DOMAANO 5

Wanaadi jadoonoje weiñä

1Yääje yeijäcä, ecamjödö jäcäinchädä Wanaadi jadoonoje cöweichomjäcä, äätu’dedööje’da caato eduuwa Wanaadi jadä, Cädhaajotoncomo Jesuuquidiito woije. 2Quidiito woije Wanaadi jadoonoje cä’dötääne ecamjödö que; yääje yeijäcä Wanaadi nutuudu aashichaato cöwwäiñe na. Yää Wanaadi nutuudu aashichaato cöwwäiñe yeijäcä ejääduqueejö’da caato; ta’cwäiñe mmaja caato dea cowaanäcäiñe yeijäcä aashicha Wanaadi weichö cöwwoncomooje yeichojo. 3Mädä jäcä mma’da ta’cwaiñe caato, cöwäntunamjödaawäiñe mmajaane, cowaanäcäiñe yeijäcä wäntunaanö’nä aashicha tönshinchä weiñä töneejodööjo yeichö. 4Yäätonno yää tönshinchä weiñä aashicha cöcoonecaato yaawä. Aashicha cöweichöcoomo mmaane nejoodöja cöwo’womoocödööcomo. 5Yää cöwo’womoocödööcomo cöjöichojootäiñe’da na’de, Wanaadi jummadö cötö’tajäätödööcomo aca yeijäcä, Epíiditu Santo ni’wa’tädö que, ñäädä cöwwäiñe u’ajä naadö.

6Cönwanno cöwwäädäiñe dea ääwanaacajai’cha cöweichöcoomo Quidiito tucu’nädö awä cönäämai cöjääcäinchädäiñe, cönwanno conemjöncomo jäcäinchädä. 7Cowaanäcäiñe na anejja jäcäinchädä soto äämajai’cha yeichö, aashichaato jäcäinchädä jadä’jödöödä; anejja äämajai yeichaame’da ca’dö jääcä aashichaato jäcäinchädä jeene yeiya’jäcä. 8Quidiito mmaane cöjääcäinchädäiñe cönäämai conemjönö dönnamooje cöwei’jocoomo weichaame. Mädääje Wanaadi cöneenejoi töwwä tujunne cöweichöcoomo. 9Eduuwa Quidiito wääma’jödö jäcäinchädä Wanaadi jadoonoje caato. Töwaacö’je mma eduuwa Wanaadi aashichaato tödööjai ña cöjääcäiñe; töwö cäwaanacaato’de yää wätä’maminchajootojo anootoi’chädö jonno. 10Wanaadi tu’dedööje cöweichöcoomo töwö töjaadä ääweichacoonoje cödöötäne Tönnedö wääma’jödö jäcäinchädä. Töwaacö’je mma eduuwa; chääjadä ääweichacoonoje cöweichomjäcä töwö cäwaanacaato nudä Quidiito weichö que dajaane. 11Cönwanno Wanaadi jäcä ta’cwaiñe caato Cädhaajotoncomo Jesuuquidiito jäcäinchädä, töwö Quidiito jäcäinchädä Wanaadi jadä ääweichacoonoje cöwä’dö’jocoomo weijäcä.

Adhán nödö’jödö, Quidiito nödö’jödö mmaja

12Tooniyaano dhanwa cone’nadiiyö woijatooje conemjönö cöneejä edä nono de’cäi; yää jo’tädööje wäämanä cönaajäntäi yaawä. Mädääje wäämanä cönäämecantäi tameedä soto jäcäiñe, tameedä soto conemjönö tönnöe yeichomjäcä. 13Conemjönö ’je dea cönä’jaacä waanontänä ä’tu’dadä, yaawääne’, waanontänä ’je’da weiñawä ä’dhe’ma’da conemjönö töweiye nai. 14Yääje yeichaame ñanno conemjönö dönnamo töwä’ja’e dea cönä’ja’to, Adhán jonnoto’jödöödä Moisé jona tödööene, Adhán cone’nadiiyö nönge dea’da choone’nadiiyöcoomo yeichaame. Ñäädä Adhán cönä’jaacä töwe’emö cu’tädö.

15Wanaadi nutuudu aashichaato na Adhán cönnöichö nönge’da. Ñäädä Adhán cone’nadiiyö cönoowonö’jacai jooja’como soto wä’ja’to’comooje, tooni mma töwö yei’jödö weichaame. Jesuuquidiito nödö’jödö mmaane Wanaadi cönnöi jooja’como soto aashicha yeicho’comooje daja, tooni töwö Jesuuquidiito weichaame mmaja. Yää wääwanaacatoojo Wanaadi cuntui cöwwäiñe ejeemajancädä’da. 16Wanaadi nutuudu wääwanaacatoojo yää tooniyaano dhanwa cone’nadiiyö nönge’da na. Tooni mma conemjönö tödö’jödö woijatooje töwäännanö’e weiñä cönoojodöi. Weiñäjaato conemjönö tödöödö jona’da wääwanaacatoojo daja cönoojodöi chea. Ejeemajancädä’da Wanaadi töjaadonooje cödööato. 17Tooniño dhanwa cone’nadiiyö woijatooje wäämanä o’jodhe cönä’jaacä. Eduuwa ñanno Wanaadi jadoonoje tödööa’como wwä nä’tua jäduuje yeicho’como, eduuwaatoje yeicho’como mmaja; yää chäwwäiñe nä’tua tooni dhanwa jäcäinchädä mmaja, ñäädä Jesuuquidiito.

18Mädääje na; Adhán cone’nadiiyö woijatooje tameedä soto töwännanö’aamoje cönä’döicho. Jesuuquidiito nödöödö aashichaato jäcäinchädä daja ’quene tameedä soto Wanaadi jadoonoje ä’döjai ñaato eduuwa. 19Tooniyaano dhanwa chäänönge’da yei’jödö e’nei jooja’como soto conemjönö tödönnamooje cönä’döicho. Mädääje mmaja tooniyaano dhanwa chäänönge yei’jödö e’nei chaja jooja’como soto Wanaadi jadoonoje nä’döjaato.

20Yää waanontänä imennaajä cönä’tui cöne’da’cä jeene conemjönö ene’ju’joneije. Yaawääne’, cone’da’cä jeene conemjönö wä’dö’jödö weichaame Wanaadi nutuudu aashichaato cho’jodhe’cä mmaja jeene cöneejamöi. 21Conemjönö woijatooje wäämanä o’jodhe töweiye cönä’jaacä; eduuwa aashicha Wanaadi weichö woije daja chääjadoonoje cä’döjaato, yeichöödoto cöweicho’como töweiye yeichö wetä Cädhaajotoncomo Jesuuquidiito jäcäinchädä.

Currently Selected:

DOMAANO 5: MCH

Highlight

Copy