Lawana Nani 35
35
LAWANA 35 (34)
Dawan wina hilpka briaia pura sunra
Debit lawana.
1Dawan, baha nani maipara bûi ba mapara man sin bus,
maipara aiklabi nani ba mapara man sin aiklas.
2Kainam kahbaika ba alki buki bal,
yang tâiwan aimaki bal kaini kahs;
3langsikam ba buki,
ninira ai bliki aula
nani mawanra mangks,
bara ai wis:
“Yang sika man mai swaki mai sasakra sna.”
4Ai ikaia aula nani ba
munrika plapan kabia;
baha nani saura ai munaia luki nani ba
munrika plapan kabia;
5witin nani ba dus taya yuya
pâsa ra pâli ba baku kabia.
¡Dawan insalka bui witin nani ra baku munbia!
6¡Ai yabalka ba tihmia tara,
lalauhra baman kabia!
¡Dawan insalka witin nani ra baku rausauhkbia!
7Pâtkas kapri,
mini alkaika yabalki ra mangkan;
pâtkas kapri,
liwanhta yabalki ra salhki swin,
yang bâra dimaia.
8¡Sauhkaia pâtka witin nani ai dahra walras
kaka, bal prak alkbia!
¡Mina alkaia nani paskan ba,
ai mina nani kli bahara alkbia!
¡Sauhki tikaia pâtka kat,
witin nani kli bahara kauhbia!
9Bâra mika yang na Dawan ra lilia pali kamna,
witin bui swaki ai sakan kabia bamna.
10Lukanki aiska wimni:
“Dawan, ¿ya ba man wal baku wala bâra sa?
Karna nani, umpira nani ra pri sakisma.
Baha nani witin wal kau karna nani ba,
baha nani ra taibi dakbi ba.”
11Witnis watawi aisasara nani ba, maipara bûi banhwisa,
bara diara tânka briras sna ba dukiara ai makabi walisa.
12Yamni dauki ba mana, witin nani pana
yang ra saura ni aibapisa.
Bara yang sairka tara paskisa;
13witin nani siknis kan,
yang ai sarka briri,
sari prâka dimi bara plun piras kapri,
bara yang kupi ra puri sunisna ba swiras kapri.
14Yaptiki pruan sarka bri kapri baku,
upliki kum sarka briri,
muihki siknis kan sarka bri baku kupi wirha watauki kapri.
15Sakuna yang kauhri ba ra,
witin nani sut laiwaska kikan;
yang ba upla sât wala ai kakaira apia kan baku,
rau ai sauhki ba swiras ban kan.
16Witin nani ai pruki latwan aikan,
laiwaska sin kikan,
misbara ai kaiki,
ai mawan warbi laki ai kaikan.
17Dawan, ¿man ahkia kat diara daukras
ban sâp ai kaiki kama?
¡Rayaki swaki sâks,
baha layanka nani ihbi
watauki ba bîla wina,
rayaki kumi baman brisma bamna!
18Tingki mai wimni, man uplikam ailal ba mawanra;
¡mamyunamni upla kwâra nani tilara!
19Waihli nani ba lilia takbiara;
misbara ai kaiki nani ba
ai nakra kiuski ai kaikbiara.#Law 69.4; Jn 15.25.
20Witin nani kupia kumi lâka ba plikras sa.
Witin nani ai warkka dauki, kuntri uplika ra
waihla mihta ra mangkaia baman plikisa.
21Witin nani ai bîla tara kwâki,
naku wisa:
“¡Bika yang nani kaikri ba,
baha sika nanara man nani kaiks!”
22¡Dawan, man naha sut kaikram!
¡Ai kaikras baku sâp kapara!
¡Laima wina kitwi takpara!
23Dawan, yang Gâdki, rawi bus
kasakkam lâka ni, lâika na dauks.
24Dawan, yang Gâdki,
lâika na man dauks
kasakkam lâka ba kat,
bâra lika laiwaska kikbia apia.
25Swirka witin nani naku wibiara:
“¡Naku sika yang nani daukaia kapri ba!
¡Nanara yawan bui witin ba aiska pali sauhkan sa!”
26Saura ai munan ba kaiki,
lilia taki banhwi ba,
yarka witin nani sut swira daukan kabia;
witin nani ba kau tara sa luki ba,
yarka swira daukan prâka aiska dingkan kabia.
27Baha nani yang puri lubia bara
ai kaikaia luki nani ba, aiwani lilia kabia;
witin nani takaskras kau aisi kabia aima bani:
“Dawan ba tara pali kulkan sa;
witin ai napakanka diara sut dauki ba
yamni pali kaikisa.”
28Yang twisi ba
man kasakkam tânka dukiara aisi kabia;
¡yu aiska mamyunra dauki kamna!
Currently Selected:
Lawana Nani 35: MSKTU
Highlight
Share
Compare
Copy
Want to have your highlights saved across all your devices? Sign up or sign in
© 2010 Bible Society in Nicaragua
