DOMAANO 3

1¿Ane’cotoojo judhíoje weiñä tujunne nai, yääje yeiya’jäcä, siicunsidaadoje weiñä mmaja, quee ’ja? 2Tujunne mma’ne, tameedä yeichö mmädääne. Judhío wwäiñe Wanaadi cuntui ta’deddu. 3Yääje yeichaame dhantai aneecamjö’da cöneiya’to. ¿Chäänönge Wanaadi weichö ca ninwacaamanto, yääje yeiya’jäcä, aneecamjö’da töweichöcoomo que? 4Ng’jn, yääje’da yeichaame. Wanaadi chäänöngeedä na yeichöje, tameedä soto chäänönge’da yeichaameiñe. Edääje Wanaadi a’deddu imennaajä nä’döa:

Adha’deddu jäcäinchädä chäänönge mätä’täja’de;

chäänönge määneja’de äwäätämmencajoodawä; quee imennaajä nä’döa.

5Edääje anejjacoomo soto töwä’döe weneeneto: “Cönwanno conemjönö cönnödööcomo que aashicha Wanaadi weichö queenejaato;” quee. Yääje yeijäcä ¿chäänönge’da ca Wanaadi ñai yää conemjönö jo’tädööje soto tömmamincha yeijäcä? 6Ng’jn, chäänönge’da’da yeichaame. Chäänönge’da Wanaadi weiya’jäcä soto emmencaneichomooje eijai’cha na yaawä.

7Edääje tö’tajä’a’jäcä naadö naane’: Öwö töwä’dune weichö que chäänönge Wanaadi weichö weneeja. Yääje yeijäcä ¿ane’que’nei Wanaadi conemjönööje ye’taanä chäänönge töwö yeichö eneejotoojojeene yääje weichö yeichaame? quee tö’tajä’a’jäcä, 8chäänönge’da mädääje chö’tajä’jai wa. Chäänönge yääje tö’tajä’nä ei’jo mmaane edääje ä’döjai caato yaawä: Jooje’cä conemjönö cöödötäiye, jooje’cä aashichaato äänejoiye; quee ä’döjai caato, chäänönge’da mmädä. Mädääje soto tönoowanoomaiñe ñaa ecammatä weneeneto, jönaawä mmädä. Mädääja’como wä’dödö chäänönge nätä’maminchajaato’de.

Tameedä conemjönö ’je cöweichöcoomo

9¿Aaquene yaawä? ¿Anejjacoomo e’jodha’como ca ñaa judhíocoomo, yääje yeiya’jäcä? Ñg’jn, cho’jodheiñe’da. Cönwanno cowaanäcäiñe na tameedä conemjönö wwä oto’jodheinchajoojai cöweichöcoomo, judhíocoomo mmaja, judhíojöncomo mmaja. 10Edääje Wanaadi a’deddu imennaajä nä’döa:

Aashichaato ’je’da na soto, tooni’chä a’que.

11Etaanei ’je’da na; Wanaadi ujiiñei ’je’da mmaja.

12Tameedä soto tösaadijange naato, töweecone’ma mmaja.

Aashichaato tödöönei ’je’da na, tooni’chä a’que.

13Chäänöcoomo na äwa a’duccaajä nönge;

töwa’deuwödööcomo quee töwäätäncu’tä weneeneto.

Äcääyu ’madaawai nönge dha’dedducoomo weneene, se’ne;

14conemjönö jäcä mma ya’deuwödööcomo weneene, wä’cu’nä’täjä’nä jäcä mmaja.

15Tönwanno täcoije naato soto ema.

16Töjimmotoncomo nödöödö choone’madö yaacö’comje mmaja weneene dea.

17Täncanoode’da weiñä dhowaanäcäiñe’da na;

18Wanaadi onnontä’da naato dea; quee nä’döa imennaajä.

19Cönwanno cowaanäcäiñe na tameedä waanontänä imennaajä wä’dödö naadö waanontänä imennaajä woija’como wwonooje yeichö, ya’deuto’como ’je’da yeichö wetä. Yääje yeijäcä tameedä edä nono de’woncomo Wanaadi wwä tämmencaamoje naato. 20Jenaado’jä waanontänä tödöödö que Wanaadi jadoonoje ä’döjai’cha caato. Yää waanontänä conemjöncomooje cöweichöcoomo ecammaneije mma na.

Ecamjödö que wääwanaacanä yeichö

21Eduuwa cowaanäcäiñe na yää Wanaadi jadoonoje wä’dönä ecamjödö que mma yeichö, waanontänä tödöödö que’da yeichö mmaja. Mädääje dea waanontänä imennaajä jäcä cönäätäcammai jenaadä; Wanaadi wa’deuwödö ecammannamo’jödö mädääje cömmennoicho dea. 22Jesuuquidiito ecamjödö jäcäinchädä Wanaadi töjaadonooje soto nödööaato, tameedä ecaanö’nnamo. Anejjeja anejja soto weichojo ’je’da na. 23Tameedä soto conemjönö cönnöicho; aashicha Wanaadi weichö nönge töweicho’como ejoodöjai’cha naato. 24Yääje yeichaame Wanaadi töjaadonooje soto nödööaato ejeemajancädä’da, aashicha töweichö woije mmädääne, Jesuuquidiito wwä ewaanaca’jocoomo weijäcä. 25Wanaadi Quidiito cönnöi saaquidiijiisiyooje. Dhaquiiyö cönnöi conemjönö choccatoojoje, yää ecamjödö que tojoodöeemöje naadö. Yää Wanaadi cönnöi chäänönge töweichö ene’ju’to’me. Jenaadä mmaane tumjunne töweichö woije Wanaadi tönshinchä cönä’jaacä soto cöne’nadiiyöcoomo. 26Eduuwaane töwö Wanaadi neneeja chäänönge töweichö, Jesuuquidiito ecaanö’nei töjaadonooje tönnöe töweichö mmaja.

27Yääje yeijäcä o’jodhe chö’tajä’jai’cha caato eduuwa. ¿Ane’que’nei, quee ’ja? Waanontänä tödöödö que’da wääwanaacanä yeijäcä, ecamjödö que mmaane. 28Mädääje na; ecamjödö que Wanaadi jadoonoje cä’döjaato, jenaado’jä waanontänä woije tödöödö que’daane.

29Judhíocoomo Wanaadiyö mmajöönö ñäädä Wanaadi, judhíojöncomo Wanaadiyö mmajaane, 30tooni mmaane Wanaadi weiyajä. Ecamjödö jäcäinchädä töwö Wanaadi töjaadonooje nödööaato ñanno siicunsidaadoja’como, yääjemjöncomo mmaja. 31¿Yääje yeiya’jäcä ca ecamjödö jäcäinchädä jenaado’jä waanontänä quiichiiñeme’cato? Ng’jn, chiiñemeecödööjönö yeichaame, chäänönge mma tödöödö ecammadö mädä.

Currently Selected:

DOMAANO 3: MCH

Highlight

Copy