńgwɔ́ mé le káb lepfò nà tÿǒ léngɔɔn wɔ́. 45Pi zsé ngie nyìŋ lɔɔn ńgẅiin ntʉ́m mbòŋo, mbà à ge gẅiin ncwò mbòŋo, ńgẅiin ntʉ́m tepòŋ, mbà shwóŋè tepòŋ zɔ̌ ge kẅɛɛ ncwò yé, mélà’mie nyìŋ gɔɔn pɔ́ nò gie áa tsɛ̀ɛ ntʉ́m yé.
Ngàŋa kwò we nénʉ́
(Matio 7.24-27)
46Yěsô gíŋe ńgɔɔn ngie: Mélà’a kɔ́ pi ne ńtóŋo wɔ̀ɔn lé Andè! Andè! MÀbiŋ ńké tè ne ńgÿo mmó gie mèŋ n tsẅǐ wɔ́? 47Nyìŋ lɔɔn ńtó, ńtsɛ́ɛ wɔ̀ɔn, ńzẅí’te shwóŋè yɔ́ɔn, ńgÿo pá’ á né ńzɛ́te, mbà à ge sẅé nyìŋ gẅie n gee nyɛ̌ pi lɔɔn. 48Angàŋ gwá’a tsɔ̌ nyìŋ wa gẅie à la cʉ́’ʉ lékwɛ́ ndá, ḿvɔg ńtúŋo jʉ’ tǔŋ tà ńkúu nà máa tóon tá ḿbwóon cÿó ndá, tá ńtÿɔ́g ndá mǒ. Mbʉ̀ŋ gÿo ńdú, ngʉ̀a ntse tó ńtéme nà cÿó ndá, tá ńké tè ku’u légÿo tà é ŋele wɔ́, mélà’mie mé la nyɛte ńkwɛ́ ndá mboŋó. 49Tá, nyìŋ gẅie à ju’ú shwóŋè yɔ́ɔn, ńgʉa, à tè gÿo pá’ n gɔ̌ɔn wɔ́, mbà ngàŋ gwá’a tsɔ̌ nyìŋ gẅie à la léen ńkwɛ́ yé ndá kwɛ́ pɔ́ tè pwǒon cÿó. Mbʉ̀ŋ gÿo ńdú, ngʉ̀a ntse tó ńtéme nà ndá, é keme ḿbʉle ssé lê jû.
Currently Selected:
Lukase 6: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.