DOMAANO 4

Töneecanö’e Aawadán wei’jödö

1Ñäädä cadai’choncomo Aawadán cönä’ja’dö naane’. 2Töwö tönnödö que’da Wanaadi jadoonoje cönä’döi. Yääje tönnödö que mma Wanaadi jadoonoje ä’dö’jo mmaane töwö Aawadán o’jodhe chö’tajä’jai cönä’jaacä, Wanaadi owaadäädä’da yeichaame. 3Edääje Wanaadi a’deddu imennaajä nä’döa: “Aawadán Wanaadi cöneecamjöi; yää ñeecamjödö jäcäinchädä Wanaadi töjaadonooje cönnöi;” quee imennaajä nä’döa. 4Ñäädä töweetadaawa’cajoomö ejeemadö töweiye naichö naane’, chäwwä täjemjönö utuudujöönö yää, chaadawaajui’jödö ejeemadööne. 5Yääje’daane Wanaadi jadoonoje wä’dönä. Ñäädä aashichaato ännö’da töweichaame Wanaadi ecaanö’nei, yää ñeecamjödö jäcäinchädä Wanaadi töjaadonooje nödööa. Wanaadi töjaadonooje tönnöe ñäädä conemjönö tödöönei. 6Dawí mmaja ta’cwaiñe cöne’ta’dea ñäädä soto iiñödö jäcäinchädämjönö töjaadonooje Wanaadi nödöödö. 7Edääje cönä’döaacä töwö Dawí:

Ta’cwaiñe naato ñanno choone’nadiiyöcoomo encwanno’ja’como, ñanno choone’nadiiyöcoomo ta’due naadö.

8Ta’cwaiñe ñäädä choone’nadiiyö Cajiichaana aneejemaajo’da naadö; quee cönä’döaacä Dawí.

9Siicunsidaadoja’como mmajöönö ta’cwaiñe töweiyaamoje naato; ñanno yääjemjöncomo mmaja ta’cwaiñe töweiyaamoje naato dea. ¿Yääjönca wä’döaanä: Aawadán necamjödö jäcäinchädä Wanaadi töjaadonooje cönnöi; quee? 10¿Aaquene töweichö Wanaadi jadoonoje Aawadán cönä’döjoi, siicunsidaadoje töweichö ’ja, siicunsidaadoje ä’dö’dadääne? Töwö Aawadán Wanaadi jadoonoje cönä’döjoi siicunsidaadoje ä’dö’dadä. 11Yää ’jejeene siicunsidaadoje wä’dönä cönäätäcammai chäwwä. Yää siicunsidaadoje wä’dönä cönä’jaacä ecamjödö que Wanaadi jadoonoje töweichö yääne’ju’jotoojoje mma. Yääje yeijäcä tameedä quedeiyentecoomo siicunsidaadojemjöncomo adaichöje mmaja Aawadán na dea, ñanno töneecamjödööcomo que Wanaadi jadoonoje yä’döja’como naatoodö. 12Ñanno siicunsidaadoja’como adaichöje mmaja Aawadán weichaame mma’ne, ñanno tujuunucoomo jäcä siicunsidaadoja’como mmajöönööne, Wanaadi a’deddu ecaanö’nnamo deaane, siicunsidaadoje ä’dö’dadä cadai’choncomo Aawadán necamjo’jödö nönge ecaanö’nnamo.

Ecamjödö jäcäinchädä Wanaadi necammadö utuudu yeichö

13Aawadán wwonooje töweiyemööje edä nonoodö Wanaadi cöneecammai, dhatö’jödö wwoncomooje töweiyemööje mmaja. Chäwwäiñe jenaado’jä waanontänä tödöödö jäcäinchädä’da yää Wanaadi cöneecammai, chäwwäiñe ecamjödö weijäcääne. Yää jäcäinchädä töwö Wanaadi töjaadonooje cönnöicho. 14Ñanno jenaado’jä waanontänä woija’como wwonooje mma Wanaadi necamma’jödö weiya’jäcä, ecamjödö töwäädämma eichö, Wanaadi necamma’jödö täje’da mmaja. 15Yää waanontänä wätä’maminchanä mma necamma. Waanontänä ’je’da yeiya’jäcä mmaane ija’do’jo’jödö ’je’da mmaja.

16Yääje yeijäcä yää Wanaadi necamma’jödö cönäätäcammai ecamjödö jäcäinchädä, täje’da yä’tudu wetä yaawä, tameedä Aawadán atö’jödö wwoncomoojeene yeichö wetä mmaja. Jenaado’jä waanontänä woija’como wwonooje mma’da yää Wanaadi necamma’jödö, Aawadán necamjö’jödö nönge ecaanö’nnamo wwonooje mmajaane. Yääje yeijäcä ñäädä Aawadán tameedä cadai’choncomooje na, 17Wanaadi owaadäädä, ñäädä Aawadán cöneecamjöichö dea. Edääje Wanaadi a’deddu imennaajä nä’döa: “Wannacoomo soto adaichöje männöne;” quee. Ñäädä Wanaadi yäämaajo jonno adoncatä, a’cato töncatu’nacaajo mmaja.

18Ñäädä Aawadán cöneecamjöi, täcaanö’emje’dato wa’cä yeichaame. Mädääje wannacoomo soto adaichöje töwö cönä’döi, Wanaadi necamma’jödö nönge dea: “Yää ’cäwa’cä adhaatödö naato’de;” quee yä’dö’jödö nönge dea. 19Yaawä Aawadán cönä’jaacä ijaatoodea sotooto wedu ejoodöjai. Yääje yeichaame aneecamjö’da’da töwö cönä’jaacä, towaanäcä yeichaame inchomje töweichö, töjiiñamo Saada no’samje yeichö mmaja. Tönwanno yä’ja’a’como töweiye naichodööje cöntö’ta’to, yää ennecaajai’cha töweichöcoomo jäcä. 20Töwö Aawadán aneecamjö’da’da cönä’jaacä Wanaadi necamma’jödö; täcaanö’e’cä mmaane cöneecamjöi. Aashicha cöna’deuwöi chea Wanaadi jäcä. 21Töwö dhowaanäcä cönä’jaacä töneecamma’jödö nönge Wanaadi tödööjai yeichö. 22Yääje yeijäcä täcamjödö jäcäinchädä Wanaadi Aawadán töjaadonooje cönnöi.

23Töwö Aawadán jäcä mma’da yää tömennä na: “Ñeecamjödö jäcäinchädä Wanaadi töjaadonooje cönnöi;” quee naadö; 24cönwanno cöjääcäiñe mmajaane yää tömennä na. Cöneecamjödööcomo jäcäinchädä mmaja Wanaadi töjaadonooje cödööato, cönwanno Wanaadi ecaanö’nnamo, ñäädä töwäämaajo jonno Cädhaajotoncomo Jesuuquidiito adoncanei’jödö. 25Ñäädä Jesuuquidiito cöcoone’nadiiyöcoomo jäcäinchädä cönä’tui töwäämadö que. Töwö töwäämaajo jonno cönaadoncai Wanaadi jadoonoje cöwä’döto’comooje.

Currently Selected:

DOMAANO 4: MCH

Highlight

Copy