Lawana Nani 34
34
LAWANA 34 (33)
Dawan kupia yamnika dukiara mayunanka
Debit ulban, witin Abimélec mawanra aihka wan ba ra, Abimélec siknis lal pain apia takan.#1 Sa 21.13-15.
1Yang yu bani Dawan ra yamni pali wimni;
witin ra mayunaia ba,
yang bîli nani ba yu bani ridi kabia.
2Yang lika Dawan bâra ba dukiara tara lukisna,
bawikira nani naha wali lilia taks.
3Man nani, yang wal Dawan ra mayuns,
bakahnu witin nina ba mayunbia,
wan bîla baikra kumi baku.
4Yang Dawan ra plikri,
bara witin bui yang ra ai walan,
bara pana yang ra aisin,
yang sibrinki nani sut wina pri ai sakan.
5Baha nani Dawan ra kaiki nani ba,
lilia mita mawan nani ba ingwisa;
baha nani ba swira daukan kabia apia.
6Naha waitna umpira ba inan,
bara Dawan bui witin ra walan,
ai trabilka sut wina pri sakan.
7Dawan ra yamni kulki uplika nani ba,
Dawan insalka ba mita kan kahbi, swaki sakisa.
8Man nani, Dawan tânka ba kaiks pain sa
bara tânka brima.#1 Pi 2.3.
¡Lilia pali sa baha uplika, Dawan kat ai yukuwaika kulki ba!
9Man nani, Dawan tânka kakaira nani sma ba,
Dawan ba tara kulks,
witin ra tara kulki uplika nani ba,
diara luha kabia apia.
10Diara ailal bri nani ba,
kli diara âpu takisa,
bara witin nani plun wahwisa,
sakuna baha nani Dawan pliki ba,
diara kumi sin luha kabia apia.
11Bal, luhpi nani, man nani,
yang ra wals;
yang Dawan ra kulkaia lâka ba,
man nani ra mai smalkamni.
12¿Man rayakam yua yari brin mai daukisa ki?
¿Rayakam liliaka manis kaikaia brin mai daukisa ki?
13Ban kaka, twisam ba saura aisapara,
unam nani sin kunin lâka aisaia ba wina sâks.
14Watawi lâka ba wina irbi taks,
bara yamni ba dauks,
kupia kumi lâka ba pliki nina bliki bas.
15Dawan ba upla kasakkira nani ba kaina sunisa,
bara Dawan ai kiama pri tniki walisa ai inanka ba.
16Dawan ba saura dadaukra nani mapara sa,
witin nani nina ba
tasba wina sin tikbia sa.#1 Pi 3.10-12.
17Watauki uplika nani inanka ba,
Dawan walisa;
trabil nani wina sin swaki sakisa.
18Kupia lukra kriwan bara bîla kaikanka sin âpu
takan uplika ba lamara Dawan bâra sa,
witin baha uplika nani ba swaki sakaia dukiara.
19Upla yamni baman dauki ba,
pât uya wahwisa,
sakuna Dawan mita baha pâtka nani sut ba wina pri sakisa.
20Dawan bui ai dusa nani ba sut yamni main kaiki brisa,
dusa kumi sin krikan kabia apia.#Jn 19.36.
21Watawikira nani ba,
ai saurka dauki ba mita kli
tawi ikbia;
yamni man dauki uplika ra,
misbara kaiki nani ba klala bribia.
22Dawan ai napakanka nani rayaka ba swaki sakisa;
¡witin kat kaiki ai kupia alki bri nani ba,
klala yaban kabia apia!
Currently Selected:
Lawana Nani 34: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
