DOMAANO 2

Chäänönge Wanaadi tönemmenca yeichö

1Yääje yeijäcä awa’deutojo ’je’da na amäädä töweichacoono a’de’tänei. Aweichacoono a’de’tädö que amäädä mmaja mata’de’ta dea, yää dea tönnöeene aweiyajä. Amäädä äwwä a’de’tätaame mödööa dea töwö iiñödö nönge. 2Cönwanno cowaanäcäiñe na chäänönge Wanaadi tömmaminchaiñe yeichö ñanno yää tödönnamo. 3¿Wanaadi amaamincha’da ca nichö’taanä amäädä yää dea tödööancädä töweichacoono a’de’tänei? 4¿Aashicha Wanaadi weichö ca michiiñeme’canä’, ocoone’nadiiyö tönshinchä yeichö mmaja? ¿Mädä tönshinchä yeichö ätö’tajäätödö sha’duminchatoojoje yeichö äntö’tammecö’da ca manä? 5Töwäätuujacoone’da aweijäcä dajaane aweichö änsa’dumincha’da ma; yääje yeijäcä äwäätä’maminchajootojo mejoodöja wätämmencajootojo anootoi’chadö jona tödööene. Yää anooto awä Wanaadi neneeja’de chäänönge tönemmenca töweichö. 6Yaawä töwö soto nejeemaato’de iiñö’jocoomo nönge. 7Töwö Wanaadi yeichöödäje weiñä nu’a’de ñanno töquinchancädäiñe’da aashichaato tödönnamo wwäiñe, ñanno aashichaato encano’tännamo, aashicha töweicho’como encano’tännamo mmaja, töwaatamemjönö encano’tännamo mmaja. 8Conemjönö jäcä cone’da töweijäcä töwö Wanaadi nimaaminchaato’de ñanno töwoijemjöncomo, chäänöngato wätunnä woije eijöncomo, ñanno chäänöngemjönö woija’como. 9Ñanno conemjönö dönnamo nätä’maminchajaato’de, yeetunu neneeaato’dede, judhío awa’de, judhíojöönö mmaja. 10Tameedä chäänöngato tödönnamo mmaane aashicha töweichö’como neneeaato’de, aashichaato mmaja, täncanoode’da töweicho’como mmaja, judhío awa’de, judhíojöönö mmaja.

11Töwö Wanaadi ooto’jodhe soto ämjumma’da naato. 12Ñanno jenaado’jä waanontänä towaanäcäiñe’da yeiyancädä conemjönö tödönnamo nännanö’aato’de yää waanontänä ’je’da yeichaame chäwwäiñe. Ñanno jenaado’jä waanontänä towaanäcäiñe yeiyancädä conemjönö tödönnamo mmaja nätämmencajaato’dede yää waanontänä imennaajä wä’dödö nönge. 13Waanontänä etannamoojönööne Wanaadi jadoonoje nä’döaato, ñannoone, waanontänä tödönnamoone. 14Ñanno judhíojöncomo, waanontänä ’jemjöncomo, aneedawä tönnöe weneeneto yää waanontänä imennaajä aca naadö. Tönwanno towoinchadäiñe töweichaameiñe waanontänä necammadö woije nödööaato, yää a’que yeichaame chäwwäiñe. 15Mädääje tönwanno neneejaato yää waanontänä tötö’tajäätödööcomo jäcä yeichö. Yaawä wätämmencajootojo anootoi’chädö awä chö’tajäätödööcomo dea iiñödööcomo nichö’tamme’ja’de cone’da yeichö, aashicha yeichö jeiñe mma. 16Yää anooto awä töwö Wanaadi Jesuuquidiito wwä nemmencaja’de tameedä tacaademjönö soto nödöödöcoomo. Mädääje na; mädääje dea aashichaato wätunnä töneecammajä’e wäänene.

Judhío wwoncomooje Moisé waanontä’jödö yeichö

17Amäädä judhíojaato wätä’tädö; waanontänä Moisé nimennä’jödö mecaanö’a, Awaanadiiyö jäcäinchädä o’jodhe ätö’tajä’a dea. 18Amäädä odhoowanääcä na Wanaadi waanontä’jödö. Waanontänä que owaanomaajäje aweijäcä tameedä aashichaato imencadö odhoowanääcä na. 19Amäädä tänuuquemjöncomo adääneichömooje äwääcamjödö, tööjano’tacancomo iweijoneichomooje mmaja. 20Towaanojo’nemjöncomo owaanomaadö odhoowanääcä mmaja äwääcamjödö na dea, aneene’ju’jöncomo owaanomaadö mmaja, towaanojo’ne aweijäcä, tameedä weiñä odhoowanääcä yeijäcä mmaja, waanontänä jäcä owoowanoomaatö’da. 21Yääje yeijäcä anejja tönoowanooma aweichaame ¿aaquene amäädä dea oowanooma’da manä? Tämeene’da weiñä jäcä töneecammajä’e aweichaame ¿aaquene’ tämeene mmaja määnene dea amäädä? 22“Amaasuduichai’che,” queeto wä’dödö aweichaame ¿aaquene’ masuuduije mmaja määnene dea amäädä? Amäädä chu’taajä awaacö’je’da na; yääje yeichaame yeicho’como tacaano töneememme’que määnene. 23Jenaadö’jä waanontänä imennaajä äwwä yeijäcä o’jodhe tötö’tajä’e määnene; yääje yeichaame yää waanontänä woije ännö’da aweijäcä cone’da soto töna’deudeme’jo määnene Wanaadi jäcä. 24Mädääje dea Wanaadi a’deddu imennaajä jäcä nä’döa: “Änwanno owoija’comooje Wanaadi jäcä cone’da töwa’deuwe weneeneto judhíojöncomo;” quee imennaajä nä’döa.

25Yää siicunsidaadoje weiñä aashicha töweiye nai Moisé nimennä’jödö waanontänä tödö’jödööde. Yaawääne’ yää waanontänä ännö’da aweiya’jäcä siicunsidaadojemjönö nönge dea ma yaawä. 26Yääje mmaja ñäädä siicunsidaadojemjönö; waanontänä chäwwä tödööa’jäcä, siicunsidaadojaato wa’cä yaawä töwö, siicunsidaadoje’da yeichaame. 27Ñäädä tujuunu jäcä siicunsidaadoje’da töweichaame waanontänä tödöönei adheene’ju’ja waanontänä ännö’da aweichö, yää waanontänä imennaajä äwwä yeichaame, ajuunu jäcä siicunsidaadoje aweichaame mmaja. 28Ñäädäjöönööne judhío neeneje na, täneeto jäcäinchädooto mma judhíojaato wätä’tädööjönööne; siicunsidaadoje weiñä neenejöönö mmaja yää täneeto, tujuunu jäcä tödöödö naichö. 29Ñäädääne judhío neeneje na, tötö’tajäätödö aiño wäänejoodööne; tötö’tajäätödö jäcoono mmaja yää siicunsidaadoje weiñä chäänöngato. Yääje weiñä töweiye nai waanontänä imennaajä woije weiñä que’da, Epíiditu Santo ne’se’tädö woijeene. Ñäädä yääjato jäcä Wanaadi aashicha na’deuwa, sotoojönööne.

Currently Selected:

DOMAANO 2: MCH

Highlight

Copy